EKISEDHUSI 17 - Bhaibheri Rakachena muChindau

Mvura Inobva paBuwe

¹ Mbungano yeshe yevana vaIsuraeri yakahamba kubva mushango reSini, ngemihambo yavo kudai ngomupango waMambo Mwari, vakaemesa matende avo muRefidhimu, asi paiya pasina mvura kuti vanhu vamwe.

² Ndizvo vanhu vakaita hasha naMosi, vakati, “Tipe mvura timwe.” Mosi wakati kwavari, “Ngenyi mwechirwisana neni? Ngenyi mwechiedza Mambo Mwari?”

³ Vanhu vakapera ngenyota ngokutama mvura apo; nevanhu vakavhuruvhutira Mosi, vakati, “Wakatikwidzirenyi kubva Egipite kutiuraya nevana vedu nen'ombe dzedu ngenyota?”

⁴ Ndizvo Mosi wakachema kunaMambo Mwari echiti, “Ndinozoitenyi ngevanhu ava? Votoda kundiponda ngemapuwe.”

⁵ Mambo Mwari wakati kunaMosi, “Pinda pamberi pevanhu, utore vamweni vevakuru vaIsuraeri nendonga yowakachaya ndiyo rwizi munyara mwako, uende.

⁶ Ringira, ndinozoema pamberi pako padera pebuwe muHorebhi; newe unozochaya buwe, nemvura inozobuda kubva mukati mwaro, kuti vanhu vamwe.” Mosi wakaita kudaro mukuona kwevakuru vaIsuraeri.

⁷ Wakadudza zina reiyo ndau kuti Masa naMeribha, ngendaa yokurwisa kwevana vaIsuraeri, zve, ngokuti vakaedza Mambo Mwari vechiti, “Mambo Mwari uri pakati pedu here, nokuti apana?”

Hondo nevaAmareki

⁸ Naapo vaAmareki vakauya, vakaambana navaIsuraeri muRefidhimu.

⁹ Mosi wakati kunaJoshua, “Titsanangurire vamuna, ubude uambane navaAmareki; mangwani ndinozoema padera pechimutunhu ndine ndonga yaMwari munyara mwangu.”

¹⁰ Ndizvo Joshua wakaita kudai ngezvaakaronzerwa ndiMosi, wakaambana navaAmareki, Mosi, Aroni naHuri vakakwira padera pechimutunhu.

¹¹ Naapo Mosi wakamirudza nyara dzake, vaIsuraeri vakanyisa; naapo adzasa nyara dzake, vaAmareki vakanyisa.

¹² Asi nyara dzaMosi dzaiya dzoorema; navo vakatora buwe, vakarigadzika pashi pake, wakagara padera paro; Aroni naHuri vakatsimisa nyara dzake, umwe ngorutii rumwe, noumweni ngorutii rumweni; nenyara dzake dzakatsimiswa metsa kupota kwezuva.

¹³ Joshua wakanyisa Amareki navanhu vake ngokupinza kweshoti.

¹⁴ Mambo Mwari wakati kunaMosi, “Nyora ichi mutsamba kuita chikarakadziso, ududzire mukuzwa kwaJoshua: kuti ndinozodzima yaamho kukarakadzwa kwaAmareki kubva pashi pomudenga.”

¹⁵ Mosi wakaaka arita, akadudza zina raro kuti Mambo Mwari Mujeki wangu.

¹⁶ Wakati, “Nyara padera pomujeki waMambo Mwari! Mambo Mwari unozoambana navaAmareki kubvira kumibarirwana kuenda kumibarirwana.”