Dhuto. 28 - Bhaibheri Rakachena muChindau

Zvifumiso zvoKupurutana

¹ Kudai mwechizonasa kupurutana kuizwi raMambo Mwari, Mwari wenyu, kungwarira nokuita mipango yake yeshe, yendinomupanga nyamashi, Mambo Mwari, Mwari wenyu unozomukudza kupinda madzinza eshe ari munyika.

² Nazveshe izvi zvifumiso zvinozouya kwomuri zvimugumire, kudai mwechizopurutana izwi raMambo Mwari, Mwari wenyu.

³ Munozofumiswa muri mumadhorobha enyu, munozofumiswa muminda yenyu.

⁴ Vanozofumiswa avo vanozobarwa ndimwi, nemichero yemavhu enyu, nezvinozobarwa ngezvifuyo zvenyu; zveshe zvifuyo zvenyu zvichawanzwa.

⁵ Zvinofumiswa zvitundu zvenyu nendiro dzenyu dzokukanyira.

⁶ Munozofumiswa mukupotera kwenyu nomukubuda kwenyu.

⁷ Mambo Mwari unozoita kuti magaa enyu anomumukira aurawe pamberi pokuona kwenyu; vanozobuda kurwa nemwi ngenjira imwe, vechizotiza kubva kwomuri ngenjira nomwe.

⁸ Mambo Mwari unozopanga zvifumiso padera penyu mumatura enyu, nokwezviri zveshe zvomunoshanda ngenyara dzenyu; naye unozomufumisa munyika yomunozopuwa ndiMambo Mwari, Mwari wenyu.

⁹ Mambo Mwari unozomugwinyisa kuti muite dzinza rakachena kwaari, kudai ngezvaakapika kwomuri, kudai mwechizongwarira zvironzo zvaMambo Mwari, Mwari wenyu, nokuhamba munjira dzake.

¹⁰ Vanhu veshe vomunyika vanozoona kuti imwimwi munodaidzwa ngezina raMambo Mwari; navo vanozomutya.

¹¹ NaMambo Mwari unozowanzisa nhumbi dzenyu, vana vanobarwa ndimwi, zvifuyo zvenyu, zvirimwa zvemavhu enyu, munyika yaakapika ndiyo Mambo Mwari kumadzibaba enyu, kuti ape kwomuri.

¹² Mambo Mwari unozomubeurira upfumi hwake hwakanaka, denga kuti rinayise mvura padera penyika ngenguva kwayo, nokufumisa mushando weshe wenyara dzenyu. Nemwi munozokweretesa madzinza akawanda, asi imwimwi amuzokwereti.

¹³ Mambo Mwari unozomuita soro, haiwa kuti muite muswe; munozoita vari padera kwega, amuzoiti vari pashi, kudai mwechizopurutana mipango yaMambo Mwari, Mwari wenyu, vendinomupanga nyamashi, kuti muingwarire nokuiita.

¹⁴ Musazopauka kubva kunerimwe remazwi mazhinji endinomupanga, kuenda kumudyo nokuti kuenda kumuoshwe, kuti muteere zvimwari kuzvishandira.

Musharo woKusapurutana

¹⁵ Asi kudai musikazopurutani izwi raMambo Mwari, Mwari wenyu, kungwarira kuita yeshe mipango yake, nezviemeso zvake zvendinomupanga nyamashi, izvi zveshe zvituko zvinozomugumira nokumubata.

¹⁶ Munozotukwa mumadhorobha enyu nomuminda yenyu.

¹⁷ Zvinozotukwa zvitundu zvenyu nendiro dzokukanyira dzenyu.

¹⁸ Zvinozotukwa vanobarwa ndimwi, nemichero yeminda yenyu, nezviyo zvenyu zvinozobarwa.

¹⁹ Kunozotukwa kupotera kwenyu nokubuda kwenyu.

²⁰ Mambo Mwari unozounza padera penyu kutukwa, nokutsverudzwa, nokuganyirwa, kuneizvo zveshe zvomunozoita ngenyara dzenyu, metsa mupedzwe, metsa mufe paripo; ngendaa yokushata kwezviito zvenyu zvemwakaita, ngokuti mwakandiramba.

²¹ Mambo Mwari unozoita kuti nhenda ibatire kwomuri, metsa amupedza kubva padera penyika yomunoenda koogara nhaka yayo.

²² Mambo Mwari unozomurova ngorufuba, mutsaratsara, chizvimbo, kupisha kukurutu, kuoma kwenyika, chimbarara, rotarota, nazvo zvinozomuteera metsa mupere.

²³ Denga riri padera pemasoro enyu rinozoita thusi, nemavhu ari pashi penyu anozoita simbi.

²⁴ Mambo Mwari unozoita kunaya kwenyika yenyu kuti kuite unga nebukuta: zvinozonaya padera penyu kubva mudenga metsa mupedzwe.

