Dhuto. 9 - Bhaibheri Rakachena muChindau

Kusapurutana kweVanhu

¹ Izwai, imwimwi vaIsuraeri! Munozoambuka Jorodhani nyamashi, kuti mupotere umwo kugara nhaka yemadzinza akakura, naanesimba, kupinda imwimwi, madhorobha akakura, akashosherwa kuguma mudenga,

² vanhu magakanyara vakareba, vana vaAnakimu vomunozia, vomunozwa ndivo kuti, “Ndiani ungaema pamberi pevana vaAnaki!”

³ Ndizvo nasai kuzwisisa nyamashi, kuti Mambo Mwari, Mwari wenyu, ndiye unotungamira pamberi penyu, kudai ngomuriro unopedza; naye unozovanyisa nokuvapfaisa pamberi pokuona kwenyu; ndizvo munozovadzinga nokuvapedza ngokukasira, kudai ngezvaakaronza Mambo Mwari kwomuri.

⁴ Musazoereketa mumwoyo mwenyu apo Mambo Mwari azovadzinga kubva pamberi penyu mwechiti, “Ngokunaka kwangu Mambo Mwari wakandipotedza muno kuti ndigare nhaka yenyika iyi;” asi indaa yokushata kwaaya madzinza Mambo Mwari wakaadzinga kubva pamberi penyu.

⁵ Amupoteri kugara nhaka yenyika iyi ngendaa yokururama kwenyu nokuti ngendaa yokururama kwomwoyo yenyu; asi ngendaa yokushata kwemadzinza awo Mambo Mwari, Mwari wenyu, unoadzinga kubva pamberi penyu, zve, kuti iye azarise izwi raakapika kumadzibaba enyu, Abrahama naIsaka naJakobe.

⁶ Nasai kuzia, ndizvo, kuti Mambo Mwari, Mwari wenyu, aamupi iyi nyika yakanaka kuti muigare ngendaa yokururama kwenyu; ngokuti muri dzinza rinemitsipa yakakukutara.

⁷ Karakadzai, musakanganwa, njira yemwakatsenesa Mambo Mwari, Mwari wenyu, mushango; kubvira kuzuva remwakabuda ndiro kubva kunyika yeEgipite, metsa kuguma kuneiyi ndau, munondomukira Mambo Mwari.

⁸ Kunyazwi paHorebhi mwakatsenesa Mambo Mwari kuti aite ushungu, naMambo Mwari wakamutsenekera kuti amupedze.

⁹ Apo ndaiya ndechikwira kumutunhu kuti ndiashire marusamba emapuwe, marusamba echitenderano chaakaita Mambo Mwari neimwimwi, naapo ndakagara mumutunhu uwo mazuva makumi marongomuna nousiku makumi marongomuna, andizi kudya nokuti kumwa mvura.

¹⁰ Mambo Mwari wakapa kwendiri marusamba mairi emapuwe awo akanyorwa ngechinwe chaMwari; nepadera pao paiya pakanyorwa mazwi eshe aakaereketa Mambo Mwari kwomuri mumutunhu kubva pakati pomuriro ngezuva romushongano.

¹¹ Kwakaitika ngesure kwemazuva makumi marongomuna nousiku makumi marongomuna kuti Mambo Mwari wakandipa marusamba mairi emapuwe, marusamba echitenderano.

¹² Zvino Mambo Mwari wakati kwendiri, “Miruka, udzake ubve pano ngokukasira; ngokuti ava vanhu vowakabudisa kubva Egipite vadzishaishira. Vakasira kupauka kubva kunjira yendakavapanga; vakadziumbira muedzaniso.”

¹³ Zve, Mambo Mwari wakaereketa kwendiri echiti, “Ndaona vanhu ava, ringira vari vanhu vanemitsipa yakakukutara.

¹⁴ Ndirekere, ndivapedze, ndiridzime zina ravo kubva pashi pedenga; neni ndinozoita ndiwe dzinza rinesimba nokukura kupinda avo.”

¹⁵ Ndizvo ndakakunukuka, ndakadzaka kubva kumutunhu, nomutunhu waibaka muriro; nemarusamba mairi emapuwe aiya munyara dzangu mbiri.

¹⁶ Ndakaringira, ndikaona kuti mwakashaisha kunaMambo Mwari, Mwari wenyu, mwaiya mwakadziumbira muedzaniso wekonyana; mwaiya mwapauka ngokukasira kubva kunjira iyo yemwakapangwa ndiMambo Mwari.

¹⁷ Neni ndakatora marusamba mairi, ndakaaposhera pashi kubva kunyara dzangu mbiri, ndakaaputsa mukuona kwenyu.

¹⁸ Ndakawa pashi pamberi paMambo Mwari kudai ngokutanga, mazuva makumi marongomuna nousiku makumi marongomuna; andizi kudya chokudya, nokuti kumwa mvura, ngendaa yezvishaishi zvenyu zveshe zvemwakaita, ngokuita zvakashata mukuona kwaMambo Mwari, kumumusira ushungu.

¹⁹ Ngokuti ndaiya ndechitya ushungu nokutseneka kukuru kwaMambo Mwari kwomwakamutsenesa ndikwo kuti amupedze. Asi Mambo Mwari wakandizwazve ngouwo mukuwo.

²⁰ Mambo Mwari wakatsenekera Aroni kakurutu kuti amuuraye, asi ndakakumbirira Aronizve ngouwo mukuwo.

²¹ Neni ndakatora chishaishi chenyu, muedzaniso wekonyana wemwakaumba, ndakaupisha ngomuriro, ndakaudzengenesa, nokuukuya ukamotseka, eya, metsa ukadai ngebukuta; neni ndakarasha bukuta rawo mumukova unoerera kubva kumutunhu.

²² Zve, nepaThabhera, nepaMasa, nepaKibrothihataava, imwimwi mwakamusa ushungu hwaMambo Mwari.

²³ Ngokudarozve apo Mambo Mwari wakamutuma kubva Kadheshibharanea achiti, “Kwirai muende koogara nhaka yenyika yendakamupa,” naapo mwakamukira mupango waMambo Mwari, Mwari wenyu, nemwi amuzi kumutenda, nokuti kupurutana kuneizwi rake.

²⁴ Mwakaita vanomukira kunaMambo Mwari kubvira zuva rendakaamba kumuzia.

²⁵ Ndizvo ndakawa pashi pamberi paMambo Mwari mazuva makumi marongomuna nousiku makumi marongomuna, ngokuti Mambo Mwari waiya aronza kuti unozomupedza.

²⁶ Ndakakumbira kunaMambo Mwari ndechiti, “A Mambo Mwari, Mwari Mukuru, usapedza vanhu vako vari nhaka yako yemene, avo vemwakaripira muukuru hwako vewakabudisa kubva Egipite ngenyara inesimba.

²⁷ Karakadza varanda vako, Abrahama, Isaka naJakobe; usaringira munzinini waava vanhu, nokuti kushata kwavo, nokuti kushaisha kwavo,

²⁸ kuti venyika iyo yewakatibudisa kweiri vasazoronza kuti, ‘Ngokuti Mambo Mwari waiya asina simba rokugumisa avo vanhu munyika yaakavagondisa, ngokuti waivazonda, wakavabudisa kuti avauraire mushango.’

²⁹ Ngokuti vanhu vako, nenhaka yako, vewakabudisa ngesimba rako guru, ngomuoko wako wakatambanudzwa.”