EKISEDHUSI 12 - Bhaibheri Rakachena muChindau

Phasika

¹ Mambo Mwari wakaereketa kunaMosi naAroni vari munyika yeEgipite echiti,

² “Mwedzi uyu unozoita kwomuri kutanga kwemwedzi; unozoita mwedzi wokutanga wegore kwomuri.

³ Ronzerai mushongano weshe wevaIsuraeri mwechiti, ‘Ngezuva regumi romwedzi uyu vanozodzitorera munhu weshe kagwai, kudai ngouwandu hwemhatso dzemadzibaba avo, kagwai kamwe kumhatso imwe.’

⁴ Kudai vemhatso vakanyanya kutsonga, vasikakoni kupedza kagwai, vanozobatana nomuakirwana wayo unogara pasinde pavo; vanozotora kamwe kudai ngezvevanokona kudya umwe ngaumwe, vanozogurirana zvimakwai zvavo ngokudaro.

⁵ Kagwai kenyu kanozoita kasina kuremara, gondohwe rine gore rimwe; munozoritora kubva pamakwai nokuti kubva pambudzi.

⁶ Munozoringwarira metsa zuva regumi namarongomuna omwedziwo; nembungano yeshe yevaIsuraeri vanozoriuraya madeekoni.

⁷ Vanozotora imweni yengazi nokuiisa padera pemadziro mairi epamusiwo nepadera pemusiwo wemhatso mwevanozoadyira.

⁸ Vanozodya nyama ngousikuhwo, yakakochwa ngomuriro, nechingwa chisina mumera; vanozoidya pamwepo nemiriwo inovava.

⁹ Musazoidya iri mbishi nokuti yakabikwa ngemvura, asi yakakochwa ngomuriro; soro rayo pamwepo nemirenje yayo nezvomukati mwayo.

¹⁰ Musazosiya nachimwe chayo metsa nechimangwani; cheshe chinosara metsa mangwani, munozochipisha ngomuriro.

¹¹ Ngenjira iyi munozoridya: zviunu zvenyu zvakasungwa, magwada enyu ari mutsoka dzenyu, nemidondoro yenyu munyara dzenyu; nemwi munozoidya ngokukasira. Ndiro phasika raMambo Mwari.

¹² Ngokuti ndichahamba pakati penyika yeEgipite ngouhwo usiku, ndichauraya matangwe eshe omunyika yeEgipite, eshe evanhu neemhuka; neni ndinozotonga zvimwari zveshe zveEgipite. Ndini Mambo Mwari.

¹³ Ngazi inozoita chioniso kwomuri pamhatso pomunogara; naapo pendinozoona ngazi, ndinozomudarika, nedambudziko arizowiri padera penyu kumuparadza, apo pendinozoparadza nyika yeEgipite.

¹⁴ Nezuva iri rinozoita mukarakadziso kwomuri, nemwi munozoringwarira kuita dhiri kunaMambo Mwari; kumibarirwana yenyu yeshe munozoringwarira kuita mutemo mhera nariini.

Dhiri reChingwa Chisina Mumera

¹⁵ “Munozodya chingwa chisina mumera mazuva manomwe; ngezuva rokutanga munozobvisa mumera kubva kumhatso dzenyu: ngokuti uwo unozodya chingwa chino mumera kubvira pazuva rokutanga metsa kuguma pazuva rechinomwe, uwo munhu unozogurwa kubva kuvana vaIsuraeri.

¹⁶ Ngezuva rokutanga munozoita mushongano wakacheneswa, ngezuva rechinomwe munozoitazve mushongano wakacheneswa; akuna mushando unozoitwa pamazuva aya, asi uwo wokunasirira kuti mudye; ndiwo wega ungazoitwa ndimwi.

¹⁷ Nemwi munozongwarira dhiri rechingwa chisina mumera, ngokuti ngezuva ririro ndakabudisa hondo dzenyu kubva kunyika yeEgipite; munozoringwarira zuva iri kumibarirwana yenyu yeshe, kuita mutemo mhera nariini.

¹⁸ Mumwedzi wokutanga, ngezuva regumi nemarongomuna romwedziwo madeekoni, munozodya chingwa chisina mumera metsa kuzuva remakumi mairi narimwe romwedziwo madeekoni.

¹⁹ Usazoapo mumera mumhatso dzenyu metsa apera mazuva manomwe: ngokuti uwo unozodya icho chinomumera, uwo munhu unozogurwa kubva mumushongano wevaIsuraeri, kunyazwi muhambi nokuti uwo wakabarirwa munyika.

²⁰ Musazodya chiro chino mumera; muugaro hwenyu hweshe munozodya chingwa chisina mumera.”

Phasika roKutanga

²¹ Zvino Mosi wakadaidza vakuru veshe vaIsuraeri, akati kwavari, “Budai, mutsanangure makwai enyu kudai ngouwandu hwemhuri dzenyu, muurayire gwai rephasika.

²² Munozotora hombori yehisopi, muinyike mungazi iri muchidziyo nokupazaira ngengazi iri muchidziyo padera pamusiwo pamadziro mairi epamusiwo, akuna naumwe wenyu unozobuda pamusiwo wemhatso yake metsa kuedze.

²³ Ngokuti Mambo Mwari unozohamba ngepakati kuuraya vaEgipite; naapo paanozoona ngazi iri pamusiwo nepamadziro mairi, Mambo Mwari unozodarika musiwo, aazotenderi muurayi kuti apotere kumhatso yenyu kumuuraya.

