EKISEDHUSI 1 - Bhaibheri Rakachena muChindau

VaIsuraeri Vanoitwa Hloko muEgipite

¹ Aya ndiwo mazina evakororo vaIsuraeri vakauya Egipite naJakobe; munhu weshe nevemhatso yake:

² vaiya Rubheni, Simeoni, Revhi naJudha;

³ Isakha, Zebhuruni, naBhenjamini;

⁴ Dhani naNafitari, Gadhi naAsha.

⁵ Veshe vakabarwa kubva muchiunu chaJakobe vaiya vanhu makumi manomwe: Josefa waiya atogara muEgipite.

⁶ Zvino Josefa wakafa nevakoma vake veshe nomubarirwana uwo weshe.

⁷ Asi vana vaIsuraeri vakaberekana, vakawanda kakurutu; vakawandisisa, vakaita vane simba kakurutu; ndizvo nyika yakazara ndivo.

⁸ Zvino kwakabuda mambo mutsva padera peEgipite, uwo waiya asikazii Josefa.

⁹ Wakati kune vanhu vake, “Wonai, vanhu vaIsuraeri vawanda kakurutu nokugwinya kakurutu kupinda isusu.

¹⁰ Uyai, ngativabate ngourimbwi kuitira kuti vasawandisa, kuti kwanyamuka hondo, ivo vasabatana nemagaa edu, vaambane nesu, vatize kubva munyika ino.”

¹¹ Ndizvo vakaemesa padera pavo nduna dzomushando kuti dzivatambudze ngemitwaro inorema. Navo vakaakira Faro madhorobha okuunganidziramwo zviyo, aiya Pithomu naRaamesesi.

¹² Asi kudai ngouwandu hwokutambudzwa kwavo, navowo vakanyanya kuwandisa nokupararira. Ndizvo vakatyiswa ngendaa yevana vaIsuraeri.

¹³ VaEgipite vakamanikidza vana vaIsuraeri kuti vashande ngokurwadziwa.

¹⁴ Navo vakavavisa kupona kwavo ngokushanda kunodzimbira mukukanya madhaka nokuforoma zvidhina nembeu dzeshe dzemishando yomuminda. Kweshe kushanda kwavo kwevakamanikidzwa kwaidzimbira.

¹⁵ Mambo weEgipite wakaronzera vaashiri vevana vavaHebheru, zina roumwe wavo raizwi Shifira noumweni raizwi Pua.

¹⁶ Wakati, “Naapo mwoita mushando wokuashira vana vevakadzi vevaHebheru, mwechivaona pachigaro chokuashira kuti ari murumbwana, munozomuuraya; asi kuti ari musikana, munozomuponesa.”

¹⁷ Asi vaashiri vevana vaitya Mwari; avazi kuita kudai ngezvaakavapanga mambo weEgipite, asi vakaponesa vana vevarumbwana.

¹⁸ Ndizvo mambo weEgipite wakadaidza vaashiri vevana, akati kwavari, “Mwakaita izvi ngenyi, kuponesa vana vevarumbwana?”

¹⁹ Vaashiri vevana vakati kunaFaro, “Ngokuti vakadzi vevaHebheru avazi kudai ngevakadzi vevaEgipite; ngokuti vakagwinya, vanobara muashiri wevana asati aguma kwavari.”

²⁰ Ndizvo Mwari wakavaitira zvakanaka vaashiri vevana; navanhu vakawandiswa, vakaita vakagwinya kakurutu.

²¹ Ngokuti vaashiri vevana vakatya Mwari, iye wakavapa mhuri.

²² Zvino Faro wakapanga vanhu vake veshe echiti, “Murumbwana weshe unobarwa muvaHebheru, munozomukandira murwizi Naire, asi munozoita kuti musikana weshe apone.”