EKISEDHUSI 32 - Bhaibheri Rakachena muChindau

Mukono woMukore

¹ Naapo vanhu vaona kuti Mosi wanonoka kudzaka kubva pamutunhu, vanhu vakaungana pana Aroni, vakati kwaari, “Miruka, utiitire zvimwari, zvinozohamba pamberi pedu; ngokuti ngendaa youyu Mosi, munhu wakatibudisa kubva kunyika yeEgipite, atizii zvaitika kwaari.”

² Aroni wakati kwavari, “Torai ndandazi dzomukore dziri munzee dzevakadzi venyu, dzevakororo venyu nedzevanasikana venyu, mudziunze kwendiri.”

³ Vanhu veshe vakatora ndandazi dzomukore dzaiya munzee dzavo, vakadziunza kunaAroni.

⁴ Naye wakaashira mukore kubva kunyara dzavo, akaita muemo ndiwo, wekonyana rakaumbwa ngomukore wakanyunguruswa. Navo vakati, “Izvi ndizvo zvimwari zvenyu, A Isuraeri, izvo zvakamubudisa kubva kunyika yeEgipite.”

⁵ Naapo Aroni aona izvi, wakaaka arita pamberi paro; naAroni wakadaidzira, akati, “Mangwani rinozoapo dhiri kunaMambo Mwari.”

⁶ Vakafumira remangwanani kumiruka, vakapira midiro yokupisha nokuunza midiro yokuiyanisa; nevanhu vakagara pashi kudya nokumwa, vakamiruka kutamba.

⁷ Mambo Mwari wakati kunaMosi, “Enda, dzaka pashi; ngokuti vanhu vako vowakabudisa kubva kunyika yeEgipite vadzishaishira.

⁸ Vakasira kupauka kubva kunjira yendakavapanga; vadziitira konyana rakaumbwa ngomukore wakanyunguruswa, varidira nokupira mudiro kweriri vechiti, ‘Izvi ndizvo zvimwari zvenyu, A Isuraeri, zvakamubudisa kubva kunyika yeEgipite.’ ”

⁹ Mambo Mwari wakati kunaMosi, “Ndakaona ava vanhu, wona, vanhu vane mitsipa yakakukutara.

¹⁰ Zvino ndirekere, kuti ushungu hwangu hubake padera pavo, ndivapedze; asi ndiwe ndinozoita dzinza guru.”

¹¹ Mosi wakapota kunaMambo Mwari, Mwari wake, akati, “Mambo Mwari, ushungu hwako hunobaka ngenyi kurwisana navanhu vako, avo vowakabudisa kubva kunyika yeEgipite ngesimba gurutu ngenyara ine simba?

¹² VaEgipite vanozoereketa ngenyi vechiti, ‘Mukushaisha wakavabudisa kuti avauraye pamitunhu nokuvapedza kubva padera pehope yenyika?’ Kunukuka kubva kuushungu hwako hunotyisa, utenderuke kubva mune uku kushata kuvanhu vako.

¹³ Karakadza Abrahama, Isaka naIsuraeri varanda vako, vowakadzipikira kwavari wemene, wakati kwavari, ‘Ndinozowanza mibarirwana yenyu kuti idai ngenyeredzi dzomudenga, neiyi nyika yeshe yendakagondisa, ndinozoipa kumibarirwana yenyu, vanozoigara nhaka riini nariini.’ ”

¹⁴ Mambo Mwari wakatenderuka ngendaa yokushata kwaaipinimidza kuzoita kune vanhu vake.

¹⁵ Mosi wakakunukuka, akadzaka pashi kubva pamutunhu, ane marusamba mairi echitenderano munyara dzake; marusamba aiya akanyorwa kumarutii awo mairi; kurutii rumwe nokurutii rumweni aiya akanyorwa.

¹⁶ Nemarusamba aiya mushando waMwari, nokunyorwa kwaiya kunyora kwaMwari, rwakanangurwa padera pemarusamba.