²⁴ Nemwi munozongwarira ichi chiro kuita mutemo kwomuri nokune vakororo venyu mhera nariini.

²⁵ Naapo mwaguma kunyika yaanozomupa Mambo Mwari, kudai ngezvaakagondisa, munozongwarira mushando uyu.

²⁶ Naapo vana venyu vechizoti kwomuri, ‘Biningidzo rouyu mushando chiinyi?’

²⁷ Munozoti, ‘Mudiro wephasika raMambo Mwari, uwo wakadarika kusiya mhatso dzevana vaIsuraeri muEgipite, apo paakauraya vaEgipite, akaponesa mhatso dzedu.’ ” Nevanhu vakakotamisa masoro avo, vakadira.

²⁸ Vana vaIsuraeri vakaenda, vakaita kudaro. Kudai ngezvaakapanga Mambo Mwari kunaMosi naAroni, ndizvo zvevakaita.

Rufu rweMatangwe

²⁹ Zvino pakati pousiku Mambo Mwari wakauraya eshe matangwe omunyika yeEgipite, kubvira kudangwe raFaro waigara pachigaro chake choumambo, kuguma kudangwe romusungwa waiya mutirongo, nematangwe eshe ezvifuyo.

³⁰ Faro wakamiruka usiku, iye nenduna dzake dzeshe nevaEgipite veshe; kwaiyapo kuchema kukurutu muEgipite; ngokuti kwaiya kusina mhatso isina umwe wakafa.

³¹ Naye wakadaidza Mosi naAroni usiku, akati, “Mirukai, budai mubve pakati pevanhu vangu, mweshe imwimwi nevana vaIsuraeri; muende, mumudire Mambo Mwari kudai ngezvemwakaronza.

³² Torai zveshe, mitanga yenyu, nemihlambi yenyu, kudai ngezvemwakaronza, muende. Mundifumisewo!”

³³ NevaEgipite vakaangiridza vanhu, kuvabudisa kubva munyika ngokukasira; ngokuti vakati, “Teshe taavanhu vakafa.”

³⁴ Vanhu vakatora hlama yavo isati yafema, zvidziyo zvavo zvokukanyira zvaisungwa mumachira avo padera pemapfudzi avo.

³⁵ Vana vaIsuraeri vakaita kudai ngeizwi raMosi; vakakumbira kunevaEgipite zvinemeso zvesirivha, nezvinemeso zvomukore nezvokusimira.

³⁶ Mambo Mwari wakavaitira nyasha kuti vanhu vadiwe mukuona kwevaEgipite, ndizvo vakavatendera kuti vapuwe zvevakakumbira. Navo vakapedzera vaEgipite.

VaIsuraeri Vanobuda kubva muNyika yeEgipite

³⁷ Vana vaIsuraeri vakahamba kubva Ramesesi kuenda Sukothi, vaida kuguma mazana matanhatu emakumi emazana (600,000) kuwanda vamuna vaihamba ngetsoka, vasikaerengi vakadzi nevana.

³⁸ Nechiunga chevanhu vakakumana chakakwirawo navo, makwai n'ombe nezifuyo zvakawanda kakurutu.

³⁹ Navo vakabika zvingwa zvisina mumera zvehlama yevakaunza kubva Egipite, ngokuti yaiya isikazi kuiswa mumera; ngokuti vakadzingwa ngokukasira kubva muEgipite, vaiya vasikachakoni kuema nokuti kudzinasirira zvokudya.

⁴⁰ Zvino mukuwo uwo vana vaIsuraeri wevakagara muEgipite waiya makore mazana marongomuna nemakumi matatu (430).

⁴¹ Pakupera kwemakore mazana marongomuna nemakumi matatu (430), ngezuva ririro hondo dzeshe dzaMambo Mwari dzakabuda kubva munyika yeEgipite.

⁴² Ndihwo usiku uhwo Mambo Mwari hwaakagara akarindira kuvabudisa kubva munyika yeEgipite: ndihwo usiku uhu hwaMambo Mwari hunosisira kungwarirwa kakurutu ndivo vana vaIsuraeri veshe nemibarirwana yavo yeshe.

Mipango ngendaa yePhasika

⁴³ Mambo Mwari wakati kunaMosi naAroni, “Ichi ndicho chiemeso chephasika: akuna mupara unozoridya.

⁴⁴ Asi hloko yeshe yakatengwa ngemare ingaridya kuti mwaicheka.

⁴⁵ Munhu mupara nomuranda wakatengwa ngemare avazoridyi.

⁴⁶ Rinozodyiwa mumhatso imweyo; auzobudisi imweni yenyama yaro kubva kumhatsoyo; nemwi, amuzoguri godo raro.

⁴⁷ Mbungano yeshe yevaIsuraeri inozoringwarira.

⁴⁸ Apo mupara panozogara nemwi, echida kungwarira phasika kunaMambo Mwari, vamuna veshe ngavachekwe, naapo ngaakwedzere, aringwarire; naye unozodai ngouwo wakabarwa munyikemwo. Asi akuna munhu usikazi kuchekwa unozoridya.

⁴⁹ Kuchaapo nechironzo chimwecho chinozobata unobarwa munyikemwo nomupara unogara pakati penyu.”

⁵⁰ Ndizvo vakaita kudaro veshe vana vaIsuraeri; kudai ngezvaakapanga Mambo Mwari kunaMosi naAroni, ndizvo zvevakaita.

⁵¹ Ngezuva rimwero Mambo Mwari wakabudisa vana vaIsuraeri kubva munyika yeEgipite kudai ngezviunga zvavo.