EKISEDHUSI 30 - Bhaibheri Rakachena muChindau

Arita yoKupishira Mitombo Inegwema Rakanaka

¹ “Unozoita arita rokupishirapo mutombo unegwema rakanaka; unozoriita ngemiti yehlofunga.

² Urebu hwaro hunozoita masendimitha makumi marongomuna nemashanu, nokupamhama kwaro kunozoita masendimitha makumi marongomuna namashanu rinozoita marupande marongomuna akaedzana; kureba kukwira mudenga kwaro kunozoita masendimitha makumi mapfumbamwe; nyanga dzaro dzinozoita chiro chimwe naro.

³ Unozoriseta ngomukore wakaera, padera paro nemarutii aro kuritendenedza nenyanga dzaro; unozoriitira hata yomukore kuritendenedza.

⁴ Unozoriitira ndandazi mbiri dzomukore; pashi pehata yaro, kumarutii aro mairi akaparadzana, unozodziita; nadzo dzinozoita ndau dzemipingo yokuritwara ndiyo.

⁵ Unozoita mipingo yehlofunga, uisete ngomukore.

⁶ Unozoriisa pamberi pevheri riri pasinde pebhokisi rechitenderano, pamberi pechigaro chenyasha chiri padera pebhokisi rechitenderano, apo pendinozoshongana newe.

⁷ Aroni unozopishirapo mutombo une gwema rakanaka; mangwanani eshe apo paanonasirira zvibani unozoupisha.

⁸ Naapo Aroni echibasira zvibani madeekoni, unozoupisha, kuita mutombo unopishwa ngenguva dzeshe pamberi paMambo Mwari metsa kumibarirwana yenyu yeshe.

⁹ Musazopirapo mutombo wokupisha wakasvipiswa nokuti mudiro wokupisha nokuti mudiro woufu, musazodurura mudiro wokumwa padera paro.

¹⁰ Aroni unozoita muripo padera penyanga dzaro kamwe ngegore; nengazi yokuripa yomudiro wokushaisha, unozopira mudiro wokuripa kamwe ngegore metsa kumibarirwana yenyu yeshe; iri yakapindisisa kucheneswa kunaMambo Mwari.”

Muthero weTende roKuwapo kwaMambo Mwari

¹¹ Mambo Mwari wakaereketa kunaMosi echiti,

¹² “Naapo wooerenga uwandu hwevana vaIsuraeri, zvino umwe ngaumwe unozopa muripo womweya wake kunaMambo Mwari, apo woovaerenga, kuti nhenda isazoapo pakati pavo, apo woovaerenga.

¹³ Umwe ngaumwe wakaerengwa; unozopa muripo wakaemeswa, unouremu wechipimo chakaemeswa chepandau yakachena. Munhu weshe unozopa muripo uyu kuita mudiro kunaMambo Mwari.

¹⁴ Munhu weshe pane vakaerengwa, kubvira vane makore makumi mairi kuenda mberi, unozopa mudiro kunaMambo Mwari.

¹⁵ Vapfumi avazopi zvinopinda, nevarombo avazopi zvishomani, apo voopa mudiro kunaMambo Mwari kuita muripo womweya yenyu.

¹⁶ Unozotora mare yomuripo kubva kuvana vaIsuraeri, unozoiemesera kuita mushando wetende romushongano, kuti iite mukarakadziso kuvana pamberi paMambo Mwari kuripira mweya yenyu.”

Chidziyo choKushambira Nyara cheThusi

¹⁷ Mambo Mwari wakaereketa kunaMosi echiti,

¹⁸ “Unozoitawo chidziyo chethusi nechigadzikiro chacho chethusi chokushambiramwo. Unozochiisa pakati petende romushongano nepaarita, unozoisa mvura mukati mwacho.

¹⁹ Aroni nevakororo vake vanozoshambiramwo nyara dzavo netsoka dzavo.

²⁰ Apo voopotera mutende romushongano, vanozoshamba ngemvura, kuti vasazofa, nokuti vookwedzera kuarita kooshanda, kupisha mudiro unoitwa ngomuriro kunaMambo Mwari.

²¹ Vanozoshamba nyara dzavo netsoka dzavo kuti vasazofa; chinozoita chiemeso chemhera nariini kwavari, kunyazwi kwaari emene nokumibarirwana yake yeshe.”

Mafuta oKudzodzwa

²² Mambo Mwari wakaereketa kunaMosi echiti,

²³ “Torazve makha akapindisisa kunaka, makhirogramu matanhatu emhura inoerera, makhirogramu matatu resinamoni inegwema rakapinda kunaka, makhirogramu matatu ekhane inegwema rakapinda kunaka

²⁴ nekasia makhirogramu matanhatu, eshe anopimwa ngechipimo chakaemeswa chendau yakachena, nemaritha marongomuna emafuta emaorivhi.

²⁵ Newe unozoita ndizvo mafuta akacheneswa okudzodza ndiwo, mutombo unegwema rakanaka; anozoita mafuta okudzodza akacheneswa.

²⁶ Unozodzodza ndiwo tende romushongano, nebhokisi rechitenderano,

²⁷ netafura nezvidziyo zvaro zveshe, nechigadzikiro chechibani nezvidziyo zvacho, nearita rokupishira mutombo unonuhwira,

²⁸ nearita rokupishira mudiro pamwepo nezvidziyo zvaro zveshe, nechidziyo chokushambiramwo nechigadzikiro chacho.

²⁹ Unozozvichenesa kuti zviite zvakapindisisa kuchena; kunyazwi chiinyi chinozozvigwama chinozocheneswa.

³⁰ Unozodzodza Aroni nevakororo vake nokuvachenesa, kuti vandishandire mumushando woupristi.

³¹ Unozoereketa kune vana vaIsuraeri wechiti, ‘Aya anozoita mafuta angu akacheneswa okudzodza ndiwo kumibarirwana yenyu yeshe.

³² Aazodururwi pamuiri womunhuwo zvake, musazoita anotodzana nawo, kudai ngokukumanidzwa kwawo; nawo anozoita akachena kwouri.

³³ Kunyazwi ndiani unozokumanidza akadai ndiwo, nokuti unoisa amweni awo padera pomupara, unozogurwa kubva pakati pevanhu vake.’ ”

Mutombo Unegwema Rakanaka

³⁴ Mambo Mwari wakati kunaMosi, “Dzitorere mitombo inegwema rakanaka, staketi, naonikha negaribhanumu, mitombo inonuhwira pamwepo nefrankinisensi yakaera; zveshe zvinozoita uremu humwehwo.

³⁵ Newe unozoita ndiwo mutombo une gwema rakanaka, wakanasirwa ngoungwaru hwengwazi yokunasira mitombo, yakarungwa ngomunyu, wakaera nokuchena.

³⁶ Unozotwa umweni wawo kuti umotseke kakurutu, nokuisa umweni wawo pamberi pebhokisi rechitenderano mutende romushongano, apo pendinozoshongana newe; unozoita wakapindisisa kuchena kwouri.

³⁷ Nomutombo une gwema rakanaka wounozoita kudai ngokukumanidzwa kwawo, musazodziitira pachenyu kudaro; kwomuri unozoita wakachena kunaMambo Mwari.

³⁸ Kunyazwi ndiani unozoita wakadai ngouwo, kuti adzinuhwidze gwema rawo, iye unozogurwa kubva pakati pevanhu vake.”