EKISEDHUSI 25 - Bhaibheri Rakachena muChindau

Zvipo zveTende roKudirira

¹ Mambo Mwari wakaereketa kunaMosi echiti,

² “Ereketa kune vana vaIsuraeri kuti vanditorere zvipo kubva kunomunhu weshe unomwoyo unotenda.

³ Izvi ndizvo zvipo zvomunozoashira kubva kwavari: mukore, sirivha nethusi,

⁴ machira matema neakatsvukuruka, eharahara, erukangaza rwakanaka neemamviri embudzi,

⁵ matoo emagondohwe akatsvukiswa nematoo emadenhe, nemapuranga ehlafunga,

⁶ mafuta ezvibani, mafuta emaka okudzodza, mutombo une gwema rakanaka wokupisha,

⁷ mapuwe eonikisi, nemapuwe omunemo eefodhi neechihlangu chepaditi.

⁸ Ngavandiitire ndau yakachena, kuti ndigare pakati pavo.

⁹ Kudai ndizvo zveshe zvendakamuonisa, chionero chetende romushongano nechionero chezvidziyo zveshe zvaro, ndizvo munozozviita.

Bhokisi reChitenderano

¹⁰ “Navo vanozoita bhokisi remapuranga ehlofunga; kureba kwaro kunozoita masendimitha zana negumi rimwe, kupamhama nokukwira mudenga masendimitha makumi matanhatu namatanhatu.

¹¹ Unozoriseta ngomukore wakaera, unozoriseta mukati nokubanze, unozonasira padera paro hata yomukore kuritendenedza.

¹² Unozoumba ndandazi murongomuna dzomukore dzaro, udziise mutsoka dzaro murongomuna; ndandazi mbiri dzinozoapo kurutii rumwe rwaro, nendandazi mbiri kurutii rumweni rwaro.

¹³ Unozoita mipingo yehlofunga uisete ngomukore.

¹⁴ Unozoita mipingo mukati mwendandazi dziri pamarutii ebhokisi, kutwara ndiyo bhokisi.

¹⁵ Mipingo inozoramba irimwo mukati mwendandazi dzebhokisi: aizobviswi kweriri.

¹⁶ Unozoisa mubhokisi chitenderano chendinozokupa.

¹⁷ “Zvino unozoita chigaro chenyasha chomukore wakaera; kureba kwacho kunozoita masendimitha zana negumi rimwe nokupamhama kwacho kunozoita masendimitha makumi matanhatu namatanhatu.

¹⁸ Ita makherubhi ane maphaphiro mairi omukore; kumagumo mairi echigaro chenyasha unozoaita ngomukore wakapfurwa.

¹⁹ Ita chipuka chimwe kumagumo amwe, nechipuka chimwe kumagumo amweni; munozoita makherubhi padera pemagumo mairi acho akabatana pamwepo nechigaro chenyasha.

²⁰ Makerubhi ane maphaphiro anozotambanudza maphaphiro awo ngepadera, echitibikira chigaro chenyasha ngemaphaphiro azvo, ane hope dzazvo dzakaringirana; hope dzemakherubhi dzinozoringira kuchigaro chenyasha.

²¹ Unozoisa chigaro chenyasha padera pebhokisi; nomukati mwebhokisi unozoisa chitenderano chendinozokupa.

²² Apapo ndinozoshongana newe, ndierekete newe, ndiri padera pechigaro chenyasha, ndizvo zveshe zvendinozokupa kupanga vana vaIsuraeri, pakati pemakherubhi zviiri zvine maphaphiro mairi zviri padera pebhokisi rechitenderano.

Tafura reZvingwa Zvinopirwa kunaMwari

²³ “Unozoita tafura remapuranga ehlofunga; kureba kwaro kunozoita masendimitha makumi masere namasere, kupamhama kwaro kunozoita, masendimitha makumi marongomuna namarongomuna.

²⁴ Unozoriseta ngomukore wakaera nokuriitira hata yomukore kuritendenedza.

²⁵ Newe unozoriitira gomo kuritendenedza kupamhama kwaro kwakadai ngenyara, unozoita hata yomukore pamagumo aro kuritendenedza.

²⁶ Unozoriitira ndandazi murongomuna dzomukore, uise ndandazi mumakhona marongomuna aro ari patsoka murongomuna dzaro.

²⁷ Ndandazi dzinozoiswa ngepasinde pehata, kuita ndau dzemipingo yokutwara tafura.

²⁸ Unozoita mipingo yomuti wehlofunga, uisete ngomukore, kuitira kuti tafura ritwarwe ndiyo.

²⁹ Newe unozoita ndiro dzaro, nemikheyo yaro, nemajomeya aro, netsani yaro yokudurura ndiyo; munozoiita ngomukore wakaera.

³⁰ Newe unozoisa zvingwa zvokuonisa padera petafura pamberi pangu nguva dzeshe.

Zvigadzikiro zveZvibani

³¹ “Unozoita chigadzikiro chechibani ngomukore wakaera. Chigadzikiro nechibato chinozoitwa ngomukore wakapfurwa, tsani dzacho, chibato chacho nemashakani acho, zvinozoita chiro chimwecho.

³² Anozoapo matai matanhatu anobuda kumarutii acho; matai matatu echigadzikiro chechibani anobuda kurutii rumwe nematai matatu echigadzikiro chechibani anobuda kurutii rumweni.

³³ Zvigadzikiro zvitatu zvakaitwa kudai ngemaarimondi kunhai imwe nefundo neruva nezvigadzikiro zvitatu zvakadai ngemaruva earimondi kunhai imweni nefundo neruva; zvakadaro kumatai matanhatu anobuda kubva pachigadzikiro chechibani.

³⁴ Pachigadzikiro chechibani pachacho, zvigadzikiro zvirongomuna zvakadai ngemaruva earimondi, zvine mafundo nemaruva azvo.

³⁵ Fundo pashi pematai mairi rinozobuda kwechiri, nefundo pashi pematai mairi rinozobuda kwechiri, nefundo pashi pematai mairi anozobuda kwechiri, kumatai matanhatu anozobuda kuchigadzikiro chechibani.

³⁶ Mafundo acho nematai acho anozobuda kwechiri; cheshe chinozoita mushando umwe womukore wakapfurwa wakaera.

³⁷ Newe unozoita zvibani zvacho zvinomwe; navo vanozotungidza zvibani zvacho nokuzvigadzika kuitira kuti zvijekise pandau iri pamberi pacho.

³⁸ Zvibato zvacho nendiro dzacho dzokuisa marota zvinozoita zvomukore wakaera.

³⁹ Zvinozoitwa ngemakhirogiramu makumi matatu nemashanu omukore wakaera, nezvidziyo izvi zveshe.

⁴⁰ Ngwara kuti uzviite ngechionero chazvo chakaoniswa kwouri pamutunhu.