Dhuto. 7 - Bhaibheri Rakachena muChindau

Vanhu vaMwari Vemene

¹ Naapo Mambo Mwari, Mwari wenyu, anozonga amupotedza munyika yomunoenda kooigara nhaka, nokudzinga madzinza mazhinji kubva pamberi penyu, vaHiti, nevaGirigashi, nevaAmori, nevaKhenani, nevaPherizi, nevaHivhi, nevaJebhusi, madzinza manomwe makuru anesimba kupinda imwimwi,

² naapo Mambo Mwari, Mwari wenyu, echizovapa kwomuri, nemwi mwechizovanyisa munozovabaya kuvapedza yaamho. Musazoita chitenderano navo nokuti kuvaitira nyasha.

³ Zve, musazoroodzana navo; musazopa vanasikana venyu kunavakororo vavo, nokuti kutora vanasikana vavo kupa vakororo venyu,

⁴ ngokuti vanozopaukisa vakororo venyu kubva kwokunditeera, kuti vashandire zvimwari. Ngokudaro ushungu hwaMambo Mwari hunozobaka kwomuri, humupedze paripo.

⁵ Asi munozoita izvi kwavari: munozoputsa maarita avo, mupwanyire pashi miedzaniso yavo, nokutemera pashi makwasha avo okudira, nokupisha miedzaniso yavo yakanyunguruswa ngomuriro.

⁶ Ngokuti imwimwi muri dzinza rakachena kunaMambo Mwari, Mwari wenyu; Mambo Mwari, Mwari wenyu, wakamutsanangura kuti muite dzinza riri pamwoyo wake, kupinda madzinza eshe ari padera penyika.

⁷ Mambo Mwari aazi kuisa rudo rwake padera penyu, nokuti kumutsanangura ngokuti mwaiya mwakapinda kuwanda kunemadzinza amweni; ngokuti mwaiya vashomani kunemadzinza eshe.

⁸ Asi ngokuti Mambo Mwari wakamuda, nokungwarira mhiko yaakapika kumadzibaba enyu, ndizvo Mambo Mwari wakamubudisa ngenyara inesimba, wakamuripira kubva kumhatso youhloko, kubva kunyara yaFaro mambo weEgipite.

⁹ Ndizvo ziai kuti Mambo Mwari, Mwari wenyu, ndiye Mwari, Mwari wakagondeka, unongwarira chitenderano nenyasha kwavari vanomuda nokungwarira mipango yake metsa kumibarirwana iri gumi remazana,

¹⁰ echiunzidzira kwavari vanomuramba. Aazononoki kuunzidzira avo vanomuramba.

¹¹ Ndizvo munozongwarira mipango nezviemeso nezvitongero, zvendinomupanga nyamashi, kuti muzviite.

Zvifumiso zvoKupurutana

¹² Kudai mwechipurutana kuneizvi zvitongero, nokuzvingwarira, nokuzviita Mambo Mwari, Mwari wenyu, unozongwarira chitenderano nenyasha zvaakapika kunemadzibaba enyu;

¹³ naye unozomuda, amufumise, amuwanze; zve, unozofumisa vanobarwa ndimwi nemichero yeminda yenyu, nezviyo zvenyu, nevhini renyu, nemafuta enyu, nezvinoberekwa ngen'ombe dzenyu, nemitanga yehwai dzenyu, munyika iyo yaakapika ndiyo kunemadzibaba enyu kuipa kwomuri.

¹⁴ Nemwi munozofumiswa kupinda vanhu veshe; akuzoapo munhu womwamuna nokuti womukadzi usikazobereki pakati penyu, nokuti pakati pezvifuyo zvenyu.

¹⁵ Mambo Mwari unozodusa nhenda dzeshe kubva pakati penyu; aazoisizve padera penyu nokuti ngeiri nhenda dzeEgipite dzomunozia, asi unozodziisa padera peavo veshe vanomuzonda.

¹⁶ Nemwi munozopedza vanhu veshe vaanozopa kwomuri Mambo Mwari, Mwari wenyu. Musazovazwira urombo; zve, musazodira zvimwari zvavo, ngokuti icho chinozoita murau kwomuri.

¹⁷ Kudai mwechizoronza mumwoyo mwenyu kuti, “Aya madzinza ari akawanda kupinda isusu. Tingavaita madzingirenyi?”

¹⁸ Musazovatya. Asi munozonasa kukarakadza chaakaita Mambo Mwari, Mwari wenyu, kunaFaro nomunyika yeshe yeEgipite,

¹⁹ zviedzo zvikuru zvemwakaona ngemadziso enyu, zvioniso nemishamiso, nyara inesimba nomuoko wakatambanudzwa, waakamubudisa ndiwo Mambo Mwari, Mwari wenyu. Mambo Mwari, Mwari wenyu, unozoitazve zvakadaro kuneava vanhu veshe vanomutya.

²⁰ Zve, Mambo Mwari, Mwari wenyu, unozotuma mago pakati pavo, metsa avo vanosara vanozodzifisha kubva kwomuri, vapere kufa.

²¹ Musazovatya, ngokuti Mambo Mwari, Mwari wenyu, uri pakati penyu, uri Mwari unesimba nounotyisa.

²² Mambo Mwari, Mwari wenyu, unozodzinga awo madzinza kubva pamberi penyu padoko ngepadoko; musazovapedza paripo, kuti zvikara zvomushango zvisazowanda padera penyu.

²³ Asi Mambo Mwari, Mwari wenyu, unozovapa kwomuri nokuvakangaidza kakurutu, metsa vapedzwe.

²⁴ Naye unozopa madzimambo avo munyara dzenyu, munozodzima mazina avo kubva pashi pomudenga; akuzoapo nomunhu noumwe unozokona kuema pamberi penyu, metsa muvapedze.

²⁵ Miedzaniso yezvimwari zvavo yakatsetswa munozoipisha ngomuriro. Musazoemura sirivha nokuti mukore uwo uri kwezviri, nokuti kuutora kuita wenyu, kuti musazoteiwa ndiwo; ngokuti chinyangadzo kunaMambo Mwari, Mwari wenyu.

²⁶ Musazopotedza chinyangadzo mumhatso yenyu, kuti musazoita chituko kudai ndicho. Asi unozochinyenya yaamho, nokunyangadzwa ndicho, ngokuti chiri chiro chakatukwa.