Dhuto. 31 - Bhaibheri Rakachena muChindau

Joshua Unoitwa Muteedzeri waMosi

¹ Naapo Mosi apedza kuereketa eshe mazwi aya kunevaIsuraeri,

² wakati kwavari, “Ndaane makore zana nemakumi mairi. Andichakoni kubuda nokupotera, naMambo Mwari wakati kwendiri, ‘Auzoambuki iri Jorodhani.’

³ Mambo Mwari, Mwari wenyu emene ndiye unozoambuka pamberi penyu. Unozouraya aya madzinza kubva pamberi penyu, nemwi munozoagara nhaka. Joshua unozotungamirawo pamberi penyu, kudai ngezvaakagondisa Mambo Mwari.

⁴ Mambo Mwari unozoita kwaari madzinza kudai ngezvaakaita kunaSihoni naOgi, madzimambo evaAmori, nokunyika yavo, apo paakavauraya.

⁵ Mambo Mwari unozovapa kwomuri nemwi munozoita kwavari kudai ngemipango yendakamupanga.

⁶ Itai vakagwinya, mushinge, musavatya, nokuti kutyiswa ndivo, ngokuti Mambo Mwari, Mwari wenyu, uwo unoenda nemwi; aazomurekeri nokuti kumusiya.”

⁷ Zvino Mosi wakadaidza Joshua, akati kwaari mukuona kwevaIsuraeri veshe, “Ita wakagwinya, ushinge, ngokuti ndiwe unozoenda naava vanhu kunyika yaakapika ndiyo Mambo Mwari kunemadzibaba avo kuipa kwavari, newe unozoita kuti vagare nhaka yayo.

⁸ NdiMambo Mwari ndiye unohamba pamberi pako. Unozoa newe, aazokukoreresi nokuti kukusiya. Usatya, usapera simbazve.”

Mupango Ngaudzidzwe Makore Manomwe Apera

⁹ Zvino Mosi wakanyora izvi zvironzo, wakazvipa kuvapristi, vakororo vaRevhi, vaitwara bhokisi rechitenderano chaMambo Mwari, nokuvakuru veshe vaIsuraeri.

¹⁰ Mosi wakavapanga echiti, “Panoperera makore manomwe ngomukuwo womushongano wegore rokusunhura, kumushongano wemichacha,

¹¹ apo vaIsuraeri veshe vanozouya kuoneka pamberi paMambo Mwari, Mwari wavo, mundau yaanozotsanangura, munozodzidza mipango iyi pamberi pevaIsuraeri veshe mukuzwa kwavo.

¹² Munozounganidza vanhu pamwepo, vamuna, vakadzi, vana nevapara vari mukati mwemadhorobha enyu, kuti vazwe, kuti vadzidze kumutya Mambo Mwari, Mwari wenyu, nokungwarira kuita eshe mazwi emipango iyi,

¹³ kuti vana vavo, avo vasati vazia chiro, vazwe, vadzidze kumutya Mambo Mwari, Mwari wenyu, kudai ngemazuva eshe omunozopona munyika yomunozoambuka kooigara nhaka.”

Kupanga kwoKugumisira kwaMambo Mwari kunaMosi

¹⁴ Mambo Mwari wakati kunaMosi, “Nguva yako yokuti ufe yaapasinde; daidza Joshua, dziemesei pachenyu mutende romushongano, kuti ndimutume.” Ndizvo Mosi naJoshua vakaenda vakadziemesa mutende romushongano,

¹⁵ naMambo Mwari wakaoneka mutende romushongano ari mumvumi yegore; nemvumi yegore yakaema padera pomusiwo wetende romushongano.

¹⁶ Mambo Mwari wakati kunaMosi, “Ngokukasira unozoata nemadzibaba ako. Zvino ava vanhu vanozomiruka, vaite umhombo ngokuteera zvimwari zvevanhu vapara venyika yevanozoenda koogara pakati pavo; navo vanozondisiya, nokugura chitenderano changu chendakaita navo.

¹⁷ Ushungu hwangu hunozobaka kwavari ngeiro zuva. Ndinozovasiya, ndifishe hope yangu kubva kwavari; navo vanozopedzwa, nokushata kwakawanda nemadambudziko akawanda zvinozovagumira. Ndizvo vanozoti ngeiro zuva, ‘Kushata uku akutigumiri here ngokuti Mambo Mwari, Mwari wedu apana pakati pedu?’

¹⁸ Ngegwinyiso ndinozofisha hope yangu ngeiro zuva ngendaa yokushata kweshe kwevanozoita, ngokukunukuka kuenda kuzvimwari zvimweni.

¹⁹ Zvino nyora urwu ruyo, urudzidzise vaIsuraeri; uruise mumuromo mwavo, kuti urwu ruyo ruite chapupu changu kuvaIsuraeri.

²⁰ Ngokuti apo ndazovaunza munyika yendakapika ndiyo kumadzibaba avo, inoerera mukaka nouchi, navo vadya vaguta, nokukora, vanozotenderukira kuzvimwari zvimweni nokuzvishandira, kundishoora nokugura chitenderano changu.

²¹ Naapo kushata kwakawanda, nemadambudziko akawanda anozovagumira, urwu ruyo runozoita chapupu ndivo, ngokuti aruzoriyarikanwi kubva kumiromo yemibarirwana yavo. Ngokuti ndinozia mipinimidzo yavo yevatoronga zvinopano, ndisati ndavagumisa munyika yendakapika ndiyo kwavari.”

²² Ndizvo Mosi wakanyora ruyo urwu ngezuva ririro, akarudzidzisa vaIsuraeri.

²³ Zvino Mambo Mwari wakapanga Joshua mukororo waNuni echiti, “Ita wakagwinya, ushinge, ngokuti ndiwe unozopotedza vaIsuraeri munyika yendakapika kupa kwavari; neni ndinozoa newe.”

²⁴ Apo Mosi aiya apedza kunyora mazwi emipango iyi mubhuku, metsa kumagumo,

²⁵ Mosi wakapanga vaRevhi vaitwara bhokisi rechitenderano chaMambo Mwari echiti,

²⁶ “Torai bhuku iri remipango, muriise ngeparutii mukati mwebhokisi rechitenderano chaMambo Mwari, Mwari wenyu, kuti rindogara ririmwo kuita chapupu kwomuri.

²⁷ Ngokuti ndinozia kumukira kwenyu, nemisikanzwa yenyu. Apo ndichapona nemwi nyamashi, mwamukira Mambo Mwari, kunozopinda kwakaitawani ngesure kwokufa kwangu!

²⁸ Ndiunganidzirenyi vakuru veshe vemadzinza enyu, nenduna dzenyu kuti ndierekete mazwi aya munzee dzavo, ndidaidze denga nenyika kuita chapupu ndivo.

²⁹ Ngokuti ndinozia kuti ngesure kwokufa kwangu munozodzisvipisa yaamho, mwechikunukuka kubva munjira yendakamupanga. Kushata kunozomugumira kumazuva okugumisira, ngokuti munozoita zvakashata mukuona kwaMambo Mwari, kumumusira ushungu ngendaa yemishando yenyara dzenyu.”

Rwiyo rwaMosi

³⁰ Zvino Mosi wakaereketa mukuzwa kwembungano yeshe yaIsuraeri mazwi ourwu ruyo, metsa waiya aapedza.