Dhuto. 32 - Bhaibheri Rakachena muChindau

¹ “Izwanyi, imwimwi matenga, neni ndinozoereketa; nyika ngaizwe mazwi omuromo wangu.

² Kudai kudzidzisa kwangu kukadonha kudai ngemvura, kuereketa kwangu kukagara kudai ngebeto, kudai ngezvimufatafata zvemvura padera pemafiba, nokudai ngebumhakamwe padera pomwenje.

³ Ngokuti ndinozoteketesa zina raMambo Mwari; tunhumadzai imwimwi ukuru kunaMwari wedu!

⁴ Ruware, mushando wake uri wakaperera nenjira dzake dzeshe dziri kutonga kwakanaka. Mwari wakagondeka, usina kuchengedza, wakarurama nokuperera,

⁵ asi imwimwi muri vasikagondeki, amuzi kusisira kuita vana vake, muri mubarirwana unopauka nowakashongoroka.

⁶ Ndiyo njira here yomunoripira Mambo Mwari ndiyo, imwimwi vanhu mapenzi nevasina kungwara? Andiye here baba wenyu uwo wakamusika, uwo wakamuita nokumugwinyisa?

⁷ Cherechedzai mazuva ekare, pinimidzai ngemakore emibarirwana mizhinji; bvunzai madzibaba enyu, navo vanozomuronzera, nevakuru venyu, navo vanozomuronzera.

⁸ Apo Uripadera-pazveshe wakakoanisira kumadzinza nhaka yavo, apo akaparadzanisa vakororo vaAdhamu, wakaemesa migano yevanhu kudai ngouwandu hwevana vaIsuraeri.

⁹ Chikoaniswa chaMambo Mwari vanhu vake; Jakobe chikoaniswa chenhaka yake.

¹⁰ Wakamuona ari munyika yakaoma hlengwe, nomushango risina nechiro, rinotyisa; wakamutendedza apo naapo, akamudzidzisa, akamungwarira kudai ngemboni yedziso rake.

¹¹ Kudai ngedorambudzi rinoteta chisaki charo, rechimbururuka padera pevana varo, rechitambanudza maphaphiro aro rechivatora nokuvatwara padera pemaphaphiro aro,

¹² Mambo Mwari ega wakamutungamira, inga pasina chimwari chipara naye.

¹³ Naye wakaita kuti akwire padera pendau dzakakwirira dzomunyika, akamurera ngezvinobarwa muminda; wakamuita kuti amwe uchi hunobva mubuwe, nemafuta anobva kubuwe resimbi.

¹⁴ Mukaka wakakora wezvifuyo, nomukaka wehwai nembudzi, nemafuta emakwai nemagondohwe; mikono yeBhashani, nembudzi, nemafuta ekoroni yakanaka; nemwi mwakamwa vhini rakanaka yaamho kubva kumavhini.

¹⁵ Asi Jeshuruni wakakora, wakamukira. Wakaita mikanya yokukora, wakafema, wakaita michinya yemafuta! Wakasiya Mwari uwo wakamusika, wakanyenyeredza Ruware rwokupona kwake.

¹⁶ Vakamumusira ndurumwa ngendaa yezvimwari zvipara, nezvinyangadzo zvevakamunyangadza ndizvo.

¹⁷ Vakapira mibairo kunemadhimoni, haiwa kunaMwari, kuzvimwari zvevasaizia, kuzvimwari zvitsva zvichaamba kubuda, zvisaityiwa ngemadzibaba enyu.

¹⁸ Amuzi kupinimidza ngoRuware urwo rwakamusika, nemwi mwakariyarwa Mwari uwo wakamurura.

¹⁹ Mambo Mwari wakazviona, akava nendurumwa, naye wakaramba vakororo vake nevanasikana vake.”

²⁰ Wakati, “Ndinozofisha hope yangu kubva kwavari, ndinozoona kuti magumo avo anozoita akadini; ngokuti vari mubarirwana unopauka, vana vasina kugondeka mukati mwavo.

²¹ Vanondimusira ndurumwa ngeicho chisiri mwari akadi; vanondimusira ushungu ngezvimiedzaniso zvavo. Neni ndinozovamusira ndurumwa ngeavo vasiri vanhu; ndinozovamusira ushungu ngedzinza rinoupenzi.

²² Ngokuti muriro wabaswa muushungu hwangu, unozobaka metsa ugume kuSheori riri pashi; unozopedza nyika nezviro zvayo, unozopisha zvitsimiso zvemitunhu.

²³ Ndinozounganidza kushata padera pavo; ndinozopedzera misee yangu padera pavo.

²⁴ Vanozoonda ngenzara, nokupedzwa ngokupisha kukurutu, netupuka tunodya nenhenda. Mazino ezvikara ndinozoatuma kurwisana navo, pamwepo noukaira hwezviro zvinokambaira mubukuta.

²⁵ Kubanze mumapato shoti richavauraya, nokutyisa kuri mukati mwemhatso, nazvo zvinozopedza veshe majaha, nemhandara, nevachaamwa pamwepo nevakuru vachena imvi.”

²⁶ Ndakati, “Ndinozovaparadzira kuretu, ndinozoita kuti kucherechedzwa kwavo kupere kubva pakati pevanhu.”

