EKISEDHUSI 29 - Bhaibheri Rakachena muChindau

Mipango yoKudzodza Aroni neVana vake Kuita Vapristi

¹ “Zvino ichi ndicho chounozoita kwavari kuvaparadzanisa, kuti vandishandire mumushando woupristi. Tora mukono umwe mutsva nemagondohwe mairi zvisina kuremara,

² nechingwa chisina mumera, nemakeke asina mumera, zvakakanywa ngemafuta, nezvingwa zvidoodoko zvisina mumera, zvakadzodzwa ngemafuta. Unozozviita ngoufu hwakamotseka hwekoroni.

³ Unozozviisa muchitundu chimwe, uzviunze muchitundu, uunzezve mukono nemagondohwe mairi.

⁴ Unozounza Aroni nevakororo vake kumusiwo wetende romushongano nokuvashamba ngemvura.

⁵ Unozotora zvokusimira, upfekedze Aroni bhachi, negauni yeefodhi, neefodhi, nechokungwarira diti, nokumusunga ngebhande rakarukwa ngengwazi reefodhi.

⁶ Unozoisa chiqoko padera pesoro rake, nokuisa dzungudza rakacheneswa padera pechiqoko.

⁷ Naapo unozotora mafuta okudzodza, uadurure padera pesoro rake, umudzodze.

⁸ Unozounza vakororo vake, uvapfekedze mabhachi.

⁹ Unozovasunga ngemabhande Aroni nevakororo vake, uise zviqoko pamasoro avo: noupristi unozoita wavo ngechiemeso chemhera nariini. Unozogadza Aroni nevakororo vake.

¹⁰ “Unozounza mukono pamberi petende romushongano. Aroni nevakororo vake vanozoisa nyara dzavo padera pesoro romukono.

¹¹ Unozouraya mukono pamberi paMambo Mwari, pamusiwo petende romushongano.

¹² Unozotora rupande rwengazi yomukono nokuiisa panyanga dzearita ngechinwe chako, nokudurura ngazi yeshe ngepashi pearita.

¹³ Unozotora mafuta eshe anofukidza mathumbu, nemafuta ari padera pechiropa netsvo mbiri, nemafuta ari padera padzo, uzvipishe padera pearita.

¹⁴ Asi nyama yomukono nedoo rawo nemadisa awo unozozvipisha ngomuriro kubanze kwekamba, mudiro wokushaisha.

¹⁵ “Unozotorazve gondohwe rimwe; Aroni nevakororo vake vanozoisa nyara dzavo padera pesoro regondohwe,

¹⁶ newe unozouraya gondohwe, unozotora ngazi yaro, uifafazire kutendenedza padera pearita.

¹⁷ Unozocheka gondohwe kuriita zvigurwa, nokusuka mathumbu aro, nemirenje yaro, nokuzviisa pamwepo nezvigurwa zvaro nesoro raro.

¹⁸ Unozopisha gondohwe reshe padera pearita; uyu mudiro wokupisha kunaMambo Mwari; uri gwema rakanaka, mudiro unoitwa ngokupishwa kunaMambo Mwari.

¹⁹ “Unozotora gondohwe rimweni; Aroni nevakororo vake vanozoisa nyara dzavo padera pesoro regondohwe,

²⁰ newe unozouraya gondohwe, utore rupande rwengazi yaro, nokuiisa panogumira nzee yokumudyo yaAroni, nepanogumira nzee dzokumudyo dzevakororo vake, nepagunwe renyara dzavo dzokumudyo, nepagunwe retsoka dzavo dzokumudyo, nokufafazira ngazi yeshe padera pearita kuritendenedza.

²¹ Newe unozotora rupande rwengazi iri padera pearita nemafuta okudzodza, nokuzvifafazira padera paAroni nepezvokusimira zvake, nepadera pevakororo vake pamwepo nepezvokusimira zvavo; naye unozocheneswa nezvokusimira zvake, nevakororo vake nezvokusimira zvevakororo vake pamwepo naye.

²² “Unozotorawo mafuta egondohwe nemafuta omuswe, mafuta anofukidza mathumbu nemafuta anofukidza chiropa, itsvo mbiri, nemafuta akadziputira, nechitho chokumudyo; ngokuti igondohwe rokugadzwa ndiro,

²³ nechingwa chimwe chakakanywa ngemafuta, nechingwa chimwe chidoko, zvinotorwa kubva muchitundu chezvingwa zvisina mumera zviri pamberi paMambo Mwari.

²⁴ Newe unozoisa zveshe panyara dzaAroni nepanyara dzevakororo vake nokuzvizunguzira kuita chipo chinozunguzirwa pamberi paMambo Mwari.

