Dhuto. 5 - Bhaibheri Rakachena muChindau

Mipango Iri Gumi

¹ NaMosi wakadaidza vaIsuraeri veshe, akati kwavari: “Izwai, imwimwi vaIsuraeri, zviemeso nezvitongero, zvendinoereketa munzee dzenyu nyamashi, kuti muzvidzidze, nokuzvingwarira nokuzviita kakurutu.

² Mambo Mwari, Mwari wedu, wakaita chitenderano nesu paHorebhi.

³ Mambo Mwari aazi kuita chitenderano ichi nemadzibaba edu, asi neisusu, isusu tiri pano tichapona ngeiri zuva.

⁴ Mambo Mwari wakaereketa nemwi hope kuhope pamutunhu kubva ari pakati pomuriro.

⁵ (Ndakaema pakati penyu naMambo Mwari ngouwo mukuwo, kuti ndimupangidzire izwi raMambo Mwari; ngokuti imwimwi mwaiya mwechitya ngendaa yomuriro, amuzi kukwira pamutunhu.) Wakati.

⁶ “Ndiri Mambo Mwari, Mwari wako, uwo wakakubudisa kubva kunyika yeEgipite, kubva mumhatso youhloko.

⁷ “Usazoa nezvimwari zvimweni pamberi pangu.

⁸ “Usazodziitira muedzaniso wakatsetswa, kunyazwi mutodzaniso nokuti wechiro chiri padera mudenga, nokuti chiri pashi munyika, nokuti chiri mumvura pashi penyika.

⁹ Usazodzikotamisa pashi kwezviri, nokuti kuzvidira; ngokuti inini Mambo Mwari, Mwari wako, ndiri Mwari unendurumwa, ndechiunzidzira kushata kwemadzibaba padera pevana metsa kumubarirwana wechitatu nowechirongomuna waavo vanondiramba,

¹⁰ asi ndechipangidzira nyasha kunevari makumi emazana eavo vanondida nokungwarira mipango yangu.

¹¹ “Usazoshandisa zina raMambo Mwari, Mwari wako, ngenjira isina shwiro, ngokuti Mambo Mwari aazomuiti usina ndaa uwo unoshandisa zina rake ngenjira isina shwiro.

¹² “Ngwarira zuva reSabatha kurichenesa, kudai ngezvaakakupanga Mambo Mwari, Mwari wako.

¹³ Mazuva matanhatu unozoshanda uite mishando yako yeshe.

¹⁴ Asi zuva rechinomwe iSabatha kunaMambo Mwari, Mwari wako; usazoita mushando nokuti ngouri ngeiro zuva, iwewe nokuti mukororo wako, nokuti mwanasikana wako, nokuti hloko yako yomwamuna nokuti yomukadzi, nokuti n'ombe yako, nokuti mbongoro yako, nokuti chimwe chezvifuyo zvako, nokuti muhambi uri mukati mwemadhorobha ako; kuti hloko yako yemwamuna noyomukadzi yako vazorore kudai ndiwe.

¹⁵ Ucherechedze kuti iwewe waiya hloko munyika yeEgipite, nokuti Mambo Mwari, Mwari wako, wakakubudisa kubvemwo ngenyara inesimba nomuoko wakatambanudzwa; ndizvo Mambo Mwari, Mwari wako, wakakupanga kuti ungwarire zuva reSabatha.

¹⁶ “Remeredza baba ako namai ako, kudai ngezvaakapanga Mambo Mwari, Mwari wako, kuti mazuva ako awanzwe, zve, kuti zvinake kwouri munyika yaanopa kwouri Mambo Mwari, Mwari wako.

¹⁷ “Usazouraya.

¹⁸ “Usazoomba.

¹⁹ “Usazoba.

²⁰ “Zve, usazoita chapupu chokunyepa kunomuakirwana wako.

²¹ “Zve, usazoemura mukadzi womuakirwana wako, zve usazoemura mhatso yomuakirwana wako, nokuti munda wake, nokuti hloko yake yomwamuna, nokuti yomukadzi yake, nokuti kabi yake, nokuti mbongoro yake, nokuti chiro kunyazwi ngechiri chomuakirwana wako.”

Vanhu Vanotya

²² Mambo Mwari wakaereketa aya mazwi kumbungano yenyu yeshe pamutunhu kubva ari pakati pomuriro, nepegore, nepechidima chikurutu, ngeizwi guru, naye aazi kututsira zvimweni. Wakazvinyora pamarusamba mairi emapuwe, aakapa kwendiri.

²³ Kwakaitika apo mwazwa izwi kubva pakati pechidima chikurutu, ngokuti mutunhu wakabaka ngomuriro, kuti imwimwi mwakakwedzera pasinde kwendiri, vatungamiriri vemadzinza enyu nevakuru venyu.

²⁴ Mwakati, “Ringira, Mambo Mwari, Mwari wedu, watipangidzira uthende hwake nokukura kwake, nesu tazwa izwi rake rechibva pakati pomuriro. Taona nyamashi kuti Mambo Mwari ungaereketa nomunhu, naye akasara echipona.

²⁵ Ndizvo zvino, tingafa ngenyi? Ngokuti uyu muriro mukuru unozotipedza; kudai techizozwazve izwi raMambo Mwari, Mwari wedu, naapo tinozofa.

²⁶ Ngokuti uri pari pakati pevanhu veshe wakambozwa izwi raMwari unopona rechiereketa kubva pakati pomuriro kudai tisu, oroopona?

²⁷ Kwedzera iwewe pasinde, uzwe zveshe zvaanozoereketa Mambo Mwari, Mwari wedu. Unozotironzera zveshe zvaanoereketa Mambo Mwari, Mwari wedu, kwouri; nesu tinozozvizwa nokuzviita.”

²⁸ Mambo Mwari wakazwa kuereketa kwemazwi enyu, emwakaereketa kwendiri, naMambo Mwari wakati kwendiri, “Ndazwa mazwi okuereketa kwaava vanhu, evakaereketa kwouri; vakanasa kuereketa zveshe zvevakaereketa ndizvo.

²⁹ A kudai kungaapo mukati mwavo mwoyo wokunditya, nokungwarira mukuwo weshe mipango yangu yeshe, kuti zvinake kwavari, nokuvana vavo kunoti mhera nariini!

³⁰ Enda, uerekete kwavari wechiti, ‘Hwirirai kumatende enyu.’

³¹ Asi iwewe unozoema pano kwendiri, neni ndinozoereketa kwouri yeshe mipango nezviemeso nezvitongero, zvounozovadzidzisa, kuti vazozviita vari munyika yendinovapa kuti vagare nhaka yayo.”

³² Ndizvo munozongwarira kuita kudai ngezvaakamupanga Mambo Mwari, Mwari wenyu; musazopauka kuenda kumudyo nokuti kumuoshwe.

³³ Munozohamba ngenjira dzeshe dzaakamupanga Mambo Mwari, Mwari wenyu, kuti mupone, kuti zvinake kwomuri, kuti muwanzwe mazuva enyu muri munyika yomunozogara nhaka yayo.