EKISEDHUSI 33 - Bhaibheri Rakachena muChindau

Mambo Mwari Unopanga vaIsuraeri Kubva paMutunhu weSinai

¹ Mambo Mwari wakaereketa kunaMosi, “Ibva pano, enda, kwira, iwewe nevanhu vowakabudisa kubva muEgipite, muende kunyika yendakapikira Abrahama, Isaka naJakobe ndechiti, ‘Ndinozoipa kumibarirwana yenyu.’

² Ndinozotuma ngirosi pamberi pako; ndinozodzinga vaKhenani, vaAmori, vaHiti, vaPherizi, vaHivhi nevaJebhusi.

³ Kwirai kunyika inoerera mukaka nouchi; asi inini andizokwiri ndiri pakati penyu ngokuti ndinozomupedza munjira, ngokuti muri vanhu vane mitsipa yakakukutara.”

⁴ Naapo vanhu vazwa mashoko aya akashata, vakabonda: apana munhu wakasimira zvinemeso zvake.

⁵ Ngokuti Mambo Mwari wakati kunaMosi, “Ronza kuvana vaIsuraeri kuti, ‘Muri vanhu vane mitsipa yakakukutara; kudai ndikahamba kukwira ndiri pakati penyu kanguva kadoko, ndinozomupedza. Ndizvo zvino bvisai zvinemeso zvenyu, kuti ndizie chokuita ndimwi.’ ”

⁶ Ndizvo vana vaIsuraeri vakadzidusira zvinemeso zvavo kubvira vari paMutunhu Horebhi.

Tende roKuapo kwaMambo Mwari

⁷ Zvino Mosi waisitora tende echiriemesa ngokubanze kwematende, kuretu nematende; akaridudza kuti, “Tende romushongano.” Munhu weshe waitsvaka Mambo Mwari waibuda kuenda kutende romushongano, raiya kubanze kwematende.

⁸ Zvino Mosi abuda kuenda mutende, vanhu veshe vakamiruka vakaema, munhu weshe pamusiwo wetende rake, vakaringira Mosi metsa akapotera mutende.

⁹ Naapo Mosi apotera mutende, sika yegore yaizodzaka nokuema pamusiwo wetende, naMambo Mwari waizoereketa naMosi.

¹⁰ Naapo vanhu veshe vakaona sika yegore yechiema pamusiwo wetende, vanhu veshe vaizomiruka nokudira, munhu weshe ari pamusiwo wetende rake.

¹¹ Mambo Mwari waiereketa kunaMosi hope kuhope, kudai ngomunhu unoereketa kunemungani wake. Naapo Mosi paakakunukukazve kupotera mukampa; muranda wake Joshua, mukororo waNuni, jaha, aazi kubuda kubva mutende.

Mambo Mwari Unogondisa Kugara neVanhu vake

¹² Mosi wakati kunaMambo Mwari, “Wona, unoti kwendiri, ‘Kwira uunze ava vanhu;’ asi auzi kundiziisa uwo wounozotuma neni. Asi wakati, ‘Ndinokuzia ngezina rako, newe wakaonazve nyasha mukuona kwangu.’

¹³ Ndizvo zvino, ndinokupota, kudai ndaona nyasha mukuona kwako, ndiziise zvino njira dzako, ndikuzie, kuti ndione nyasha mukuona kwako. Karakadzazve kuti dzinza iri vanhu vako.”

¹⁴ Wakati, “Kuapo kwangu kunozohamba newe, neni ndinozokupa kuzorora.”

¹⁵ Wakati kwaari, “Kudai kuapo kwako kusikazohambi neni, usazotikwidza kubva pano.

¹⁶ Ngokuti zvino kunozoziikanwa ngenyi kuti ndakaona nyasha mukuona kwako, inini nevanhu vako? Andikwo kuti unohamba nesu here, kuti kuapo mupauko, inini nevanhu vako kubva kune vanhu veshe vari padera pehope yenyika?”

¹⁷ Mambo Mwari wakati kunaMosi, “Chiro ichi chewakaereketa ndicho ndinozochiita; ngokuti wakaona nyasha mukuona kwangu, neni ndinokuzia ngezina rako.”

¹⁸ Naye wakati, “Ndionise, ndapota, uthende hwako.”

¹⁹ Wakati, “Ndinozoita kuti kunaka kwangu kweshe kupinde pamberi pako; ndinozodaidzira pamberi pako zina raMambo Mwari; ndinozomuitira nyasha uwo wendinoda kuitira nyasha, ndinozoonisa nyasha kwaari wendinoda kuonisa nyasha.”

²⁰ Asi, wakati, “Aungakoni kuona hope yangu; ngokuti akuna munhu ungandiona, akapona.”

²¹ Mambo Mwari wakati, “Ringira, iripo ndau pasinde pangu, pounozoema padera pebuwe.

²² Naapo uthende hwangu hwechipinda, ndinozokuisa murutwe rwebuwe, neni ndinozokufukidza ngenyara yangu metsa ndapinda.

²³ Zvino ndinozodusa nyara yangu, newe unozoona mushana wangu; asi hope yangu aizoonekwi.”