Dhuto. 30 - Bhaibheri Rakachena muChindau

Mipango yoKupetudzwa noKufumiswa

¹ Naapo izvi zviro zveshe zvechizomugumira, zvifumiso nezvituko, zvendaisa pamberi penyu, nemwi mwechizozvikarakadza muri munyika dzeshe, apo pomunozodzingirwa ndiMambo Mwari, Mwari wenyu,

² tenderukirai kunaMambo Mwari, Mwari wenyu, nokupurutana izwi rake kudai ndizvo zveshe zvendinomupanga ngezuva ranyamashi, imwimwi nevana venyu, ngomwoyo yenyu yeshe, nomweya yenyu yeshe.

³ Zvino ngouwo mukuwo Mambo Mwari, Mwari wenyu unozomutsandura uhloko hwenyu, nokumuitira nyasha, naye unozouyazve amuunganidze kubva kunyika dzeshe, paakamuparadzira Mambo Mwari, Mwari wenyu.

⁴ Kunyazwi kudai mwakadzingirwa kuita hloko metsa kumagumo enyika, kubveyo Mambo Mwari, Mwari wenyu unozomuunganidza, kubveyo Mambo Mwari unozomupetudza.

⁵ Mambo Mwari, Mwari wenyu unozomuhwirinzazve munyika iyo yevakagara nhaka madzibaba enyu, munozoigara nhaka; naye unozomuitira zvakanaka, amuwanzise kupinda madzibaba enyu.

⁶ Zve, Mambo Mwari, Mwari wenyu, unozocheka mwoyo wenyu nomwoyo yemibarirwana yenyu, kuti mude Mambo Mwari, Mwari wenyu ngomwoyo wenyu weshe, nomweya wenyu weshe, kuti mupone.

⁷ Mambo Mwari, Mwari wenyu, unozoa zveshe izvi zvituko padera pemagaa enyu, nepadera paavo vanomunyenya nokumutambudza.

⁸ Zvino munozopetuka nokupurutana izwi raMambo Mwari, nokuita yeshe mipango yake yendinomupanga nyamashi.

⁹ Mambo Mwari, Mwari wenyu, unozoita kuti mubudirire kakurutu kumishando yeshe inoitwa ngenyara dzenyu, nokunevanobarwa ndimwi, nokunezvinobarwa ngezvifuyo zvenyu, nokuzvirimwa zveshe zvenyika yenyu. Ngokuti Mambo Mwari unozodakara ndimwi mukubudirira kwenyu muzvakanaka, kudai ngezvaakadakara ngokubudirira kwemadzibaba enyu,

¹⁰ naapo mwechizopurutana izwi raMambo Mwari, Mwari wenyu, kungwarira mipango yake nezviemeso zvake zvakanyorwa mubhuku iri remipango, nokudai mwechizotenderukira kunaMambo Mwari, Mwari wenyu ngomwoyo wenyu weshe nomweya wenyu weshe.

¹¹ Ngegwinyiso iyi mipango yendinomupanga nyamashi, aizi kunyanya kukonza kwomuri, zve, airi kuretu akadi kubva kwomuri.

¹² Aisiri mudenga, kuti mungaronza kuti, “Ndiani unozotikwirira mudenga, kuti aiunze kwetiri, kuti tiizwe nokuiita?”

¹³ Zve, aisiri seri kworuandhle, kuti mungaronza, “Ndiani unozotiambukira ruandhle, kuti aiunze kwetiri, tiizwe nokuiita?”

¹⁴ Haiwa, izwi iri riri pasinde penyu, riri mumuromo mwenyu, nomumwoyo mwenyu kuti muriite.

¹⁵ Wonai, ndaisa pamberi penyu nyamashi kupona nokunaka, nokufa nokushata.

¹⁶ Mukapurutana mipango yaMambo Mwari, Mwari wenyu yendinomupanga nyamashi ngokumuda Mambo Mwari, Mwari wenyu, kuhamba ngenjira dzake, nokungwarira mipango yake, nezviemeso zvake, nezvitongero zvake munozopona, mwechizowanda; naMambo Mwari, Mwari wenyu unozomufumisa munyika yomunoenda koogara nhaka yayo.

¹⁷ Asi kudai mwoyo yenyu yechizokunukuka, musikazozwi, asi mwechizopaukiswa kugwadamira zvimwari zvimweni nokuzvishandira,

¹⁸ ndinomuronzera nyamashi, kuti ngegwinyiso munozopera; amuzogari mazuva akawanda munyika iyo yomunoambuka Jorodhani kupotera koogara nhaka yayo.

¹⁹ Ndinodaidza denga nenyika kuti zviite chapupu ndimwi nyamashi, kuti ndaisa pamberi penyu kupona nokufa, zvifumiso nezvituko. Ndizvo tsanangurai kupona, kuti mweshe imwimwi nemibarirwana yenyu mupone,

²⁰ mumude Mambo Mwari, Mwari wenyu, mupurutane izwi rake, munamatire kwaari; ngokuti zvinoronza kupona kwenyu, nouwandu hwemazuva enyu, kuti mugare munyika yaakapika Mambo Mwari kupa kunemadzibaba enyu, kunaAbrahama, Isaka, nokunaJakobe.