²⁵ Mambo Mwari unozoita kuti munyiswe pamberi pemagaa enyu; munozobuda kuenda koorwa navo ngenjira imwe, mwechizobva pamberi pavo ngenjira nomwe. Munozoita vanonyenyiwa ngemadzinza enyika dzeshe.

²⁶ Miiri yenyu inozoita kudya kweshiri dzeshe dzomudenga, nokuzvikara zvomunyika, apana nomunhu unozozvidzinga.

²⁷ Mambo Mwari unozomuchaya ngemamota omuEgipite, maronda makuru, gwembe, mhezi, izvo zvisikarapiki.

²⁸ Mambo Mwari unozomuchaya ngoupengo, noubofu, nokukangaidzwa kwemipinimidzo.

²⁹ Nemwi munozopamhira masikati, kudai ngebofu rinopamhira muchidima, asi amuzobudiriri munjira dzenyu; munozoita vanotambudzwa, nevanochakatwa kwega kunoti mhera nariini, apana munhu noumwe unozomuponesa.

³⁰ Unozoroora mukadzi, asi umweni unozoatana naye. Unozoaka mhatso, asi umweni unozoigara. Unozosima munda wemivhini, asi auzodyi michero yayo.

³¹ Kabi yako inozourawa pamberi pokuona kwako, newe auzoidyi. Mbongoro yako inozobvukwa kubva pamberi pehope yako, isikachazounzwizve kwouri. Makwai ako anozopuwa magaa ako, newe akuna unozokudetsera.

³² Vakororo vako nevanasikana vako vanozopuwa kuvanhu vamweni, madziso ako akaringira; unozorwadzisa madziso ako ngokutsvaka zuva reshe, asi usina simba rokuita chiro.

³³ Mirimwa yenyika yako, nemishando yako yeshe zvinozodyiwa ngedzinza rousikazii; newe unozotambudzwa wechitsikwatsikwa pashi nguva dzeshe,

³⁴ metsa upenge ngendaa yeizvo zvounoona ngemadziso ako.

³⁵ Mambo Mwari unozochaya mumabvi nemirenje, ngemamota anorwadza asikarapiki, kubvira ngepashi petsoka dzako metsa kuguma kunhubvuma yesoro.

³⁶ Mambo Mwari unozomutora pamwepo namambo wenyu womunozoemesa padera penyu, kuenda kudzinza romusikazii, imwimwi nokuti madzibaba enyu; naapo munozoshandira zvimwari zvimweni zvemiti nezvemapuwe.

³⁷ Munozoita chiro chinonyenyesa chisana nechinai pakati pemadzinza eshe apo paanozomuisa Mambo Mwari.

³⁸ Nemwi munozobuda nembeu dzakawanda dzokukusha mumunda, asi munozokukura zvishomani, ngokuti ndongwe dzinozozvidya.

³⁹ Nemwi munozosima mivhini nokuitongora, asi amuzomwi vhini rayo, nokuti kukaya michero yayo, ngokuti inozodyiwa ngemakonye.

⁴⁰ Munozoa nemiorivhi munyika yenyu yeshe, asi amuzozori mafuta ayo, ngokuti miti yemiorivhi yenyu inozoporodza michero yayo.

⁴¹ Nemwi munozobereka vakororo nevanasikana, asi avazogari vari venyu, ngokuti vanozotorwa kuitwa hloko.

⁴² Miti yenyu yeshe, nemichero yenyika yenyu inozopedzwa ngendongwe.

⁴³ Vapara vari pakati penyu vanozokuriswa nokua padera penyu kakurutu; neimwimwi munozodzaswa pashi kakurutu.

⁴⁴ Vanozomukweretesa asi imwimwi amuzokweretesi kwavari; ivo vanozoita soro asi imwimwi munozoita muswe.

⁴⁵ Zveshe izvi zvituko zvinozomugumira nokumurumbirira metsa mupedzwe, ngokuti amuzi kupurutana kuizwi raMambo Mwari, Mwari wenyu, kuti mungwarire mipango yake nezviemeso zvake zvaakamupanga.

⁴⁶ Nazvo zvinozoa pakati penyu kuita chioniso nechishamiso, nepakati pemibarirwana yenyu mhera nariini.

⁴⁷ Ngokuti amuzi kumushandira Mambo Mwari, Mwari wenyu ngokudakara, nokudakara kwomwoyo, ngendaa youwandu hwezviro zvenyu zveshe,

⁴⁸ ndizvo munozoshandira magaa enyu, aanozotuma Mambo Mwari kurwa nemwi, munzara nenyota, nomuutitinini nomukutama zveshe. Unozoisa joka resimbi mumitsipa yenyu metsa amupedza.

⁴⁹ Mambo Mwari unozounza dzinza rinobva kuretu kurwisana nemwi, rinobva kumagumo enyika, rinokasira kudai ngokumbururuka kwegodzi, iro dzinza ndimi yaro amuzoizwi;

⁵⁰ dzinza rinehope dzinotyisa, risikaremeredzi munhu waa musharuka, nokuti kuitira nyasha munhu mudoko.

