EKISEDHUSI 14 - Bhaibheri Rakachena muChindau

Kuambuka Ruandhle Rwakatsvuka

¹ Mambo Mwari wakaereketa kunaMosi echiti,

² “Ronzera vana vaIsuraeri kuti vapetuke nokuemesa matende pamberi pePihahirothi, pakati peMigidhori noruandhle, pamberi peBhaari-zefoni; munozoemesa matende ngeparuandhle mwakaringirana narwo.

³ Faro unozoti ngevana vaIsuraeri, ‘Vakodyaniswa munyika; shango rakavakonyera mukati.’

⁴ Neni ndinozokonzesa mwoyo waFaro, naye unozovateera; inini ndicharemeredzwa padera paFaro nepehondo yake yeshe; nevaEgipite vanozozia kuti ndini Mambo Mwari.” Vakaita kudaro.

⁵ Naapo pakaronzerwa mambo weEgipite kuti vanhu vatiza, nomwoyo waFaro nowenduna dzake yakatsandukira vanhu, vakati, “Chiinyi ichi chetakaita, takatendera Isuraeri kuti aende kubva mukutishandira?”

⁶ Wakanasirira ngoro yake, wakatora hondo yake naye;

⁷ vakatora ngoro dziri mazana matanhatu (600) dzakatsanangurwa, nengoro dzeshe dzeEgipite, nenduna dzakaemeswa padera padzo dzeshe.

⁸ Mambo Mwari wakakonzesa mwoyo waFaro mambo weEgipite, naye wakarumbirira vana vaIsuraeri, ngokuti vana vaIsuraeri vakabuda kuenda ngenyara yakamirudzwa.

⁹ VaEgipite vakavarumbirira, eshe mahachi nengoro dzaFaro, nevagadhi vake vemahachi nehondo yake, vakavabata vari mumatende paruandhle, ngepamberi pePihahirothi, pamberi peBhaari-zefoni.

¹⁰ Apo Faro akwedzera, vana vaIsuraeri vakamirudza madziso avo, vakaona, vaEgipite vakafora ngesure kwavo; navo vakatya kakurutu. Vana vaIsuraeri vakadaidzira kunaMambo Mwari,

¹¹ navo vakati kunaMosi, “Ngokuti kwaiya kusina maiba here muEgipite zvowakatitora kuti tifire mushango? Ngenyi wakaita kudaro kwetiri, kutiunza kubva muEgipite?

¹² Andiro izwi retakaereketa kwouri here tiri muEgipite techiti, ‘Tirekere kuti tishandire vaEgipite? Ngokuti kwaipinda kunaka kwetiri kuti tishandire vaEgipite, kuno kuti tifire mushango.’ ”

¹³ Mosi wakati kunevanhu, “Musatya. Emai, muone ruponeso rwaMambo Mwari, rwaanozomuitira nyamashi; ngokuti vaEgipite vomunoona nyamashi, amuchazovaonizve nariini.

¹⁴ Mambo Mwari unozomurwira, nemwi munozonyarara.”

¹⁵ Mambo Mwari wakati kunaMosi, “Ngenyi wechindichemera? Ronzera vana vaIsuraeri kuti vaende mberi.

¹⁶ Mirudza ndonga yako, utambanudze nyara yako padera poruandhle, urigure ngepakati; nevana vaIsuraeri vanozohamba pakati poruandhle padera pemavhu akaoma.

¹⁷ Neni ndinozokonzesa mwoyo yevaEgipite, navo vanozopoteremwo kuvateera: ndinozoremeredzwa padera paFaro nepehondo yake yeshe, nepengoro dzake nepevagadhi vake vemahachi.

¹⁸ VaEgipite vanozozia kuti inini ndini Mambo Mwari, apo pendinozokudzwa padera paFaro nepengoro dzake nepevagadhi vake vemahachi.”

¹⁹ Ngirosi yaMwari yaihamba pamberi pehondo yevaIsuraeri yakabveyo ikaenda ngesure kwavo; nesika yemvumi yakabva pamberi pavo, ikaema sure kwavo,

²⁰ ikauya pakati pehondo yevaEgipite neyevaIsuraeri. Usiku hweshe gore rakapa kujeka kuvaIsuraeri, asi rakaita chidima kuvaEgipite; avazi kukwedzera vamweni kunevamweni usiku hweshe.

²¹ Zvino Mosi wakatambanudza nyara yake padera poruandhle, naMambo Mwari wakaita kuti ruandhle rupetuke sure ngedutu rinesimba rokumabvazuva usiku hweshe, wakaita kuti ruandhle ruite mavhu akaoma, nemvura yakaparadzaniswa.

²² Vana vaIsuraeri vakahamba pakati poruandhle padera pemavhu akaoma, nemvura yakaita rukumbati kwavari kunyara yokumudyo kwavo neyokumuoshwe kwavo.

²³ VaEgipite vakavarumbirira, vakapotera ngesure kwavo pakati poruandhle, zveshe mahachi aFaro nengoro dzake nevagadhi vake vemahachi.

²⁴ Naapo ngomukuwo womurindo wemangwanani kuti Mambo Mwari wakaringira padera pehondo yevaEgipite ari mumurazvu womuriro nomumvumi yegore, akakarudza hondo yevaEgipite.

²⁵ Wakanzvaidza mavhiri engoro dzavo, akadziita kuti dzihambe ngokuremerwa; ndizvo vaEgipite vakati, “Ngatitize kubva kuhope dzevaIsuraeri; ngokuti Mambo Mwari unovarwira kurwisana nevaEgipite.”

²⁶ Mambo Mwari wakati kunaMosi, “Tambanudza nyara yako padera poruandhle kuitira kuti mvura iuyezve padera pevaEgipite, pengoro dzavo nepevagadhi vavo vemahachi.”

²⁷ Ndizvo Mosi wakatambanudza nyara yake padera poruandhle, noruandhle rwakahwirira kuerera perwaiya apo kwoita mangwanani; nevaEgipite vakatizira mukati mwarwo; Mambo Mwari wakazuwira vaEgipite pakati poruandhle.

²⁸ Nemvura yakahwirira ikambonya ngoro, vagadhi vemahachi, nehondo yeshe yaFaro iyo yakapotera ngesure kwavo muruandhle; akuzi kusara naumwe wavo.

²⁹ Asi vana vaIsuraeri vakahamba pamavhu akaoma pakati poruandhle, nemvura yakaita rukumbati kwavari ngokumudyo kwavo nokumuoshwe kwavo.

³⁰ Ngokudaro Mambo Mwari wakaponesa Isuraeri ngeiro zuva kubva kunyara yevaEgipite; navaIsuraeri vakaona vaEgipite vafa pahumbikumbi yoruandhle.

³¹ VaIsuraeri vakaona mushando mukuru waakaita Mambo Mwari padera pevaEgipite, nevanhu vakatya Mambo Mwari; navo vakagonda Mambo Mwari nomuranda wake Mosi.