EKISEDHUSI 21 - Bhaibheri Rakachena muChindau

Kubatwa kweHloko

¹ “Zvino izvi ndizvo zvitongero zvounozoisa pamberi pavo.

² “Kuti ukatenga hloko muHebheru, unozokushandira makore matanhatu, nangegore rechinomwe unozobuda akasunhurika asikadusi chiro.

³ Kudai echiuya ari ega, unozobuda kuenda ari ega; kuti echiuya aroora, zvino mukadzi wake unozobuda kuenda naye.

⁴ Kudai tenzi wake echimupa mukadzi, naye echimubarira vakororo nevanasikana, mukadzi nevana vake vanozoita vatenzi wake, iye unozobuda kuenda ega.

⁵ Asi kudai hloko yechironza pamhene kuti, ‘Ndinomuda tenzi wangu nomukadzi wangu nevana vangu; andizobudi kuenda ngokusunhurika,’

⁶ zvino tenzi wake unozomuunza kunaMwari, naye unozomuunza pamusiwo nokuti pasika dzemusiwo; natenzi wake unozodura nzee yake ngechiro chakapinza; naye unozomushandira kupona kwake kweshe.

⁷ “Naapo munhu akatengesa mwanasikana wake kuita hloko, uwo aazobudi kudai ngezvedzinoita hloko dzevamuna.

⁸ Kudai asikadakadzi tenzi wake, uwo wakamuemesa pachake kuita mukadzi wake, zvino unozomutendera kuti aripirwe; aazokoni kumutengesa kudzinza revapara, ngokuti wakamuchengedzera.

⁹ Nokudai echizomugangisira kuno mukororo wake, unozomubata kudai ngemwanasikana.

¹⁰ Kudai echidzitorera mukadzi umweni, asazomunyima zvokudya kwake, zvokusimira zvake nechinosisira mukuroorwa kwake.

¹¹ Kuti asikaiti izvi zviro zvitatu kwaari, unozobuda kuenda asikadusi chiro, asikabhadhari mare.

Mipango ngendaa yoKuambana

¹² “Kunyazwi ndiani unochaya munhu, akafa, ngegwinyiso unozourawa.

¹³ Asi kuti munhu asikazi kumuhwarira, asi Mwari akamutendera kuti awire munyara mwake, naapo ndinozokuemesera ndau yokuti atiziremwo.

¹⁴ Asi kudai munhu echizoambana nomuakirwana wake ngokuda nokumuuraya ngourimbwi, unozomubvisa paarita rangu kuti afe.

¹⁵ “Kunyazwi ndiani unozochaya baba ake nokuti mai ake, ngegwinyiso unozourawa.

¹⁶ “Kunyazwi ndiani unoba munhu nokumutengesa, nokuti kuoneka ari munyara mwake, ngegwinyiso unozourawa.

¹⁷ “Kunyazwi ndiani unotuka baba ake nokuti mai ake, ngegwinyiso unozourawa.

¹⁸ “Naapo vanhu vechiambana, noumwe akachaya umweni ngebuwe, nokuti ngechibhakera chake, naye akarekera kufa, asi akaata pamubhedhi wake,

¹⁹ zvino kudai munhu echimirukazve nokuhamba kubanze ngomudondoro wake, naapo uwo wakamuchaya unozosunhurika; kwega unozobhadhara mukuwo waasikazi kushanda, nokuita kuti anase kupora.

²⁰ “Naapo munhu echichaya hloko yake, mwamuna nokuti mukadzi ngendonga, nehloko ikafira pashi penyara yake, ngegwinyiso unozoororwa.

²¹ Asi kuti hloko ikapona zuva rimwe nokuti mairi, aazojeziswi; ngokuti uri wemare yake.

²² “Naapo vanhu vechirwa, vorovoremadza mukadzi unemimba, ikabva, asi pasina kuremadzwa kwateera, uwo wamuremadza unozoripiswa, kudai ngezvaanozogura mwamuna womukadzi; naye unozoripa kudai ngezvevanozogura vatongi.

²³ Asi kudai pane kuremadzwa kwateera, naapo unozopa kupona ngendaa yokupona,

²⁴ dziso ngendaa yedziso, zino ngendaa yezino, nyara ngendaa yenyara, rutsoka ngendaa yorutsoka,

²⁵ kupishwa ngendaa yokupisha, bonje ngendaa yebonje, muzvimbo ngendaa yomuzvimbo.

²⁶ “Naapo munhu akachaya dziso rehloko yake, mwamuna nokuti mukadzi, akaritochora; unozotendera hloko kuti iende ngokusunhurika ngendaa yedziso rayo.

²⁷ Kudai echichaya zino rehloko yake, mwamuna nokuti mukadzi, rikabva, unozoitendera kuti iende ngokushunhurika ngendaa yezino rayo.

Mushando weVane Zvifuyo

²⁸ “Kudai kabi yechitunga munhu, murume nokuti mukadzi kuti akafa, kabi inozopondwa ngemapuwe, nenyama yayo aizodyiwi; asi tenzi wekabi unozosunhurika.

²⁹ Asi kudai kabi iyo yaitunga karetu, natenzi wayo wakaronzerwa kudaro, asi aazi kuikonyera, nayo ikauraya munhu, murume nokuti mukadzi, kabi inozopondwa ngemapuwe, natenzi wayo unozourawa.

³⁰ Kudai echiripiswa muripo, zvino unozopa muripo wokupona kwake kunyazwi chiinyi chinoemeserwa kwaari.

³¹ Kunyazwi ikatunga mukororo nokuti mwanasikana womunhu, unozoitirwa kudai ngokugura kwomutemo umwewo.

³² Kudai kabi yechitunga hloko, mwamuna nokuti mukadzi, tenzi wayo unozopa kunaMambo wouwo munhu zvigurwa zvesirivha makumi matatu, nekabi inozopondwa ngemapuwe.

³³ “Naapo munhu akasiya hunza yakabeuka, nokuti kudai munhu echitsa hunza asikaishosheri, nekabi nokuti mbongoro ikawira mukati mwayo,

³⁴ mune wehunza unozoiripa; unozobhadhara mare kunatenzi wayo, neiyo yakafa inozoita yake.

³⁵ “Naapo kabi imwe yomunhu yechiremadza youmweni kuti ikafa, zvino vanozotengesa kabi inozwa, nokukoanisana mutengo wayo; neiyo yakafawo vanozoikoanisana.

³⁶ Nokuti kudai kwaiziikanwa kuti kabi yaitunga karetu, natenzi wayo aazi kuikonyera, unozoripa kabi ngekabi, neyakafa inozoita yake.