EKISEDHUSI 15 - Bhaibheri Rakachena muChindau

Ruyo rwaMosi

¹ Zvino Mosi navana vaIsuraeri vakaemba iyi nduyo kunaMambo Mwari vechiti, “Ndinozoembera Mambo Mwari, ngokuti wakanyisa ngenjira inouthende: wakakandira hachi nomugadhi waro muruandhle.

² Mambo Mwari ndiro simba rangu, nengoma yangu, naye waita ruponeso rwangu; uyu ndiye Mwari wangu, neni ndinozomuirikidza; Mwari wababa angu, ndinozomukudza.

³ Mambo Mwari ingwazi yokurwa; Mambo Mwari ndiro zina rake.

⁴ Wakakandira muruandhle ngoro dzaFaro nehondo yake; nenduna dzake dzakatsanangurwa dzakanzvaidzwa muRuandhle Rwakatsvuka.

⁵ Mvura yakadzama yakavambonya; vakanzvaira muudzamu kudai ngebuwe.

⁶ Nyara yenyu yokumudyo, A Mambo Mwari, inokudzwa ngesimba, nyara yenyu yokumudyo, A Mambo Mwari, inoputsa magaa kuita zvigurwa.

⁷ Muukuru hwoumambo hwako unovaparadza vanokumukira; unotumira ushungu hwako, hunovapisha kudai ngemazungu.

⁸ Ngokufuridza kwemiro dzenyu mvura yakaturikidzwa, ndambi dzakaema kuita murwi; mvura yakadzama yakakora mumwoyo mworuandhle.

⁹ Gaa rakati, ‘Ndinozoteera, ndinozovabata, ndinozokoanisa zvakapambiwa; kuemura kwangu kunozogutswa ndivo. Ndinozoshwamura shoti yangu, nyara yangu inozovaparadza.’

¹⁰ Mwakafuridza ngedutu renyu, ruandhle rwakavambonya; vakanzvaira kudai ngemuthovhi mumvura ine simba.

¹¹ Ndiani wakadai ndimwi, A Mambo Mwari, pakati pezvimwari? Ndiani wakadai ndimwi, unouthende mukuchena, unokutyisa mukuirikidzwa, unoita mishamiso?

¹² Imwimwi mwakatambanudza nyara yenyu yokumudyo, nyika yakavamedza.

¹³ Imwimwi ngenyasha dzenyu mwakatungamirira vanhu venyu vomwakaripira: mwakavatungamirira ngesimba kuenda kuugaro hwenyu hwakachena.

¹⁴ Vanhu vazwa, vanohuta; maharura avabata vanogara Firistia.

¹⁵ Zvino madzimambo veEdhomu vashamiswa; ngwazi dzeMoabhi dzinobatwa ngokuhuta; veshe vagari veKhenani vanyunguruka.

¹⁶ Kutyisa nemaharura zvawira padera pavo; ngendaa youkuru hwomuoko wako avatsukunuki kudai ngebuwe, metsa vaambuka vanhu venyu, A Mambo Mwari, metsa vanhu vaambuka avo vomwakatenga.

¹⁷ Munozovapotedza nokuvadzimika pamutunhu wenhaka yenyu, paugaro, A Mambo Mwari, wemwakadziitira kugaramwo, pandau yakachena, A Mambo Mwari, yemwakaemesa ngenyara dzenyu.

¹⁸ Mambo Mwari unozotonga mhera nariini nariini.”

Ngoma yaMiriamu

¹⁹ Naapo mahachi aFaro pamwepo nengoro nevagadhi vake vemahachi vakapotera muruandhle, Mambo Mwari wakapetudza mvura yoruandhle padera pavo; asi vana vaIsuraeri vakahamba pamavhu akaoma pakati poruandhle.

²⁰ Miriamu muprofeti womukadzi hanzvadzi yaAroni yakatora chigubhu munyara yake; nevakadzi veshe vakamuteera vane zvigubhu vechizvina.

²¹ Miriamu wakavaembera echiti, “Emberai Mambo Mwari, ngokuti iye wakanyisa ngenjira inouthende; hachi nomugadhi waro wazvikandira muruandhle.”

Mvura Inovava

²² Zvino Mosi wakatungamirira Isuraeri kuenda mberi kubva kuRuandhle Rwakatsvuka, navo vakapinda mushango reShuri; vakahamba mazuva matatu mushango, navo avazi kuona mvura.

²³ Naapo vaguma Mara, avazi kukona kumwa mvura yepaMara, ngokuti yaivava; ndizvo zina rayo rakadudzwa kuti Mara.

²⁴ Vanhu vakavhuruvhutira Mosi vechiti, “Tinozomwenyi?”

²⁵ Iye wakachema kunaMambo Mwari; naMambo Mwari wakamuonisa muti, wakaukandira mumvura, nemvura yakapinduka kuita inotapira. Apo wakavaitira chiemeso nomutemo, naapo wakavaedza

²⁶ echiti, “Kudai mwechizogwinyisira kupurutana izwi raMambo Mwari, Mwari wenyu, nokuita izvo zvakarurama mukuona kwake, mwechipurutana mipango yake nokungwarira zviemeso zvake zveshe, andizoisi naimwe yeidzi nhenda padera penyu, dzendakaisa padera pevaEgipite; ngokuti ndini Mambo Mwari uwo unomuponesa.”

²⁷ Vakaguma Erimu, apo paiya nezvinyuka zvemvura gumi nazviiri, nemichindwi makumi manomwe; vakaemesa matende apo pasinde pemvura.