EKISEDHUSI 2 - Bhaibheri Rakachena muChindau

Kubarwa kwaMosi

¹ Zvino munhu wemhatso yaRevhi wakaenda, akatora mukadzi mukunda wemhatso yaRevhi.

² Mukadzi uwo wakaita mimba, wakabara mukororo; naapo aona kuti waiya mwana wakanaka, wakamufisha mwedzi mitatu.

³ Naapo asikachakoni kumufisha, wakamutorera chitundu chetsanga, akachiseta ngebhitumini nenamo, akaisa mwana mukati mwacho, akachigadzika pakati petsanga pahumbikumbi yorwizi.

⁴ Hanzvadzi yake yakaema ngokuretu, kuti aone chinozoitika kwaari.

⁵ Mwanasikana waFaro wakadzaka kooshamba kurwizi nevasikana vake vakahamba pahumbikumbi yorwizi. Wakaona chitundu pakati petsanga, akatuma murandakadzi wake koochitora.

⁶ Wakachibeura, akaona mwana. Wona, mwana waichema. Naye wakarwadziwa mwoyo ndiye, akati, “Uyu ngoumwe wevana vevaHebheru.”

⁷ Naapo hanzvadzi wake wakati kunomwanasikana waFaro, “Ndiende here ndikudaidzire mureri kubva kuvakadzi vevaHebheru kuti akurerere mwana?”

⁸ Mwanasikana waFaro wakati kwaari, “Enda.” Ndizvo musikana wakaenda akadaidza mai omwana.

⁹ Mwanasikana waFaro wakati kwaari, “Tora mwana uyu undirerere, neni ndinozokupa musharo wako.” Ndizvo mukadzi uwo wakatora mwana, akamurera.

¹⁰ Naapo mwana akura, wakamuunza kuno mwanasikana waFaro, akamuita kudai ngomukororo wake. Wakadudza zina rake kuti Mosi, akati, “Ngokuti ndakamunyura kubva mumvura.”

Mosi Unotizira Midhiani

¹¹ Zuva rimweni apo Mosi akura, wakabuda kuenda kunehama dzake, akaona vechiangiridzwa kuita mishando yavo. Wakaona muEgipite echiponda muHebheru, umwe wehama dzake.

¹² Wakaringira apo naapo, akaona kuti akuna munhu, wakauraya muEgipite, akamufushira mujecha.

¹³ Naapo abudazve ngezuva rechipiri, wakaona, vamuna vairi vevaHebheru vaiambana; naye wakati kuno uwo waiya nendaa, “Unoponda hama yako ngenyi?”

¹⁴ Iye wakati, “Ndiani wakuita mambo nomutongi padera pedu? Unopinimidza ngokuda kundiuraya here, kudai ngezvewakauraya muEgipite?” Mosi wakatya, akapinimidza, “Ngegwinyiso chiro ichi chaziikanwa.”

¹⁵ Naapo Faro azwa ichi, wakatsvaka kuuraya Mosi. Asi Mosi wakatiza kubva mukuona kwaFaro. Wakagara munyika yeMidhiani; naye wakagara pashi pasinde pechinyuka.

¹⁶ Zvino mupristi weMidhiani waiya nevanasikana vanomwe. Vakauya vakachera mvura, vakazadza mabiya ngemvura yokumwisa zvifuyo zvababa avo.

¹⁷ Vaushi vamweni vakauya, vakavadzinga; asi Mosi wakamiruka, akavadetsera, akamwisa zvifuyo zvavo.

¹⁸ Naapo vaguma kunaRueri baba avo, wakati, “Kwaitikenyi mwakasira kuuya nyamashi?”

¹⁹ Vakati, “MuEgipite watinunura kubva kunyara dzevaushi, naye waticherera mvura, akamwisa zvifuyo.”

²⁰ Wakati kuvasikana vake, “Uri pari? Ngenyi mwamusiya munhuwo? Mudaidzenyi kuti adye chingwa.”

²¹ Mosi wakatenda kugara nomunhuwo; naye wakapa Mosi Ziphora mwanasikana wake.

²² Iye wakabara mukororo, akadudza zina rake kuti Gershomu; ngokuti wakati, “Ndakaita chigarandimo munyika yevapara.”

²³ Mumazuva mazhinji apera mambo weEgipite wakafa. VaIsuraeri vakagomera ngendaa youhloko hwavo, navo vakachema kuti vadetserwe, nokuchema kwavo ngendaa youhloko hwavo kwakakwira kunaMwari.

²⁴ Mwari wakazwa kugomera kwavo, naMwari wakakarakadza chitenderano chake naAbrahama, Isaka naJakobe.

²⁵ Mwari wakaona vaIsuraeri, naMwari wakanyera ndivo.