EKISEDHUSI 11 - Bhaibheri Rakachena muChindau

Mosi Unodaidzira Rufu rweMatangwe

¹ Mambo Mwari wakati kunaMosi, “Ndichazounzazve dambudziko rimweni padera paFaro nepadera peEgipite; ngesure kweizvo unozomutendera kuti muende kubva pano; naapo paanozomutendera kuti muende, ngegwinyiso unozomudzinga yaamho kubva pano.

² Ereketa zvino mukuzwa kwevanhu, ngavakumbire mwamuna weshe kubva kuno muakirwana wake, nomukadzi weshe kubva kuno muakirwana wake, zvinemeso zvesirivha nezvinemeso zvomukore.”

³ Mambo Mwari wakaitira vanhu nyasha kuti vadikanwe mukuona kwevaEgipite. Kupinda zveshe, munhu uyu Mosi waiya mukuru kakurutu munyika yeEgipite, mukuona kwenduna dzaFaro nomukuona kwevanhu.

⁴ Mosi wakati, “Unoronza izvi Mambo Mwari, kwooita pakati pousiku ndinozobuda kuenda pakati peEgipite.

⁵ Matangwe eshe omunyika mweEgipite anozofa, kubvira kudangwe raFaro unogara padera pachigaro choumambo chake, metsa kuguma kudangwe romurandakadzi uri paguyo nematangwe eshe ezvifuyo.

⁶ Kunozoapo kuchema kukurutu munyika yeshe yeEgipite, kusikazi kumboapo kwakadaro, akuchazoapozve kwakadaro nakamwe.

⁷ Asi pakati pevana vaIsuraeri akuna imbwa inozoukura kuno umwe wavo, kuno munhu nokuti kune chifuyo: kuti muzie kuti Mambo Mwari unoisa muparadzaniso pakati pevaEgipite nevaIsuraeri.

⁸ Idzi dzeshe nduna dzako dzinozouya kwendiri, dzidzikotamise kwendiri, dzechiti, ‘Buda iwewe nevanhu veshe vanokuteera.’ Ngesure kweizvo ndinozobuda.” Naye wakabuda kubva kunaFaro anoushungu hunobaka.

⁹ Mambo Mwari wakati kunaMosi, “Faro aazopurutani kwouri, kuti mishamiso yangu iwanziswe munyika yeEgipite.”

¹⁰ Mosi naAroni vakaita yeshe iyi mishamiso pamberi paFaro; naMambo Mwari wakakonzesa mwoyo waFaro, naye aazi kutendera vana vaIsuraeri kuti vabude kubva munyika yake.