EKISEDHUSI 13 - Bhaibheri Rakachena muChindau

Kucheneswa kweMatangwe

¹ Mambo Mwari wakaereketa kunaMosi echiti,

² “Ndichenesere matangwe eshe evamuna, anotanga kubeura ndani pakati pevana vaIsuraeri, eshe evanhu, neemhuka, ngaangu.”

Dhiri reChingwa Chisina Mumera

³ Mosi wakati kuvanhu, “Karakadzai iri zuva romwakabuda ndiro kubva Egipite, kubva kumhatso youranda; ngokuti Mambo Mwari wakamubudisa kubva kundau iyi ngenyara ine simba; akuzodyiwi chingwa chinomumera.

⁴ Nyamashi munobuda, ngomwedzi unozwi Abhibhi.

⁵ Naapo Mambo Mwari paanomupotedza munyika yevaKhenani, yevaHiti, yevaAmori, yevaHivhi neyevaJebhusi, yaakapika ndiyo kune madzibaba ako kumupa, nyika inoerera mukaka nouchi, munozoita iri dhiri ngomwedzi uyu.

⁶ Munozodya chingwa chisina mumera mazuva manomwe, ngezuva rechinomwe kunozoita dhiri kunaMambo Mwari.

⁷ Chingwa chisina mumera chinozodyiwa mazuva manomwe; chisazoapo nemwi chingwa chinomumera, mumera usazooneka uripo nemwi mukati mwenyika yenyu yeshe.

⁸ Newe unozoronzera mukororo wako ngeiro zuva wechiti, ‘Zvinoitwa ngendaa yeizvo zvaakandiitira Mambo Mwari apo ndakabuda kubva muEgipite.’

⁹ Chinozoita chioniso kwouri padera penyara yako, nokuita mukarakadziso pakati pemadziso ako, kuti mipango yaMambo Mwari iwepo pamuromo pako; ngokuti Mambo Mwari wakakubudisa kubva muEgipite ngenyara ine simba.

¹⁰ Ndizvo unozongwarira ichi chiemeso ngezuva racho gore ngegore.

Matangwe

¹¹ “Naapo Mambo Mwari paanokupotedza munyika yeKhenani, kudai ngezvaakapika kwouri nokune madzibaba ako, kuipa kwouri.

¹² Unozoemesera Mambo Mwari eshe anotanga kubeura ndani. Matangwe eshe ounawo anobva kuzvifuyo; mikono inozoita yaMambo Mwari.

¹³ Matangwe eshe embongoro unozoaripira ngegwai; nokudai usikazoiripiri, unozogura mutsipa wayo; nematangwe eshe evanhu pakati pevakororo vako unozoaripira.

¹⁴ Naapo mukororo wako paanokubvunza ngenguva inozouya echiti, ‘Chinoronzenyi ichi?’ Unozoti kwaari, ‘Ngenyara ine simba Mambo Mwari wakatibudisa kubva Egipite, kubva kumhatso youranda.

¹⁵ Naapo Faro paakada kuramba kutitendera kuti tiende, Mambo Mwari wakauraya eshe matangwe munyika yeEgipite, matangwe evanhu neezvifuyo; ndizvo ndinopira kuita mudiro kunaMambo Mwari eshe anotanga kubeura ndani, ari mikono; asi ndinoripira eshe matangwe evakororo vangu.’

¹⁶ Ichi chinozoita chioniso padera penyara yako, nokuita mundanyara pahuma yako; ngokuti ngenyara ine simba Mambo Mwari wakatibudisa kubva muEgipite.”

Mvumi yeGore noMurazvu woMuriro

¹⁷ Naapo Faro atendera vanhu kuti vaende, Mwari aazi kuvatungamirira ngenjira yenyika yevaFiristia, kunyazwi yaiya pasinde; ngokuti Mwari wakati, “Pamweni vanhu vanozodzishoora apo voona hondo, vahwirire Egipite.”

¹⁸ Asi Mwari wakatungamirira vanhu kutenderera ngenjira, yomushango ngepaRuandhle Rwakatsvuka. Vana vaIsuraeri vakakwira, vakapakatira zvokurwa hondo vechibva kunyika yeEgipite.

¹⁹ Mosi wakatora magodo aJosefa kuenda nawo; ngokuti Josefa waiya apikisa vana vaIsuraeri echiti, “Ngegwinyiso Mwari unozomuhambira; nemwi munozotwara magodo angu kukwira nawo kubva pano.”

²⁰ Vakahamba rwendo rwavo kubva Sukothi, vakaemesa matende avo muEthamu, kumhiri kweshango.

²¹ Mambo Mwari wakahamba pamberi pavo masikati ngemvumi yegore, kuvatungamirira munjira; nousiku ari mumurazvu womuriro, kuvajekisira, kuti vahambe masikati nousiku.

²² Mvumi yegore masikati nomurazvu womuriro usiku azvizi kubva pamberi pevanhu.