EKISEDHUSI 24 - Bhaibheri Rakachena muChindau

Kugwinyiswa kweChitenderano

¹ Zvino wakati kunaMosi, “Kwira kunaMambo Mwari, iwewe naAroni, Nadhabhi naAbhihu, nevakuru vaIsuraeri makumi manomwe, mudire muri kuretu.

² Mosi ega ndiye unozokwedzera pasinde kunaMambo Mwari; asi vamweni avazokwedzeri pasinde akadi; nevanhu avazokwiri naye.”

³ Mosi wakauya, akaronzera vanhu mazwi eshe aMambo Mwari nezvitongero zveshe; nevanhu veshe vakapingura ngeizwi rimwero, vakati, “Mazwi eshe aakaereketa Mambo Mwari tinozoita.”

⁴ Mosi wakanyora eshe mazwi aMambo Mwari, akafumira mangwanani kuaka arita pashi pomutunhu, nesika gumi nambiri kudai ngouwandu hwemadzinza gumi namairi aIsuraeri.

⁵ Naye wakatuma majaha evana vaIsuraeri akapira midiro yokupisha, akabaira midiro yokuiyanisa yen'ombe kunaMambo Mwari.

⁶ Mosi wakatora rupande rwengazi, akaiisa muzvidziyo; akafafazira rupande rwengazi paarita.

⁷ Zvino wakatora tsamba yechitenderano, akaidzidza mukuzwa kwevanhu; navo vakati, “Zveshe zvaakaereketa Mambo Mwari tinozozviita, techipurutana.”

⁸ Mosi wakatora ngazi, akaifafazira padera pevanhu, akati, “Ringirai ngazi yechitenderano, chaakaita Mambo Mwari nemwi ngaaya mazwi eshe.”

⁹ Zvino Mosi, Aroni, Nadhabhi, Abhihu nevakuru vaIsuraeri makumi manomwe vakakwira,

¹⁰ vakaona Mwari waIsuraeri. Kwaiyapo pashi petsoka dzake kugangatwa kwemapuwe esafire, akaera kudai ngedenga remene.

¹¹ Naye aazi kuisa nyara yake padera pevakuru vaIsuraeri; navo vakaona Mwari, vakadya nokumwa.

Mosi Ari paMutunhu weSinai

¹² Mambo Mwari wakati kunaMosi, “Kwira kwendiri mumutunhu, ugaremwo; neni ndinozokupa marusamba emapuwe nezvironzo nemipango, izvo zvendakanyora, kuti adzidziswe.”

¹³ Mosi wakamiruka naJoshua mushandiri wake, naMosi wakakwira mumutunhu waMwari.

¹⁴ Wakati kuvakuru, “Tigarirei pano, metsa tiuyezve kwomuri; ringirai, Aroni naHuri vanemwi; kunyazwi ndiani une ndaa ngaauye kwavari.”

¹⁵ Zvino Mosi wakakwira mumutunhu, negore rakambonya mutunhu.

¹⁶ Nouthende hwaMambo Mwari hwakagara padera poMutunhu weSinai, negore rakaumbonya mazuva matanhatu; ngezuva rechinomwe wakadaidza Mosi ari mukati mwegore.

¹⁷ Nokuoneka kwouthende hwaMambo Mwari hwaiya hwakadai ngomuriro unopisha padera pomutunhu mukuona kwevana vaIsuraeri.

¹⁸ Mosi wakapotera mukati mwegore, akakwira mumutunhu; naMosi wakagara mumutunhu mazuva makumi marongomuna nousiku makumi marongomuna.