EKISEDHUSI 16 - Bhaibheri Rakachena muChindau

Mana neZvikware

¹ Vakamiruka kubva Erimu, nembungano yeshe yevana vaIsuraeri vakaguma mushango reSini, iro riri pakati peErimu neSinai, ngezuva regumi namashanu romwedzi wechipiri ngesure kwokubva kwavo munyika yeEgipite.

² Nembungano yeshe yevana vaIsuraeri yakavhuruvhutira Mosi naAroni mushango.

³ Vana vaIsuraeri vakati kwavari, “Zvaiya zvakapinda kunaka kudai taiya takafa ngenyara yaMambo Mwari munyika yeEgipite apo takagara pane hari dzenyama, nokudya chingwa techiguta; ngokuti imwimwi mwakatibudisa kuuya mushango muno kuuraya mbungano iyi yeshe ngenzara.”

⁴ Naapo Mambo Mwari wakati kunaMosi, “Ringira, ndichamunaisira chingwa chinobva mudenga; nevanhu vanozobuda nokuunganidza chikoaniswa chezuva, zuva ngezuva, kuti ndivaedze ndione kuti vanozohamba here muzvironzo zvangu nokuti avazoiti.

⁵ Ngezuva rechitanhatu apo pavanozonasirira izvo zvevanounza, nazvo zvinozoita zvakapetwa kairi kupinda izvo zvevanounganidza zuva ngezuva.”

⁶ Mosi naAroni vakati kuvanhu veshe vaIsuraeri, “Madeekoni munozozia kuti ndiMambo Mwari wakamubudisa kubva munyika yeEgipite.

⁷ Mangwani munozoona uthende hwaMambo Mwari; ngokuti wazwa kuvhuruvhuta kwenyu kwomunomukira ndikwo Mambo Mwari; isusu tiri vanaani kuti mutivhuruvhutire?”

⁸ Mosi wakati, “Izvo zvinozoitika apo Mambo Mwari paanozomupa nyama madeekoni kuti mudye, nemangwanani chingwa, kuti mugute; ngokuti Mambo Mwari wazwa kuvhuruvhuta kwenyu kwomunomuvhuruvhutira ndikwo. Isusu tiri vanaani? Kuvhuruvhuta kwenyu akurwisani nesu, asi kunorwisana naMambo Mwari.”

⁹ Mosi wakati kunaAroni, “Ronzera mbungano yeshe yevana vaIsuraeri, ‘Kwedzerai pasinde pamberi paMambo Mwari; ngokuti wakazwa kuvhuruvhuta kwenyu.’ ”

¹⁰ Naapo Aroni echiereketa kumbungano yeshe yevana vaIsuraeri, vakaringira mushango, ringira, uthende hwaMambo Mwari hwakaoneka mugore.

¹¹ Mambo Mwari wakaereketa naMosi echiti,

¹² “Ndakazwa kuvhuruvhuta kwevana vaIsuraeri. Ereketa kwavari wechiti, ‘Madeekoni munozodya nyama, mangwanani munozogutswa ngechingwa; nemwi munozozia kuti ndini Mambo Mwari, Mwari wenyu.’ ”

¹³ Zvino madeekoni zvikware zvakakwira zvikambonya matende: mangwanani beto rakawa kutendenedza matende.

¹⁴ Naapo beto raiyapo raparara, wona, chaiyapo padera peshango chiro chakatsonga chakaita chimburumbwa, chakatsonga kudai ngechando padera pemavhu.

¹⁵ Naapo vana vaIsuraeri vachiona, vakati umwe kunoumweni, “Ichi chiinyi?” Ngokuti avazi kuzia kuti chiinyi. Mosi wakati kwavari, “Ndicho chingwa chaakamupa Mambo Mwari kuti mudye.

¹⁶ Ichi ndicho chaakamupanga Mambo Mwari, ‘Chiunganidzei munhu weshe kudai ngechinokwana kudya kwake; unganidzai kuzadza chipimo chinozwi oma, chinogutisa munhu, munozochiunganidza kudai ngouwandu hwevanhu venyu. Munhu weshe unozounganidzira avo vari mutende rake.’ ”

¹⁷ Vana vaIsuraeri vakaita kudaro, vakaunganidza, vamweni zvakapinda kuwanda, nevamweni zvishomani.

