Dhuto. 6 - Bhaibheri Rakachena muChindau

Mupango Mukuru

¹ Zvino iyi ndiyo mipango nezviemeso nezvitongero, zvaakandipanga Mambo Mwari, Mwari wenyu, kuti ndimudzidzise, kuti muzviite muri munyika yomunoenda koogara nhaka yayo,

² kuti mutye Mambo Mwari, Mwari wenyu, kuti mungwarire zviemeso zvake zveshe nemipango yake, yendinokupanga, iwewe nomukororo wako, nomukororo womukororo wako, eshe mazuva okupona kwako, kuti mazuva ako awanzwe.

³ Ndizvo izwai, imwimwi vaIsuraeri, mungwarire kuzviita kuti zvinake kwomuri, kuti muwanziswe kakurutu, kudai ngezvaakamugondisa Mambo Mwari, Mwari wemadzibaba enyu, munyika inoerera mukaka nouchi.

⁴ Izwanyi, A iwewe Isuraeri: Mambo Mwari, Mwari wedu ndiMambo Mwari umwe.

⁵ Newe unozomuda Mambo Mwari, Mwari wako, ngomwoyo wako weshe, ngomweya wako weshe, nesimba rako reshe.

⁶ Ngwarira mazwi aya endinokupanga nyamashi mumwoyo mwako.

⁷ Newe unozonasa kudzidzisa vana vako, uerekete ndiwo apo wechigara mumhatso yako, naapo wechihamba munjira, naapo woata pashi, naapo wopirimuka.

⁸ Newe unozoasunga panyara yako kuti aite chioniso, anozoita kudai ngemundanyara unechibhokisi pamberi pamadziso ako,

⁹ newe unozoanyora pasika dzemhatso yako nepamisiwo yako.

Kupangwa ngendaa yoKusapurutana

¹⁰ Naapo Mambo Mwari, Mwari wenyu, echizomupotedza munyika yaakapika ndiyo kumadzibaba enyu, kunaAbrahama, nokunaIsaka, nokunaJakobe, kuti amupe, nyika inemaguta akanaka, maguta makuru, omusikazi kuaka,

¹¹ mhatso dzakazara ngezviro zveshe zvakanaka, dzomusikazi kuzadza, nezvinyuka zvakatsiwa, zvomusikazi kutsa, neminda yemivhini, nemiti yemiorivhi, isikazi kusimwa ndimwi, naapo munozodya, mwechiguta,

¹² ngwarai kuti musazoriyarwa Mambo Mwari uwo wakamubudisa kubva munyika yeEgipite, kubva mumhatso youhloko.

¹³ Munozotya Mambo Mwari, Mwari wenyu, mumudire, munozopika ngezina rake.

¹⁴ Musazoteera zvimwari zvimweni zvevanhu vakamutendenedza,

¹⁵ ngokuti Mambo Mwari, Mwari wenyu, uwo unemwi ndiMwari unendurumwa; kuti ushungu hwaMambo Mwari, Mwari wenyu, husazobaka pakati penyu, nokumupedza kubva padera penyika.

¹⁶ Musazoedza Mambo Mwari, Mwari wenyu, kudai ngezvemwakamuedza muri muMasa.

¹⁷ Munozonasa kungwarira mipango yaMambo Mwari, Mwari wenyu, nezvapupu zvake, nezviemeso zvake zvaakamupanga.

¹⁸ Newe unozoita zvakarurama nezvakanaka mukuona kwaMambo Mwari, kuti zvinake kwouri, kuti upotere ugare nhaka yenyika yakanaka yaakapika Mambo Mwari kumadzibaba ako,

¹⁹ kudzinga eshe magaa ako kubva pamberi pako, kudai ngezvaakaereketa Mambo Mwari.

²⁰ Naapo mukororo wako echizokubvunza ngomukuwo unouya echiti, “Izvi zviemeso nezvapupu nezvitongero zvinoronzenyi, izvo zvaakamupanga Mambo Mwari, Mwari wedu?”

²¹ Naapo unozoti kunevana vako, “Taiya tiri hloko dzaFaro muEgipite, asi Mambo Mwari wakatibudisa kubva muEgipite ngenyara inesimba.

²² Naapo Mambo Mwari wakapangidzira zvioniso, nemishamiso mikuru neinotambudza, padera peEgipite, nepadera paFaro, napadera pemhatso yake yeshe mukuona kwedu.

²³ Wakatibudisa kubvemwo, kuti atiunze, kutipinza munyika yaakapika kunemadzibaba edu.

²⁴ NaMambo Mwari wakatipanga kuti tiite zveshe izvi zviemeso, kuti titye Mambo Mwari, Mwari wedu, kuti zviite zvakanaka kwetiri nguva dzeshe, kuti atingwarire techipona kudai ngezvezvakandodaro nanyamashi.

²⁵ Kudai techiita zveshe zvemipango pamberi paMambo Mwari, Mwari wedu, kudai ngezvaakatipanga, tinozoita vakarurama.”