EKISEDHUSI 31 - Bhaibheri Rakachena muChindau

Vaaki veTende roKuwapo kwaMambo Mwari

¹ Mambo Mwari wakaereketa kunaMosi echiti,

² “Ringira, ndadaidza ngezina Bhezareri mukororo waUri, mukororo waHuri, wedzinza raJudha;

³ neni ndakamuzadza ngomweya waMwari, muungwaru nokuzwisisa, nomukuzia nomukukona mbeu dzeshe dzemishando,

⁴ kuronga mishando youngwazi, kushanda ngomukore nesirivha nethusi,

⁵ kutsetsa mapuwe okuemesa, nokutsetsa miti, yembeu dzeshe dzemishando.

⁶ Ringira, ndaemesa pamwepo naye Ohoriabhi, mukororo waAhisamakhi, wedzinza raDhani; nomumwoyo mwaavo veshe vakangwara ndakaisa ungwaru, kuti vaite zveshe zvendakupanga:

⁷ Tende romushongano, nebhokisi rechitenderano, nechigaro chenyasha chiri padera paro, nezvidziyo zveshe zvetende,

⁸ netafura nezvidziyo zvaro, nechigadzikiro chechibani chakaera nezvidziyo zvacho zveshe, nearita rokupishira mutombo, unegwema rakanaka,

⁹ nearita romudiro wokupisha nezvidziyo zvaro zveshe, nechidziyo chokushambiramwo nechigadzikiro chacho,

¹⁰ nezvokusimira zvakanasa kurukwa, nezvokusimira zvakacheneswa zvaAroni mupristi nezvevakororo vake, zvokusimira vechishanda mushando woupristi,

¹¹ nemafuta okudzodza ndiwo, nomutombo wokupisha unegwema rakanaka wendau yakachena. Vanozoita kudai ndizvo zveshe zvendakupanga.”

Sabatha Zuva roKuzorora

¹² Mambo Mwari wakaereketa kunaMosi echiti,

¹³ “Ereketazve kunevana vaIsuraeri wechiti, ‘Ngegwinyiso munozongwarira maSabatha angu, ngokuti chioniso chiri pakati pangu nemwi kumibarirwana yenyu yeshe, kuti muzie kuti inini ndini Mambo Mwari unomuchenesa.

¹⁴ Ndizvo munozongwarira Sabatha, ngokuti rakachena kwomuri; munhu weshe usakazoringwariri ngegwinyiso unozourawa; kunyazwi ndiani unozoshanda ngeiro zuva, mweya uwo unozourawa kubva pakati pevanhu vake.

¹⁵ Munozoshanda mazuva matanhatu, asi ngezuva rechinomwe iSabatha rokuzorora, rakachena kunaMambo Mwari; kunyazwi ndiani unozoshanda nokuti ngouri mushando ngezuva reSabatha ngegwinyiso unozourawa.

¹⁶ Ndizvo vana vaIsuraeri vanozongwarira Sabatha, varingwarire Sabatha nokumibarirwana yavo yeshe, kuita chitenderano chariini nariini.

¹⁷ Chioniso pakati pangu nevana vaIsuraeri chariini nariini; ngokuti ngemazuva matanhatu Mambo Mwari wakaita denga nenyika, ngezuva rechinomwe wakazorora, wakagwinyiswa.’ ”

¹⁸ Naye wakapa kunaMosi, apo aiya apedza kuereketa naye padera poMutunhu weSinai, marusamba mairi echapupu, marusamba emapuwe akanyorwa ngechinwe chaMwari.