Dhuto. 8 - Bhaibheri Rakachena muChindau

Nyika Yakanaka Inogarwa Nhaka

¹ Yeshe mipango yendinomupanga nyamashi munozoingwarira kuiita, kuti mupone, muwanzwe, mupotere umwo kugara nhaka yenyika yaakapika ndiyo Mambo Mwari kumadzibaba enyu.

² Nemwi munozokarakadza kuhamba kweshe kwaakamutungamira Mambo Mwari eshe aya makore makumi marongomuna mukati mweshango kuti amupfaise, nokumuedza, nokuzia kuti chiinyi chiri mumwoyo mwenyu, kuti munozongwarira mipango yake here, nokuti amuzoingwariri.

³ Naye wakamupfaisa, akamuita kuti muzwe nzara, akamugutisa ngemana, yomusaizia, nokuti madzibaba enyu vasaizia, kuti amuite kuti muzie kuti munhu aazoponi ngechingwa chega, asi ngemazwi eshe anobuda kumuromo waMambo Mwari.

⁴ Zvokufuka zvenyu azvizi kusakara kwomuri, zve, netsoka dzenyu adzizi kuzvimba ngaaya makore makumi marongomuna.

⁵ Zve, ziai mumwoyo mwenyu kuti kudai ngomunhu unoorora mwana wake, ngokudaro Mambo Mwari, Mwari wenyu, unomuorora.

⁶ Ndizvo munozongwarira mipango yaMambo Mwari, Mwari wenyu, ngokuhamba ngenjira dzake nokumutya.

⁷ Ngokuti Mambo Mwari, Mwari wenyu, unozomupotedza munyika yakanaka, nyika inemvura, inezvinyuka zvemvura zvinovheruka kuerera mubani nomumitunhu,

⁸ nyika inekoroni, bhare, mavhini, miti yemionde, nemaphomegraniti, nyika yemafuta emaorivhi, neyouchi.

⁹ Munyikayo yomunozodya zvisikatamiki amuzotami chiro nachimwe mukati mwayo; nyika inemapuwe ayo ari simbi, nokubva kumitunhu yayo munozotsa thusi.

¹⁰ Nemwi munozodya mwechiguta, munozobonga Mambo Mwari, Mwari wenyu, ngendaa yenyika yakanaka yaakamupa.

Kungwadzwa ngendaa yoKukanganwa Mwari

¹¹ Ngwaridzirai kuti musazoriyarwa Mambo Mwari, Mwari wenyu, ngokusikangwarira mipango yake nezvitongero zvake nezviemeso zvake, zvendinomupanga nyamashi.

¹² Kusazoitika kuti mwadya, mwaguta, mwadziakira mhatso dzakanaka, dzokuti mugaremwo,

¹³ naapo mitanga yenyu yezvifuyo yawanda, nesirivha nomukore wenyu zvawanzisa, nazvo zveshe zvomunazvo zvawanzisa,

¹⁴ zvino mwoyo yenyu yatunhumadzwa, nemwi mwechiriyarwa Mambo Mwari, Mwari wenyu, uwo wakamubudisa kubva munyika yeEgipite, kubva kumhatso youhloko.

¹⁵ Wakamutungamira kupotya mukati mweshango iri guru, rinotyisa rinenyoka dzinoukaira, nezvinyaada, nokuomerwa, apo paiya pasina mvura. Wakamubudisira mvura kubva pabuwe rakakonza.

¹⁶ Uwo wakamugutisa mukati mweshango ngemana, isikazi kuziikanwa ngemadzibaba enyu, kuti amupfaise, amuedze, kumuitira zvakanaka kumagumisiro enyu.

¹⁷ Nemwi musazoronza mumwoyo mwenyu kuti, “Isimba rangu, nesimba renyara dzangu kuti ndione uhwu upfumi.”

¹⁸ Asi munozokarakadza Mambo Mwari, Mwari wenyu, ngokuti ndiye unomupa simba rokuti muone upfumi, kuti agwinyise chitenderano chake chaakapika nemadzibaba enyu, kudai ngezvezviri azvo nyamashi.

¹⁹ Kunozoitika kuti kudai mwechizokanganwa Mambo Mwari, Mwari wenyu, mwechiteera zvimwari, nokuzvishandira, nokuzvidira, ndinoita chapupu kwomuri nyamashi kuti ngegwinyiso munozopera.

²⁰ Kudai ngemadzinza aakauraya Mambo Mwari kubva pamberi penyu, ngokudaro nemwi munozofa, ngokuti amuzi kuita vanopurutana kuizwi raMambo Mwari, Mwari wenyu.