EKISEDHUSI 26 - Bhaibheri Rakachena muChindau

Tende roKuwapo kwaMambo Mwari

¹ “Zve, unozoita tende rine machira okusitira ndiwo gumi remachira akanakisisa, akarukwa ngezvakakoshwa zvakasvipirika nezvakatsvukuruka nezvakatsvuka, anezvipuka zvine maphaphiro, mushando wengwazi.

² Kureba kwejira rimwe ngarimwe kunozoita mamitha gumi namairi, nokupamhama kwejira rimwe ngarimwe kunozoita mamitha mairi: machira eshe anozoita chipimo chimwe.

³ Machira mashanu anozorimbanidzwa rimwe kune rimweni; nemachira amweni mashanu anozorimbanidzwa rimwe kune rimweni.

⁴ Newe unozoita magangiro ngejira rakasvipirika pamupendero wejira rimwe rokupedzisira rokubanze pane akarimbanidzwa ekutanga; ngokudarozve unozoita magangiro pamupendero wejira rokupedzisira rokubanze pane akarimbanidzwa echipiri.

⁵ Unozoita magangiro makumi mashanu pajira rimwe, nemagangiro makumi mashanu pamupendero wejira rokupedzisira rokubanze pane akarimbanidzwa echipiri; magangiro anozoringirana.

⁶ Unozoita zvikoreko zvomukore makumi mashanu nokurimbanidza machira rimwe kune rimweni ngezvikoreko, kuti tende riite rimwe.

⁷ “Newe unozoita machira emamviri embudzi okufukidza padera petende; gumi narimwe.

⁸ Urebu hwejira rimwe ngarimwe hunozoita mamitha gumi namatatu, nokupamhama kwejira rimwe ngarimwe kunozoita mamitha mairi; machira gumi narimwe anozoita chipimo chimwe.

⁹ Unozorimbanidza machira mashanu ega, nemachira matanhatu ega, unozopeta jira rechitanhatu riri pamberi petende.

¹⁰ Unozoita magangiro makumi mashanu pamupendero wejira rimwe rokubanze nemagangiro makumi mashanu pamupendero wejira pane akarimbanidzwa echipiri.

¹¹ “Unozoita zvikoreko makumi mashanu zvethusi nokuisa zvikoreko mumagangiro, urimbanidze tende pamwepo kuti riite rimwe.

¹² Rupande runosara rwejira romutende, rupande rwejira rinosara, rakatikapa sure kwetende.

¹³ Masendimitha makumi mashanu kureba kurutii rumwe ngarumwe zvinosara kuurebu hwemachira etende, inozotikapakapa kumarutii ethabhenakeri, kurutii urwu nokurutii urwo, kurifukidza.

¹⁴ Newe unozoita chifukidziro chetende chematoo akasukutwa emagondohwe, akatsvukiswa, nechifukidziro chematoo ematenhe ngepadera.

Sika dzeThabhenakeri

¹⁵ “Newe unozoita sika dzethabhenakeri ngemiti yehlafunga dzokuemesa.

¹⁶ Urebu hwesika hunozoita mamitha marongomuna nokupamhama kwesika imwe ngaimwe kunozoita masendimitha makumi matanhatu namatanhatu.

¹⁷ Sika imwe ngaimwe inozoitwa manyanga mairi, okudzirimbanidza pamwepo; unozoita kudaro pasika dzeshe.

¹⁸ Unozoita sika dzetende makumi mairi orupande rwokubani.

¹⁹ Newe unozoita zvigadzikiro makumi marongomuna zvesirivha pashi pesika makumi mairi; zvigadzikiro zviiri pashi pesika imwe zvemanyanga mairi, nezvigadzikiro zviiri pashi pesika imweni zvemanyanga ayo mairi;

²⁰ nokurutii rwechipiri rwetende rwedera unozoita sika makumi mairi.

²¹ Anozoa nehoko dzao dziri makumi marongomuna ezvigadzikiro zvadzo zvesirivha, zvigadzikiro zviiri pashi pesika imwe, nemanyanga mairi pashi pesika imweni.

²² Unozoita sika nhanhatu sure kwetende ngokumabirira-zuva.

²³ Unozoita sika mbiri dzepamakhona etende kurupande rwesure.

²⁴ Ngaaite mairi ngepashi, asi akarimbanidzwa padera, panyanga yokutanga; ndizvo zvinozoitwa kwaari eshe; anozoita makhona mairi.

²⁵ Dzinozoapo sika sere, nemanyanga adzo esirivha, manyanga mairi pashi pesika imwe, nemanyanga mairi pashi pesika imweni.

²⁶ “Unozoita mwamba yehlofunga, mwamba mishanu yesika dzorutii rumwe rwetende,

²⁷ nemwamba mishanu yesika dzorutii rwetende nemwamba mishanu yesika dzorutii rumweni rwesure ngokumabirira zuva.

²⁸ Mwamba wepakati uri pakati pesika rinozobva kumagumo kuenda kumagumo.

²⁹ Unozoseta sika ngomukore, nokuita ndandazi dzadzo ngomukore kuita pangagara mwamba; newe unozoseta mwamba ngomukore.

³⁰ Unozodzimika tende kudai ngechionero chakaoniswa kwouri pamutunhu.

³¹ “Unozoita chisitiro chejira rakasvipirika, rakatsvukuruka, rakatsvuka, nejira rakanakisa rakakoshwa; rinozoitwa makherubhi zvine maphaphiro, mushando wengwazi.

³² Unozoriturika padera pesika murongomuna dzehlofunga dzakasetwa ngomukore, zvikoreko zvadzo zviite zvomukore, dziri zvigadzikiro zvirongomuna zvesirivha.

³³ Unozoturika chisitiro pashi pezvikoreko, nokupotedzamwo mukati mwechisitiro bhokisi rechapupu; nejira rechisitiro rinozoparadzanisa kwomuri pakati pendau yakachena neyakapindisisa kuchena.

³⁴ Unozoisa chigaro chenyasha padera pebhokisi rechapupu mundau yakapindisisa kuchena.

³⁵ Unozoisa tafura ngokubanze kwejira rechisitiro, nechigadzikiro chechibani chakaringirana netafura kurutii rwetende rwokubani; unozoisa tafura kurutii rwedera.

³⁶ “Unozoita jira repamusiwo petende, rakarukwa ngezvakasvipira, zvakatsvukuruka, zvakatsvuka, nejira rakanakisisa rakakoshwa, mushando wengwazi.

³⁷ Unozoitira jira repasiwo sika shanu dzemiti yehlofunga, udzisete ngomukore; zvikoreko zvadzo zvinozoita zvomukore, newe unozodziumbira zvigadzikiro zvishanu zvethusi.