EKISEDHUSI 20 - Bhaibheri Rakachena muChindau

Mipango Irigumi

¹ Mwari wakaereketa eshe mazwi aya echiti,

² “Ndini Mambo Mwari, Mwari wako, uwo wakakubudisa kubva munyika yeEgipite, kubva kumhatso youhloko.

³ “Usazoa nezvimwari zvimweni ngepabanze pangu.

⁴ “Usazodziitira muedzaniso wakatsetswa, nokuti muedzaniso womuemo wechiro kunyazwi ngechiri chiri mudenga ngepadera, nokuti wechiri munyika ngepashi, nokuti wechiri mumvura ngepashi penyika.

⁵ Usazoigwadamira nokuti kuishandira; ngokuti inini, Mambo Mwari, Mwari wako, ndiri Mwari une ndurumwa, ndechiunzidzira kushata kwemadzibaba padera pevana, padera pomubarirwana wechitatu nowechirongomuna waavo vanondinyenya,

⁶ asi ndechionisa nyasha kune vari makumi emazana eavo vanondida nokungwarira mipango yangu.

⁷ “Usazoshandisa zina raMambo Mwari, Mwari wako ngenjira isina shwiro; ngokuti Mambo Mwari aazomuerengi kuti aana ndaa uwo unoshandisa zina rake ngenjira isina shwiro.

⁸ “Karakadza zuva reSabatha kuringwarira rakachena.

⁹ Mazuva matanhatu unozoshanda, uite mushando wako weshe.

¹⁰ Asi zuva rechinomwe iSabatha kunaMambo Mwari, Mwari wako; ngeiro zuva usazoita mushando nokuti ngouri, iwewe, nokuti mukororo wako, nokuti mwanasikana wako, muranda wako, nokuti murandakadzi wako, nokuti n'ombe dzako, nokuti mupfumba wako, uri mukati mwemisiwo yako.

¹¹ Ngokuti ngemazuva matanhatu Mambo Mwari wakaita denga nenyika, ruandhle, nazvo zveshe zviri mukati mwazvo, wakazorora ngezuva rechinomwe; ndizvo Mambo Mwari wakaremeredza zuva reSabatha, akarichenesa.

¹² “Remeredza baba ako namai ako, kuti mazuva ako awande munyika yaanokupa Mambo Mwari, Mwari wako.

¹³ “Usazouraya.

¹⁴ “Usazoomba.

¹⁵ “Usazoba.

¹⁶ “Usazoita uchapupu hwokunyepa kumuakirwana wako.

¹⁷ “Usazoemura mhatso yomuakirwana wako; usazoemura mukadzi womuakirwana wako, nokuti muranda wake, nokuti murandakadzi wake, nokuti kabi yake, nokuti mbongoro yake, nokuti chiro kunyazwi ngechiri chomuakirwana wako.”

Kutya kweVanhu

¹⁸ Zvino apo vanhu veshe vakaona kutinhira nemheni nokurira kwegwama, nomutunhu wechipwititika chiushi, vanhu vakatyiswa, vakahuta; vakaema kuretu,

¹⁹ vakati kunaMosi, “Ereketa iwewe kwetiri, nesu tinozozwa; asi usatendera Mwari kuti aerekete kwetiri, kuti tisafa.”

²⁰ Mosi wakati kune vanhu, “Musatya; ngokuti Mwari wauya kumuedza nokuti kutyisa kwake kugare pamberi penyu, kuti musazoshaisha.”

²¹ Vanhu vakaema kuretu, naMosi wakakwedzera kuchidima chikurutu, mwaiya naMwari.

Mipango ngendaa yeArita

²² Mambo Mwari wakati kunaMosi, “Izvi ndizvo zvounozoereketa kune vana vaIsuraeri, ‘Imwimwi mwemene mwakadzionera kuti ndaereketa nemwi ndiri mudenga.

²³ Musazoita zvimwari zvesirivha zviapo neni nokuti kudziitira pachenyu zvimwari zvomukore.

²⁴ Unozondiitira arita remavhu, unozopira padera paro midiro yako yokupisha, nemidiro yako yokuiyanisa, makwai ako, nekabi dzako; kundau dzeshe dzendinozoemesa zina rangu kuti rikarakadzwe ndinozouya kwouri nokukufumisa.

²⁵ Kudai wechizondiitira arita remapuwe, usazoriaka ngemapuwe akatsetswa; ngokuti ukamirudza chokutsetsa ndicho padera paro, warisvipisa.

²⁶ Usazokwira ngemakwiro kuarita rangu, kuti utitinini hwako husazooneka padera paro.’