¹⁸ Naapo vakachipima ngechipimo chinozwi oma, uwo wakaunganidza zvakawanda, aazi kuane chakasara, nouwo wakaunganidza zvishomani aazi kutama; vakaunganidza munhu weshe kudai ngokudya kwake.

¹⁹ Mosi wakati kwavari, “Apana munhu unochisiya metsa mangwanani.”

²⁰ Kunyazwi zvakanyadaro avazi kupurutana kunaMosi asi vamweni vavo vakasiya metsa mangwanani, nacho chakaita honye, chakanuhwa; naMosi wakavatsenekera.

²¹ Vaizviunganidza mangwanani eshe munhu weshe kudai ngokudya kwake; naapo zuva ropisha zvakanyunguruka.

²² Ngezuva rechitanhatu vakaunganidza chingwa chaikwana kairi, zvipimo zviiri zvinozwi oma pamunhu weshe; nevatongi veshe vembungano vakauya, vakamuronzera Mosi.

²³ Wakati kwavari, “Izvi ndizvo zvaakaronza Mambo Mwari, ‘Mangwani izuva rokuzorora, iSabatha rakachena kunaMambo Mwari; kangai izvo zvomunozokanga, mubike izvo zvomunozobika; nazvo zveshe zvinosara, muzvingwarire metsa mangwanani.’ ”

²⁴ Ndizvo vakazvingwarira metsa mangwanani, kudai ngezvaakavapanga Mosi, nazvo azvizi kunuhwa, zve, azvizi kuita honye mukati mwazvo.

²⁵ Mosi wakati, “Idyai izvozvo nyamashi, ngokuti nyamashi iSabatha kunaMambo Mwari; nyamashi amuzozvioni mushango.

²⁶ Munozozviunganidza mazuva matanhatu; asi zuva rechinomwe Isabatha, ngeiro azvizoapo.”

²⁷ Zvino ngezuva rechinomwe vanhu vamweni vakabuda koozviunganidza, navo avazi kuona nachimwe.

²⁸ Mambo Mwari wakati kunaMosi, “Munozoramba kungwarira mitemo yangu nemipango yangu mukuwo wakaitawani?

²⁹ Wonai! Mambo Mwari wamupa Sabatha, ndizvo ngezuva rechitanhatu unomupa zvingwa zvemazuva mairi; garai munhu weshe muugaro hwake, apana munhu unobuda kubva kuugaro hwake ngezuva rechinomwe.”

³⁰ Ndizvo vanhu vakazorora ngezuva rechinomwe.

³¹ Vemhatso yaIsuraeri vakadudza zina razvo kuti mana; nazvo zvaiya zvakadai ngembeu dzekhorianda, zvakachena, nokurairika kwacho kwaiya kwakadai ngezvingwa zvakanywa ngouchi.

³² Mosi wakati, “Ichi ndicho chaakapanga Mambo Mwari: ‘Chipimo cheoma chakazara ndicho ngachingwaririrwe mibarirwana yenyu, kuitira kuti vaone chingwa chendakamupa kuti mudye muri mushango, apo pendakamubudisa kubva munyika yeEgipite.’ ”

³³ Mosi wakati kunaAroni, “Tora hari, uisemwo chipimo cheoma chakazara ngemana, uigadzike pamberi paMambo Mwari, kuti ingwaririrwe mibarirwana yenyu.”

³⁴ Kudai ngezvaakapanga Mambo Mwari kunaMosi, ngokudaro Aroni wakaigadzika pamberi pechapupu, kuti ingwarirwe.

³⁵ Vana vaIsuraeri vakadya mana makore makumi marongomuna, metsa vakaguma kunyika yaigarwa ngevanhu; vakadya mana metsa vakaguma pamugano wenyika yeKhenani.

³⁶ Zvino chipimo chinozwi oma chiri rupande rwechegumi rweefa.