EKISEDHUSI 19 - Bhaibheri Rakachena muChindau

VaIsuraeri paMutunhu weSinai

¹ Ngomwedzi mutsva wechitatu ngesure kwokubuda kwevana vaIsuraeri kubva munyika yeEgipite, ngezuvaro vakaguma mushango reSinai.

² Naapo vabva Refidhimu nokuguma mushango reSinai, vakaemesa matende mushango; naapo vaIsuraeri vakaemesa matende pamberi pomutunhu.

³ Mosi wakakwira kunaMwari, naMambo wakamudaidza ari pamutunhu echiti, “Izvi ndizvo zvounoronza kune vemhatso yaJakobe, uronzere vana vaIsuraeri:

⁴ Mwakaona zvendakaita kuvaEgipite, nenjira yendakamutwara ndiyo pamaphaphiro egodzi, nokumuunza kwendiri.

⁵ Ndizvo zvino kudai mwechizopurutana izwi rangu ngegwinyiso nokungwarira chitenderano changu, naapo munozoita pfuma yangu yemene kwendiri kubva pakati pevanhu veshe, ngokuti nyika yeshe ngeyangu.

⁶ Nemwi munozoita umambo hwevapristi kwendiri nedzinza rakacheneswa. Aya ndiwo mazwi ounozoereketa kunevana vaIsuraeri.”

⁷ Ndizvo Mosi wakauya, akadaidza vakuru vevanhu, akaisa mazwi aya eshe pamberi pavo aakamupanga Mambo Mwari.

⁸ Vanhu veshe vakapingura pamwepo vechiti, “Zveshe zvaakaronza Mambo Mwari tinozozviita.” Mosi wakaronzera Mambo Mwari mazwi evanhu.

⁹ Mambo Mwari wakati kunaMosi, “Ringira, ndinozouya kwouri ndiri mugore rakatimba, kuti vanhu vazwe apo pendinoereketa newe, zve, kuti vakugonde mhera nariini.” NaMosi wakaronzera Mambo Mwari mazwi evanhu.

¹⁰ Mambo Mwari wakati kunaMosi, “Enda kuvanhu, uvachenese nyamashi namangwani. Ngavasuke zvokusimira zvavo,

¹¹ vadzinasirire risati raguma zuva rechitatu, ngokuti ngezuva rechitatu Mambo Mwari unozodzaka padera poMutunhu weSinai mukuona kwevanhu veshe.

¹² Newe unozogurira vanhu migano kutendenedza mutunhu wechiti, ‘Dzingwarirei kuti musazokwira pamutunhu nokuti kugwama bandaanda rawo. Kunyazwi ndiani unozogwama mutunhuwo ngegwinyiso unozourawa.

¹³ Akuna nyara inozomugwama, asi ngegwinyiso iye unozopondwa ngemapuwe nokuti ngokufurwa; kunyazwi mhuka nokuti munhu, aazoponi.’ Apo perinoridzwa gwama mukuwo wakareba, vanozokwedzera kumutunhu.”

¹⁴ Mosi wakadzaka kune vanhu kubva pamutunhu, akachenesa vanhu; navo vakasuka zvokusimira zvavo.

¹⁵ Wakati kune vanhu, “Dzinasirirei risati raguma zuva rechitatu: musazokwedzera pasinde pemukadzi.”

¹⁶ Mangwanani zuva rechitatu apo kwakaapo kutinhira nemheni, negore rakatimba riri padera pomutunhu, nokurira kwegwama kukurutu; vanhu veshe vaiya kumatende vakahuta.

¹⁷ Zvino Mosi wakabudisa vanhu kubanze kwematende kooshongana naMwari; navo vakaema pashi pomutunhu.

¹⁸ NoMutunhu weSinai waiya wechipwititika chiushi weshe, ngokuti Mambo Mwari wakadzaka padera pawo ari mumuriro; nechiushi chakakwira mudenga kudai ngechiushi chepachoto chinobaka aemho, nomutunhu weshe wakazungunyika kakurutu.

¹⁹ Naapo kurira kwegwama kwakakura nokukura, Mosi wakaereketa, naMwari wakamupingura ngokutinhira.

²⁰ Mambo Mwari wakadzaka padera poMutunhu weSinai, kumagumo omutunhu; Mambo Mwari wakadaidza Mosi kukwira kumagumo omutunhu; naMosi wakakwira.

²¹ Mambo Mwari wakati kunaMosi, “Dzaka, upange vanhu kuti vasadarika kuuya kunaMambo Mwari omuringira nevazhinji vavo vafe.

²² Nevapristiwo vanokwedzera kunaMambo Mwari, ngavadzichenese pachavo, kuti Mambo Mwari asazovaparadza.”

²³ Mosi wakati kunaMambo Mwari, “Vanhu avangakwiri kuMutunhu weSinai: ngokuti iwewe pachako wakatipanga, wechiti, ‘Gura migano kutendenedza mutunhu, uuchenese.’ ”

²⁴ Mambo Mwari wakati kwaari, “Enda, udzake; ukwire, iwewe naAroni; asi vapristi nevanhu vasazodarika kukwira kunaMambo Mwari kuti asazovaparadza.”

²⁵ Ndizvo Mosi wakadzaka kune vanhu, akavaronzera.