Dhuto. 33 - Bhaibheri Rakachena muChindau

Mosi Unofumisa Madzinza aIsuraeri

¹ Ichi ndicho chifumiso chaakafumisa ndicho vaIsuraeri Mosi munhu waMwari, asati afa.

² Wakati, “Mambo Mwari wakabva Sinai, wakabuda kubva Seira kuuya kwetiri; wakajeka kubva Mutunhu Pharani. Wakauya anevari makumi emazana ari gumi evakacheneswa; kubva kunyara yake yokumudyo kwakabuda mirazvu yomuriro.

³ Eya, unodikana pakati pevanhu, veshe vakacheneswa vake vari munyara dzake; navo vanohamba patsoka dzako, veshe umwe ngoumwe vanoashira kupanga kwako.

⁴ Mosi wakatipanga mipango, kuita nhaka yembungano yaJakobe.

⁵ Kwakamiruka mambo muJeshuruni, apo vatungamiriri vevanhu vakaungana pamwepo mubatanidzwa nevaIsuraeri.

⁶ Rubheni ngaapone, asafa; kunyazwi vanhu vake vari vashomani.”

⁷ Neichi ndicho chaakaereketa ndiJudha: “Izwa, Mambo Mwari, izwi raJudha, umuunze kuvanhu vake; mugwinyise nyara dzake, uite mudetseri wake kumagaa ake.”

⁸ NdiRevhi wakati: “Ipa kunaRevhi Thumimu noUrimu zvako kunewakacheneswa wako, uwo wewakaedza paMasa, nowowakakanidzana naye pamvura yeMeribha;

⁹ uwo wakati kunababa ake namai, ‘Andizi kuvaerenga;’ aazi kumboringira hama dzake, nokuti kuzia vana vake vemene, ngokuti vakangwarira izwi rako nechitenderano chako.

¹⁰ Vanodzidzisa Jakobe zvitongero zvako, naIsuraeri mipango yako; vanoisa mutombo unegwema rakanaka pamberi pako, nomubairo wokupisha zveshe padera pearita rako.

¹¹ Fumisa, iwewe Mambo Mwari, zviro zvake, ashira mushando wenyara dzake; vabaye ngomuchiunu avo vanomumukira, necheavo vanomuzonda, kuti vasazomukazve.”

¹² NdiBhenjamini wakati: “Mudikani waMambo Mwari unogara mukungwaririka pasinde pake; Mwari Uri-Padera-pazvo-zveshe unozomutendenedza zuva reshe, mudikani unozogara pakati pemapfudzi ake.”

¹³ NdiJosefa wakati: “Nyika yake ngaifumiswe ndiMambo Mwari ngezvipo zvinomutengo mukuru zvinobva mudenga, beto, nemikova inoerera ngepashi;

¹⁴ nemichero inomutengo mukuru yezuva, nezvikohiwa zvinomutengo mukuru zvomwedzi;

¹⁵ nezviro zvikuru zvakanakisisa zvemitunhu yekare, nezviro zvinomutengo mukuru zvemitunhu zvemhera nariini;

¹⁶ nezvipo zvinomutengo mukuru zvomunyika, nazvo zveshe zviri mukati mwayo, nokuda kwakanaka kwouwo waigara mushango. Izvi ngazviuye padera pesoro raJosefa, nepadera pesoro rouwo wakaparadzaniswa kubva kuvakoma vake.

¹⁷ Uthende hwake hwakadai ngedangwe romukono wen'ombe nenyanga dzake dzakadai ngenyanga dzenyati; ndidzo unozotunga vanhu pamwepo metsa kumagumo enyika; vari makumi emazana ari gumi evaEfuremu, nemakumi emazana evaManase.”

¹⁸ NdiZebhuruni wakati: “Dakara, Zebhuruni, mukubuda kwako, newe Isakha mumatende ako.

¹⁹ Vanozodaidza vanhu kumutunhu; naapo vanozopira mibairo yokururama; ngokuti vanozodya zvouwandu hwemaruandhle, nezvoupfumi hwakafishwa mujecha.”

²⁰ NdiGadhi wakati: “Ngaafumiswe uwo unowandisa Gadhi! Gadhi unogara kudai ngemhondoro, unokwenga muoko pamwepo nenhubvuma yesoro.

²¹ Naye wakadzitsanangurira chikoaniswa chakapindisisa kunaka kuita chake, chikoaniswa chomupi wemipango; naye wakauya pamwepo nevakuru vevanhu, akaita zvakarurama zvaMambo Mwari, nokutonga kwake kuvaIsuraeri.”

²² NdiDhani wakati: “Dhani uri duhwa remhondoro, unozonyanduka echibva Bhashani.”

²³ NdiNafitari wakati: “A Nafitari, unokwaniswa ngenyasha, unozozadzwa ngechifumiso chaMambo Mwari; gara nhaka yokumabirirazuva neyokubani.”

²⁴ NdiAsha wakati: “Ngaafumiswe Asha kupinda veshe; ngaashirike kuhama dzake, naye ngaanyike tsoka dzake mumafuta.

²⁵ Zvokukonyesa misiwo yako isimbi nethusi; kudai ngemazuva ako, zvinozodaro kusimba rako.”

²⁶ Akuna wakadai ndiMwari waJeshuruni, uwo unogadha padera pematenga kuuya kukudetsera, nokuukuru hwake kudarika ngomumakore.

²⁷ Mwari wemhera nariini uri ukona hwako, nepashi pako iripo mioko yemhera nariini: unozodzinga magaa ako kubva pamberi pako, unozoti, “Vapedze.”

²⁸ Ndizvo Isuraeri unozogara mukugarisika ari ega, chinyuka chaJakobe chinozopopoma padera penyika yezviyo nevhini, apo matenga ake anozodonhesa beto.

²⁹ Kudakara kwounakwo, A Isuraeri! Ndiani ungaedzaniswa newe, dzinza rakaponeswa ndiMambo Mwari? Uri chihlangu chokumudetsera, uri shoti yokunyisa kwenyu! Magaa enyu anozooneka ari echimugwadamira; nemwi munozotsikatsika padera pavo.