Dhuto. 3 - Bhaibheri Rakachena muChindau

VaIsuraeri Vanonyisa Mambo Ogi

¹ Naapo takakunukuka takakwira munjira inoenda Bhashani; naOgi mambo weBhashani wakauya kurwa nesu, iye nevanhu vake veshe, paEdrei.

² Mambo Mwari wakati kwendiri, “Musamutya, ngokuti ndamupa iye nevanhu vake veshe, nenyika yake munyara dzenyu, nemwi munozoita kwaari kudai ngezvemwakaita kunaSihoni mambo wevaAmori, uwo waitonga muHeshibhoni.”

³ Ndizvo Mambo Mwari, Mwari wedu wakapawo Ogi mambo weBhashani munyara dzedu nevanhu vake veshe. Takavauraya veshe metsa akuzi kusara nomunhu noumwe.

⁴ Takatora madhorobha ake eshe ngouwo mukuwo; akuzi kusara nedhorobha narimwe retisikazi kutora kubva kwavari, aiya madorobha makumi matanhatu, yeshe nharaunda yaArigobhi, umambo hwaOgi muBhashani.

⁵ Eshe aya madhorobha aiya akashosherwa ngemarukumbati akareba, misiwo yakapetwa nemipiningidzo, ngepabanze pemaguta akawanda kakurutu aiya asikazi kushosherwa.

⁶ Nesu takaaparadza, kudai ngezvetakaita Sihoni mambo weHeshibhoni, takavapedza yaamho vamuna, nevakadzi nevana, kubva kumaguta eshe.

⁷ Asi zvifuyo zveshe, nezvakachakatwa zvemadhorobha, takazvitora kuita zvedu.

⁸ Ndizvo ngouwo mukuwo takatora kubva munyara dzemadzimambo mairi evaAmori, nyika dzaiya ngoruseri rweJorodhani, kubvira kuRwizi rweArinoni metsa kuguma kuMutunhu Hermoni,

⁹ (uwo Mutunhu Hermoni unodudzwa ngevaSidhoni kuti Sirioni, nengevaAmori kuti Seniri,)

¹⁰ eshe madhorobha endau dzakakwirira, nao eshe eGireadhi, nao eshe eBhashani, metsa kuguma Sareka naEdrei, madhorobha oumambo hwaOgi muBhashani.

¹¹ (Ngokuti kwega Ogi mambo weBhashani waiya asara ari weavo vakasara vari veRefaimu; penyai mubhedhi wake waiya wesimbi; aurimwo here muRabha revana vaAmoni? Kureba kwawo kwaiya mamitha marongomuna, nokufara kwawo kwaiya mamitha mairi kudai ngechipimo chaishandiswa nguveyo.)

Madzinza Akagara kuMabvazuva

¹² Neiyi nyika yetakatora ngouwo mukuwo, kubvira dera kweAroeri, riri pasinde poRwizi Arinoni, norupande rwomutunhu Gireadhi, nemadhorobha awo, ndakapa kunevaRubheni nevaGadhi.

¹³ Neyakasara yeGireadhi, neBhashani reshe, idzo dziri umambo hwaOgi, ndakazvipa kunorupande rwedzinza raManase; (yeshe nharaunda yaArigobhi, neBhashani reshe, yaidaidzwa kuti inyika yemagakanyara.

¹⁴ Jairi mukororo waManase wakatora nyika yeshe yeArigobhi metsa kuguma kumigano yeGeshuri naMaakathi; wakaidudza ngezina rake kuti Bhashani Havhothijairi metsa nanyamashi.)

¹⁵ Neni ndakapa Gireadhi kunaMakhiri.

¹⁶ NokunevaRubheni nokunevaGadhi ndakavapa nyika kubvira Gireadhi metsa kuRwizi Arinoni rupande rwokubani nomugano waro, metsa ugume kumukova Jabhoki, uwo uri mugano wevana vaAmoni;

¹⁷ zve, Arabha neJorodhani, nehumbikumbi yarwo, kubvira Khinerethi metsa kuguma kuRuandhle rwoMunyu, kubani kwePhisiga ngokumabvazuva.

¹⁸ Ndakamupanga ngouwo mukuwo ndechiti, “Kunyazwi Mambo Mwari, Mwari wenyu, akamupa iyi nyika kuti mugare nhaka yayo, munozopinda mberi kwehama dzenyu vaIsuraeri, veshe venyu vanokona kubuda kuhondo, mwakapakatira zvokurwa.

¹⁹ Asi vakadzi venyu, nevana venyu, nezvifuyo zvenyu, (ngokuti ndinozia kuti mune zvifuyo zvakawanda,) zvinozosara mumadhorobha enyu endakamupa,

²⁰ metsa Mambo Mwari azopa kuzorora kuhama dzenyu, kudai ngezvaakapa kwomuri, metsazve ivo nemwi vagare nhaka yenyika yaakapa kwavari Mambo Mwari, Mwari wenyu ruseri rweJorodhani, naapo munozopetuka munhu weshe kunhaka yake yendakamupa.”

²¹ Ndakapanga Joshua ngouwo mukuwo ndechiti, “Madziso ako akaona izvo zveshe zvaakaita Mambo Mwari kuneaya madzimambo mairi; ngokudaro Mambo Mwari unozoita kuumambo hweshe hwomunozopotera kwohuri.

²² Amuzovatyi akadi, ngokuti Mambo Mwari, Mwari wenyu unozomurwira.”

Mosi Aatenderwi Kupinda muKhenani

²³ Ndakapota Mambo Mwari ngouwo mukuwo ndechiti,

²⁴ “A Mambo Mwari, Mwari, iwewe wakatanga kupangidzira ukuru hwako, nenyara yako inesimba kunomuranda wako; ngokuti chiri pari chimwari mudenga nokuti munyika chingaita kudai ngemishando yako, nokudai ngesimba rako?

²⁵ Ndinokupota, nganditenderwe kuti ndiambuke, ndione nyika yakanaka iri ngoruseri rweJorodhani, uwo mutunhu wakanaka neRebhanoni.”

²⁶ Asi Mambo Mwari wakanditsenekera ngendaa yenyu, aazi kundizwa. Mambo Mwari wakati kwendiri, “Zvakwana kubva kwouri! Usachazoereketa kwendiri ngeiyi ndaazve!

²⁷ Kwira padera pomutunhu Phisiga, umirudze madziso ako ngokumabirira nedera nokubani nokumabvazuva; uiringire ngemadziso ako, ngokuti auzoambuki iri Jorodhani.

²⁸ Asi panga Joshua, umushingise nokumugwinyisa; ngokuti ndiye unozotungamirira ava vanhu kuambuka, unozovaita kuti vagare nhaka yenyika younozoona ngemadziso ako.”

²⁹ Ndizvo takagara mubani rakaita maringwa neBhethipeori.