²⁷ Asi ndakatya ushungu hwemagaa, kuti magaa avo angazoshaisha kuona, kuti varonze kuti, “Nyara dzedu dzinonyisa, andiye Mambo Mwari akadi wakaita izvi zveshe.”

²⁸ “Ngokuti riri dzinza risina pfungwa, zve, akuna kuzwisisa pakati pavo.

²⁹ Kudai vaiya vakangwara, vaizonasa kuzwisisa ichi, vaizopinimidza ngemagumo avo!

³⁰ Zvingaita maitikirenyi kuti umwe arumbirire gumi remazana avo, nevairi varumbirire makumi emazana gumi, asi kuti Ruware rwavo rwavatengesa, naMambo Mwari waiya akavapa mumaoko avo?

³¹ Ngegwinyiso ruware rwavo aruzi kudai ngoRuware rwedu, nemagaa edu emene anotonga kudaro.

³² Mavhini avo anobva mumuvhini weSodhoma, neweminda yeGomora. Mavhini avo ari mavhini echanduru, nezvikore zvavo zvinovava.

³³ Vhini ravo riri ukaira hwenyoka dzinotyisa, noukaira hwakashata hwerovambira.

³⁴ Izvi azvizi kuunganidzwa kungwarirwa neni here, nazvo zvakanamirwa pandau youpfumi hwangu?

³⁵ Kuunzidzira ngokwangu nokuthusa; tsoka dzavo dzinozotedzemuka ngomukuwo wakaemeswa; ngokuti zuva rokutambudzika kwavo riri pasinde, kuparadzwa kwavo kunouya ngokukasira.

³⁶ Ngegwinyiso Mambo Mwari unozopokonyora vanhu vake, nokuva nenyasha kuvaranda vake, apo echiona kuti simba ravo rapera, akuna unosara wakasungwa nokuti wakasunhurwa.”

³⁷ Zvino unozoti, “Zviripari zvimwari zvavo, ruware rwavo rwevanotizira,

³⁸ izvo zvaidya mafuta emibairo yavo, zvaimwa vhini remidiro yokumwa? Ngazvimiruke zvimudetsere, zviite vangwariri venyu.”

³⁹ “Wonai zvino kuti inini, kunyazwi inini, ndini, akunazve chimwari ngepabanze pangu. Inini ndinouraya, neni ndinoponesa; ndinokuvadza, neni ndinoporesa; akuna ungabvisa kubva munyara dzangu.

⁴⁰ Ngokuti ndinomirudza nyara yangu mudenga, ndechipika kuti, kudai ngezvendinopona mhera nariini,

⁴¹ naapo ndechizorodzera shoti yangu inon'anikira, nenyara yangu yechibatirira mukutonga; ndinozounzidzira kumagaa angu, ndinozounzidzira avo vanondizonda.

⁴² Ndinozoita kuti misee yangu iradze ngengazi, neshoti yangu inozodya nyama, pamwepo nengazi yevakaurawa, neyehloko, kubva kumagaa angu anebvudzi rakareba.

⁴³ Kudzai, imwimwi matenga, vanhu vake mudirei nemwi mweshe zvimwari! Ngokuti iye unozounzidzira ngazi yevana vake, naye unozopa kuunzidzira kumagaa ake, naye unozochenesa nyika ngendaa yevanhu vake.”

⁴⁴ Mosi wakauya, akaereketa mazwi eshe oruyo urwu mukuzwa kwevanhu, iye naJoshua mukororo waNuni.

Kupanga kwaMosi kwoKugumisira

⁴⁵ Apo Mosi apedza kuereketa eshe mazwi aya kwavari veshe vaIsuraeri,

⁴⁶ akati kwavari, “Isai mumwoyo yenyu mazwi eshe endinomupupurira ndiwo pakati penyu nyamashi; apei kuita mupango kuvana venyu kuti vaangwarire nokuaita eshe mazwi emipango iyi.

⁴⁷ Achisiri chiro chisina shwiro kwomuri, asi ari kupona kwenyu kwemene; kubudikidza ndiwo munozowanzisa mazuva enyu munyika iyo, yomunoambuka Jorodhani kooigara nhaka.”

⁴⁸ Mambo Mwari wakaereketa kunaMosi ngezuva ririro echiti,

⁴⁹ “Kwira padera pouyu Mutunhu weAbharimu, kuMutunhu Nebho, uri munyika yeMoabhi, wakaringirana neJerikho, uringire nyika yeKhenani, yendinopa kuvaIsuraeri kuita nhaka yavo.

⁵⁰ Unozofira mumutunhu uwo wounozokwira kwouri, unozounganidzwa kunevanhu vako; kudai ngezvaakafa Aroni mukoma wako muMutunhu Hori, akaunganidzwa kuvanhu vake.

⁵¹ Ngokuti imwimwi mweshe mwakapauka kubva kwendiri pakati pevaIsuraeri pamvura yeMeribhathikadheshi, mushango reZini; ngokuti wakakorera kundichenesa pakati pevaIsuraeri.

⁵² Kunyazwi unozoona nyika uri ngekure; auzopoterimwo kunyika yendinopa vaIsuraeri.”