Dhuto. 29 - Bhaibheri Rakachena muChindau

Chitenderano chaMambo Mwari neVaIsuraeri muNyika yeMoabhi

¹ Aya ndiwo mazwi echitenderano chaakapanga Mambo Mwari kunaMosi kuti achiite nevaIsuraeri vari munyika yeMoabhi, kututsira kuchitenderano chaakaita navo vari muHorebhi.

² Mosi wakadaidza vaIsuraeri veshe, akati kwavari: Mwakaona izvo zveshe zvaakaita Mambo Mwari pamberi pokuona kwenyu munyika yeEgipite kunaFaro, nokuvaranda vake veshe, nokunyika yake yeshe,

³ zviedzo zvikuru zvakaonwa ngemadziso enyu, zvioniso, neiyi minana mikuru.

⁴ Asi Mambo Mwari metsa nyamashi aazi kumupa mwoyo wokunasa kuzwisisa, nokuti madziso okuona, nokuti nzee dzokuzwa.

⁵ Ndakamutungamirira mushango aya makore makumi marongomuna. Machira enyu emwakasimira aazi kusakara, nemagwada mutsoka dzenyu aazi kusakara.

⁶ Amuzi kudya chingwa, nokuti kumwa vhini rinesimba, kuti muzie kuti inini ndini Mambo Mwari, Mwari wenyu.

⁷ Naapo petakaguma kundau iyi, Sihoni mambo weHeshibhoni naOgi mambo weBhashani, vakabuda kurwisana nesu, asi takavanyisa.

⁸ Takatora nyika yavo, tikaipa kuita nhaka kuvaRubheni, nokuvaGadhi, nokurupande rwedzinza raManase.

⁹ Ndizvo nasai kungwarira mazwi echitenderano ichi, kuti mubudirire kwezviri zveshe zvomunoita.

¹⁰ Imwimwi mwakaema mweshe nyamashi pamberi paMambo Mwari, Mwari wenyu; nduna dzemadzinza enyu, vakuru venyu, vatungamiriri venyu, vanhu veshe vaIsuraeri,

¹¹ vadoko venyu, vakadzi venyu nevapara venyu vari pakati pekamba renyu, kubvira kuvatemi vehuni dzenyu metsa kuguma kuvacheri vemvura yenyu,

¹² kuti mupotere muchitenderano naMambo Mwari, Mwari wenyu, chinopikwa ngemhiko, chaanoita Mambo Mwari, Mwari wenyu nemwi nyamashi,

¹³ kuti amugwinyise nyamashi kuti muite vanhu vake kwaari ega, kuti iye aite Mwari kwomuri, kudai ngezvaakamugondisa, nokudai ngezvaakapika kunemadzibaba enyu, kunaAbrahama, Isaka, nokunaJakobe.

¹⁴ Ndinoita ichi chitenderano chinopikwa ngemhiko haiwa kwomuri mwega

¹⁵ imwimwi mwakaema pano nesu nyamashi pamberi paMambo Mwari, Mwari wedu, asi ndinochiitawo neavo vasiri pano nesu nyamashi.

¹⁶ Munozia ngokugara kwedu munyika yeEgipite, nokuhamba kwetakaita mukati mwemadzinza awo etakadarika.

¹⁷ Mwakaona zvinyangadzo zvavo, nemiedzaniso yavo inonyenyesa yemiti, yemapuwe, yesirivha neyomukore, iyo yaiya pakati pavo.

¹⁸ Kungaitika kuti kungaapo pakati penyu munhu womwamuna, nokuti womukadzi, nokuti mhuri, nokuti dzinza, unomwoyo watokunukuka nyamashi kubva kunaMambo Mwari, Mwari wedu, kuti aende kooshandira zvimwari zvemadzinza awo. Kungaitika kuti pakati penyu kungaapo runzinde runobudisa chanduru chinoukaira runovava.

¹⁹ Avo veshe vanozwa aya mazwi emhiko iyi, vechidzifumisa pachavo, vechipinimidza mumwoyo yavo, “Takangwaririka kunyazwi techihamba munjira dzedu dzemisikanzwa” (ndizvo vechiunza madambudziko panezveshe zvakaoma nezvakapfaa.)

²⁰ Mambo Mwari aazovakunguriri, asi ushungu hwaMambo Mwari nendurumwa zvake zvinozobaka kuneavo vanhu. Zvituko zveshe zvakanyorwa mubhuku iri zvinozomugumira, naMambo Mwari unozodzima mazina eavo vanhu kubva pashi pomudenga.

²¹ Mambo Mwari unozovabvisa kubva kumadzinza eshe aIsuraeri, kuti vapinde mukushata, kudai ngezvituko zveshe zvechitenderano zvakanyorwa mubhuku iri remipango.

²² Mibarirwana inozoteera yevana venyu vanozoapo ngesure kwenyu, nomupara unozobva kunyika iri kuretu, vanozoona madambudziko eiyo nyika nenhenda yaanozoisa Mambo Mwari padera payo.

²³ Mavhu enyika yeshe anobaka ngesorufa nomunyu, apana chinosimwa, apana chinomera nokukura, apana nomwenje unokuremwo, kudai ngokuparadzwa kweSodhoma neGomora, Adhima neZebhoimu, ao aakaparadza Mambo Mwari muushungu hwake hunotyisa.

²⁴ Ngegwinyiso madzinza eshe anozoshamiswa echiti, “Mambo Mwari wakaita izvi ngenyi kuneiyi nyika? Kunozoronzenyi uku kubaka kwoushungu hwakadai kukura?”

²⁵ Naapo vanhu vanozoti, “Ngokuti vakasiya chitenderano naMambo Mwari, Mwari wemadzibaba avo, chaakaita navo apo akavabudisa kubva munyika yeEgipite.

²⁶ Vakapetuka kooshandira zvimwari zvimweni nokuzvidira, zvimwari zvevasaizia nezvaasikazi kupa kwavari.

²⁷ Ndizvo ushungu hwaMambo Mwari hwakabaka kuneiyi nyika, kuiunzira padera payo zvituko zveshe zvakanyorwa mubhuku iri.

²⁸ Mambo Mwari wakavabvita kubva munyika yavo muushungu, mukutseneka nomukunyangadzwa kukuru, naye wakavarashira kunyika imweni, kudai ngezvezvakadaro nyamashi.”

²⁹ Zvino zvakafishika ngezvaMambo Mwari, Mwari wedu; asi izvo zvakaoneswa pamhene ngezvedu nevana vedu kunoti mhera nariini, kuti tiite mazwi eshe emipango iyi.