EKISEDHUSI 27 - Bhaibheri Rakachena muChindau

Arita

¹ “Unozoita arita resika dzehlofunga, kureba kwaro kunozoita mamitha mairi, nokupamhama kwaro kunozoita mamitha mairi; arita rinozoedzana marutii aro marongomuna; nokureba kwaro kuenda mudenga kunozoita mitha rimwe nezvidoko zvitatu.

² Unozoita nyanga dzaro kumakhona marongomuna aro; nyanga dzaro dzinozoita chiro chimwe naro: unozoriseta ngethusi.

³ Unozoita hari dzaro dzokudusa marota aro, mafoshoro aro, zvidziyo zvaro, maforoko aro enyama nemaruwenda omuriro: unozoita zvidziyo zvaro zveshe ngethusi.

⁴ Newe unozoriitira chokutsimisa muriro chakarukwa kudai ngemumbure chethusi; nepadera pemumbure unozoita ndandazi murongomuna kumakhona marongomuna acho.

⁵ Unozochiisa ngepashi mubandaanda raro kutendenedza arita ngepashi, kuti mumbure ugume pakati pearita.

⁶ “Newe unozoita mipingo yearita, mipingo yemiti yehlofunga, uisete ngethusi.

⁷ Mipingo yaro inozoiswa mundandazi, nemipingo inozoa kumarutii mairi earita, apo rootwarwa.

⁸ Unozoriita ngemiti risina chiro mukati; kudai ngezvewakaoniswa pamutunhu, rinozoitwa kudaro.

Ruwanze rweTende roKuwapo kwaMambo Mwari

⁹ “Unozoita ruwanze rwetende. Kurupande rwokubani ruwanze runozoiswa magangiro akaitwa ngemachira akapindisisa kunaka rakakoshwa, urebu worutii rumwe rwaro runozoita mamitha makumi marongomuna namarongomuna.

¹⁰ Sika dzarwo dzinozoita makumi mairi, nezvigadzikiro zvadzo dzinozoita makumi mairi dzethusi; zvikoreko zvesika nemwamba yadzo zvinozoita zvesirivha.

¹¹ Ngokudaro kurutii rwedera anozoapo machira okuturika ano urebu hwemamitha makumi marongomuna namarongomuna, sika dzawo makumi mairi nezvigadzikiro zvadzo makumi mairi, zvethusi; zvikoreko zvesika, nemwamba yadzo zviri zvesirivha.

¹² Kupamhama kworuwanze kurutii rwokumabirira zuva anozoapo machira okuturika anoita mamitha makumi mairi namairi kureba, sika gumi nezvigadzikiro zvadzo gumi.

¹³ “Kupamhama kworuwanze kurutii rwokumabvazuva kunozoita mamitha makumi mairi namairi.

¹⁴ Machira okuturika orutii rumwe rwepamusiwo anozoita mamitha matanhatu nezvidoko zvitanhatu, sika dzarwo dzinozoita nhatu, nezvigadzikiro zvadzo zvitatu.

¹⁵ Kurutii rumweni anozoapo machira okuturika anoita mamitha matanhatu namatanhatu, sika nhatu zvigadzikiro zvadzo zvitatu.

¹⁶ Nepamusiwo poruwanze anozoapo machira okuturika ane mamitha mapfumbamwe kureba, akaitwa ngemachira akapinda kunaka akasvipirika, akatsvukuruka, akatsvuka, neorukangaza rwakanaka rwakakoshwa, mushando wengwazi yokutunga, sika dzawo murongomuna zvigadzikiro zvadzo zvethusi.

¹⁷ Sika dzeshe dzinotendenedza ruwanze dzinozorimbanidzwa ngemwamba yesirivha; zvikoreko zvadzo zvinozoita zvesirivha, nezvigadzikiro zvadzo zvethusi.

¹⁸ Urebu hworuwanze hunozoita mamitha makumi marongomuna namarongomuna nokupamhama kwarwo kundau dzeshe kunozoita mamitha makumi mairi, nokureba kwarwo kukwira mudenga mamitha mairi nezvidoko zviiri nezvigadzikiro zvethusi.

¹⁹ Midziyo yeshe yetende yemishando yaro yeshe, nehoko dzaro dzeshe, nehoko dzoruwanze, dzinozoita dzethusi.

Kungwarira Chibani

²⁰ “Unozopanga vana vaIsuraeri kuti vakuunzire mafuta akaera emaorivhi echibani kuti chirambe chechibaka nguva dzeshe.

²¹ Mutende romushangano ngokubanze kwejira rechisitiro riri pamberi pebhokisi rechitenderano, Aroni nevakororo vake vanozochingwarira chechibaka pamberi paMambo Mwari kubvira madeekoni metsa mangwani mangwanani. Mupango uyu unozongwarirwa mhera nariini ngevana vaIsuraeri nemibarirwana yavo.