¹⁷ Naapo Joshua azwa bope revanhu apo vechidaidzira, wakati kunaMosi, “Riripo bope rokurwa mumatende.”

¹⁸ Naye wakati, “Andiropi bope raavo vanodaidzira ngokunyisa, nokuti raavo vanochema ngokunyiswa; asi ibope raavo vanoemba rendinozwa.”

¹⁹ Naapo akwedzera kumatende, wakaona konyana nokuzvina; ushungu hwaMosi hwakabaka, naye wakakandira pashi marusamba kubva munyara dzake, akaaputsa pashi pemutunhu.

²⁰ Wakatora konyana revaiya vaita, akaripisha ngomuriro, akarikuya kuita bukuta, akaisa bukuta padera pemvura, akaita kuti vana vaIsuraeri vamwe mvura yacho.

²¹ Mosi wakati kunaAroni, “Vanhu ava vakaitenyi kwouri kuti uunze chishaishi chikuru padera pavo?”

²² Aroni wakati, “Musaita kuti ushungu hwamambo wangu hubake; unozia vanhu kuti vanorovedzera kuita zvakashata.

²³ Ngokuti vakati kwendiri, ‘Tiitire zvimwari zvinozotungamira pamberi pedu; ngokuti ngendaa yaMosi uyu, munhu wakatibudisa kubva kunyika yeEgipite, atizii zvakaitika kwaari.’

²⁴ Neni ndakati kwavari, ‘Kunyazwi ndiani unomukore, ngaautore; ndizvo vakapa kwendiri, ndakaukandire mumuriro, mukabuda iri konyana.’ ”

²⁵ Naapo Mosi aona kuti vanhu vaiya vapauka, ngokuti Aroni wakavatendera kupauka kuti vatsverudzwe pakati pemagaa avo,

²⁶ zvino Mosi wakaema pamusiwo wematende, akati, “Ndiani unorwira Mambo Mwari? Ngaauye kwendiri.” Nevakororo veshe vaRevhi vakadziunganidza kwaari.

²⁷ Wakati kwavari, “Unoronza izvi Mambo Mwari, Mwari waIsuraeri, ‘Munhu weshe ngaapakatire shoti yake panhunji yake, aende apo naapo kubva kuchimana kuenda pachimana mutende, auraye munhu weshe mungani wake, nomunhu weshe muakirwana wake.’ ”

²⁸ Vakororo vaRevhi vakaita kudai ngeizwi raMosi; kwakaurawa ngeiro zuva vanhu vanoda kuita makumi emazana matatu (3,000).

²⁹ Mosi wakati, “Mwadzipira nyamashi kuita mushando waMambo Mwari, eya, munhu weshe arwisane nomukororo wake nehama yake, kuti afumise nyamashi.”

³⁰ Mangwani mangwanani Mosi wakati kunevanhu, “Mwashaisha chishaishi chikuru. Zvino ndinozokwira kunaMambo Mwari; pamweni ndingaita muripo wechishaishi chenyu”

³¹ Ndizvo Mosi wakahwirira kunaMambo Mwari, akati, “Haiwa, vanhu ava vashaisha chishaishi chikuru; vakadziitira zvimwari zvomukore.

³² Asi, zvino, kudai mwechivakungurira chishaishi chavo; kani kudai musikaiti, ndinomupota, nditsukutidzei kubva mubhuku renyu remwakanyora.”

³³ Mambo Mwari wakati kunaMosi, “Kunyazwi ndiani wakandishaishira, ndiye wendinozotsukutidza kubva mubhuku rangu.

³⁴ Asi zvino enda, utungamirire vanhu kuenda kundau yendakaereketa kwouri ndiyo; ringira, ngirosi yangu inozotungamira pamberi pako. Asi zvakanyadaro ngezuva rendinozohambira, ndinozounzidzira chishaishi chavo padera pavo.”

³⁵ Mambo Mwari wakaunza nhenda padera pevanhu ngokuti vakaita konyana rakaitwa ndiAroni.