EKISEDHUSI 22 - Bhaibheri Rakachena muChindau

Mipango ngendaa yeKuripa

¹ “Kudai munhu echiba kabi nokuti gwai nokuiuraya nokuti kuitengesa, unozoripa ngekabi shanu pakabi imwe, nemakwai marongomuna pagwai imwe.

² Kudai mbavha ikaoneka yechipwanya, nayo ikachayiwa ikafa, apana ndaa yengazi yayo;

³ kudai zuva rabuda padera payo inozoapo ndaa yengazi yayo. Inozoripa, asi kudai isina chiro, zvino inozotengeswa ngendaa yokuba kwayo.

⁴ Kudai chakabiwa chikaoneka chechizwa munyara mwayo, kunyazwi ikabi nokuti mbongoro nokuti gwai, unozoripa kairi.

⁵ “Kudai munhu echizoita kuti munda nokuti munda wemivhini udyiwe, nokuti kusunhura chifuyo chake, nacho chechidya mumunda woumweni unozoripa ngezvakapinda kunaka zvomunda wake, nezvakapinda kunaka zvomunda wake wemivhini.

⁶ “Kudai muriro wechiambura nokubaka mukati mweminzwa, kuti zvitarahwi zvezviyo, nokuti zviyo zvisati zvachekwa, nokuti munda zvechipishwa, ngegwinyiso uwo wakabasa muriro unozozviripa.

⁷ “Kudai munhu echizopa kuno muakirwana wake mare nokuti zvidziyo kuti angwarire, nazvo zvikabiwa kubva mumhatso yomunhuwo, zvino kudai mbavha iyo yechioneka, inozoripa kairi.

⁸ Kudai mbavha isikaoneki, naapo mune wemhatso unozokwedzera pasinde naMwari, kuonisa kuti wakaisa nokuti aazi kuisa here nyara yake pazvidziyo zvomuakirwana wake.

⁹ Ndaa yeshe yokupauka, kunyazwi yekabi, yembongoro, yegwai, yezvokusimira nokuti yechiro chakarashika, chaanoronza umwe kuti, ‘Ichi ndicho’: ndaa yaavo vairi inozoiswa pamberi paMwari; uwo waanozoitira ndaa Mwari unozoripa kairi kumuakirwana wake.

¹⁰ “Kudai munhu echipa muakirwana wake mbongoro nokuti kabi nokuti gwai nokuti chifuyo chimweni, nacho chechifa nokuti chechiremadzwa nokuti chechipambwa pasina munhu unoona,

¹¹ kupikirana ndiMambo Mwari kunozoa pakati pavo veshe, kuti vaone kuti wakaisa nokuti aazi kuisa here nyara yake pazvifuyo zvomuakirwana wake; natenzi wacho unozoashira mhiko, naye aazoripi akadi.

¹² Asi kudai chechibiwa kubva kwaari unozoripa kunatenzi wacho.

¹³ Kudai chechirumwa ngaachiunze kuita chapupu; aazoripi icho chakarumwa.

¹⁴ “Kudai munhu echikwereta chifuyo chomuakirwana wake, nacho chikaremadzwa nokuti chechifa, tenzi wacho asipo nacho, ngegwinyiso unozochiripa.

¹⁵ Kudai tenzi wacho aripo nacho, aazochiripi; kudai chiri chiro chakatorwa kushandisa chechizobhadharwa ngemare, mubhadharo wacho ndiwo unozoerengwa kwechiri.

Mipango yoKudira neyoUnhu

¹⁶ “Kudai munhu echinyenga mhandwe isikazi kugangiwa ngomunhu nokuatana nayo, ngegwinyiso unozodusa chuma chake kuti aite mukadzi wake.

¹⁷ Kudai baba ake vechiramba yaamho kumupa kwaari, unozoripa mare yakadai ngechuma chemhandwe.

¹⁸ “Usazotendera musaramusi kuti ararame.

¹⁹ “Kunyazwi ndiani unoatana nemhuka ngegwinyiso unozourawa.

²⁰ “Kunyazwi ndiani unopira mubairo kune chimwari chimweni, asi kwega kunaMambo Mwari, unozourawa.

²¹ Usazoshaishira mupara nokuti kuzomutambudza, ngokuti imwimwi mwaiya vapara munyika yeEgipite.

²² Musazotambudza shirikadzi nokuti ngeiri nokuti nherera.

²³ Kudai wechizovatambudza, navo vechichema kwendiri, ngegwinyiso ndinozozwa kuchema kwavo,

²⁴ noushungu hwangu hunozobaka, neni ndinozomuuraya ngeshoti; nevakadzi venyu vanozoita shirikadzi, nevana venyu vanozoita nherera.

²⁵ “Kudai wechikweretesa mare kuno umwe wevanhu vangu vanemwi uwo uri murombo, usazoita kwaari kudai ngouri mukweretesi; newe usazomubvunza kubara kwayo.

²⁶ Kudai wechitora chokufuka chomuakirwana wako kuita chibatiso, nokuti ngouri mukuwo, unozochihwirinza kwaari zuva risati rapota.

²⁷ Ngokuti ndicho chokufuka chake chega, ndicho chokufuka chaanofukidza ndicho muiri wake; ungazoata akafukenyi? Kudai echichema kwendiri, ndinozozwa, ngokuti ndine nyasha.

²⁸ “Usazotuka Mwari, nokuti kutuka mutongi wevanhu vako.

²⁹ Usanonoka kupa zvouwandu hwezviyo zvako nokubva kunezvokumwa zvako. Unozopira kwendiri dangwe kubva pakati pevakororo vako.

³⁰ Unozoita kudaro kabi dzako nemakwai ako; inozogara namai ayo mazuva manomwe; ngezuva rechisere unozoipira kwendiri.

³¹ Nemwi munozoita vanhu vakacheneswa kwendiri; ndizvo musazodya nyama yakarumwa ngezvikara mushango; munozoikandira imbwa.