²⁵ Zvino unozozvitora kubva kunyara dzavo nokuzvipisha padera pearita pamwepo nomudiro wokupisha, kuti zviite gwema rakanaka pamberi paMambo Mwari; mudiro wokupisha ngomuriro kunaMambo Mwari.

²⁶ “Unozotora chifuba chegondohwe rokugadzwa kwaAroni nokurizunguzira kuita mudiro wokuzunguzirwa pamberi paMambo Mwari; naro rinozoita chikoaniswa chako.

²⁷ Newe unozochenesa chifuba chomudiro wokuzunguzirwa, nomutezo womudiro wokumirudzwa, unozozunguzirwa, nouwo unomirudzwa, kubva pagondohwe rokugadzwa ndiro, kubva pane zvaAroni nezvevakororo vake.

²⁸ Zvinozoita zvaAroni nevakororo vake mhera nariini zvinobva kuvana vaIsuraeri, ngokuti uyu mudiro wevapristi unopirwa ngevanhu vaIsuraeri kubva kumidiro yavo yokuiyana; midiro yavo yezvipo kunaMambo Mwari.

²⁹ “Zvokusimira zvakacheneswa zvaAroni zvinozoita zvevakororo vake ngesure kwake, kuti vadzodzwe vakazvipfeka, nokugadzwa vakazvipfeka.

³⁰ Mukororo uwo unoita mupristi pandau yake unozozvisimira mazuva manomwe, apo oopotera mutende romushongano kushanda mundau yakachena.

³¹ “Unozotora gondohwe rokugadzwa kubika nyama yaro mundau yakachena.

³² Aroni nevakororo vake vanozodya nyama yegondohwe nezvingwa zviri muchitundu, pamusiwo wetende romushongano.

³³ Vanozodya izvo zvakapirwa kuripa ndizvo, pakugadzwa nepakucheneswa; asi mupara aazozvidyi, ngokuti zvakacheneswa.

³⁴ Kudai kunenyama imweni yokugadzwa, nokuti zvingwa zvakasara metsa mangwani, naapo unozopisha zvasara ngomuriro; azvizodyiwi akadi, ngokuti zvakacheneswa.

³⁵ “Ndizvo zveunozoita kunaAroni nokuvakororo vake, kudai ngeizvo zveshe zvendakakupanga; mumazuva manomwe unozovagadza.

³⁶ Mazuva eshe unozopira mukono wokuita mudiro wokushaisha kuita muripo; newe unozochenesa arita apo unoriripira; unozoridzodza kurichenesa.

³⁷ Mazuva manomwe unozoripira arita, urichenese; nearita rinozoita rakapindisisa kuchena; kunyazwi chiinyi chinogwama arita chinozocheneswa.

Zvipo zveMazuva Eshe

³⁸ “Zvino izvi ndizvo zvounozopira padera pearita; zvikwai zviiri zvaane gore rimwe zuva ngezuva ngenguva dzeshe.

³⁹ Unozopira kakwai kamwe mangwanani, nekamweni unozopira madeekoni.

⁴⁰ Pamwepo nekakwai unozopira rupande rwechegumi khirogramu rimwe roufu hwakamotseka hwekoroni hwakakumanidzwa neritha rimwe remafuta emaorivhi, neritha rimwe remafuta akaengwa, neritha rimwe revhini kuita mudiro wokumwa.

⁴¹ Nekakwai kamweni unozopira madeekoni, unozopira noufu mudiro wokumwa kudai ngomudiro wemangwanani, kudaizve ngomudiro wegwema rakanaka, mudiro unoitwa ngomuriro kunaMambo Mwari.

⁴² Unozoita mudiro unopishwa ngenguva dzeshe kumibarirwana yenyu pamusiwo wetende romushongano pamberi paMambo Mwari, apo pendinozoshongana newe, kuti ndierekete apo newe.

⁴³ Naapo ndinozoshongana nevana vaIsuraeri; netende rinozocheneswa ngouthende hwangu.

⁴⁴ Ndinozochenesa tende romushongano nearita; ndinozochenesawo Aroni nevakororo vake, kuti vandishandire mumushando woupristi.

⁴⁵ Ndinozogara pakati pevana vaIsuraeri, ndiite Mwari wavo.

⁴⁶ Navo vanozozia kuti ndiri Mambo Mwari, Mwari wavo, uwo wakavabudisa kubva munyika yeEgipite, kuti ndigare pakati pavo. Inini ndiri Mambo Mwari, Mwari wavo.