⁵¹ Naro rinozodya michero inoberekwa ngezvifuyo zvenyu, nemichero yenyika yenyu, metsa mwapedzwa; arizomusiirizve zviyo, nokuti vhini, nokuti mafuta, nokuti zvinoberekwa ngen'ombe dzenyu, nokuti marumbu ehwai nembudzi dzenyu, metsa mwapedzwa.

⁵² Rinozomukomba mumadhorobha enyu eshe, metsa marukumbati enyu akareba akashosherwa, anemagondero enyu, awa pashi mukati mwenyika yenyu yeshe; rinozomukomba mumadhorobha enyu eshe, mukati mwenyika dzenyu dzeshe dzemwakapuwa ndiMambo Mwari, Mwari wenyu.

⁵³ Nemwi munozodya vana venyu, nyama yevakororo venyu neyevanasikana venyu, avo vemwakapuwa ndiMambo Mwari, Mwari wenyu, muri mukukombwa, nomukutambudzika kwomunozotambudzwa ndikwo ngemagaa enyu.

⁵⁴ Kunyazwi mwamuna wakanakisisa, akapfaa pakati penyu, unozoita runya kunechokudya chehama yake, mukadzi wepaditi rake, nokunewokupedzisira wevana vake avo vaanozosiya,

⁵⁵ asikapi kunyazwi ngouri wavo nyama yevana vake, avo vaanozodya; ngokuti aana chiro chakasara kwaari mukukombwa, nomukutambudzika kwaanozomutambudza ndikwo magaa enyu mukati mwemadhorobha enyu eshe.

⁵⁶ Mukadzi wakanakisisa, akapfaa pakati penyu, uwo usikakoni nokutsika ngetsoka dzake pashi pamavhu, ngendaa yokupfaisisa kwake unozoita runya kunechokudya chemwamuna wepaditi rake, nokunomukororo wake, nokunemwanasikana wake,

⁵⁷ nokunoruchiya rwake runozobuda ngepakati pemahasva emirenje yake, nokunevana vake vaanozobereka; ngokuti unozovadya ngokufishika ngokutama chiro nachimwe mukukombwa, nomukutambudzika kwomunozotambudzwa ndikwo ngemagaa enyu mukati mwemadhorobha enyu.

⁵⁸ Kudai musikangwaridziri kuita eshe mazwi emipango akanyorwa mubhuku iri, mutye zina iri rakachena nerinotyisa raMambo Mwari, Mwari wenyu,

⁵⁹ zvino Mambo Mwari unozomuchaya imwimwi mweshe nemibarirwana yenyu, ngemadambudziko makuru, asikaperi nenhenda dzinorwadza kakurutu, dzinoangira mukuwo wakareba.

⁶⁰ Unozopetudzazve padera penyu nhenda dzeshe dzeEgipite, dzemwakatya, nadzo dzinozobatira kwomuri.

⁶¹ Nhenda dzimweni dzeshe, nemadambudziko eshe, kunyazwi asikazi kunyorwa mubhuku remipango iyi, Mambo Mwari unozoaunza padera penyu metsa mwapera kuparara.

⁶² Kunyazwi mwaiya mwakawanda kudai ngenyeredzi dzomudenga ngouwandu munozosara mwaa vashomani, ngokuti amuzi kutenda kupurutana izwi raMambo Mwari, Mwari wenyu.

⁶³ Nokudai ngezveaidakara ndimwi Mambo Mwari kumuitira zvakanaka nokumuwanzisa, ngokudaro Mambo Mwari unozodakara ngokumuparadza, nokumuita kuti mupere; nemwi munozobvitwa kubva munyika yomunoenda koogara nhaka.

⁶⁴ Mambo Mwari unozomuparadzira pakati pevanhu veshe, kubvira kurupande rumwe rwenyika metsa kuguma kunorumweni; naapo munozoshandira zvimwari zvimweni zvemiti nezvemapuwe zvomusaizia, imwimwi nokuti madzibaba enyu.

⁶⁵ Nepakati paaya madzinza amutongozooni kuzorora kwetsoka yenyu. Mambo Mwari unozomupa mwoyo unohuta muriapo, nokuponyonya kwemadziso nomweya wakaremba.

⁶⁶ Kupona kwenyu kunozogara kunemaharura pamberi penyu; munozotya usiku nemasikati, nemwi amuzoa nemagondero okupona kwenyu.

⁶⁷ Mangwanani munozoti, “Kudai aiya madeekoni!” Neamadeekoni munozoti, “Kudai aiya mangwanani!” Ngendaa yokutya kwomwoyo wenyu kwomunozotya ndikwo, neizvo zvomunozoona ngemadziso enyu.

⁶⁸ Mambo Mwari unozomupetudzazve Egipite ngengarava, ngenjira iyo yendakaereketa kwomuri kuti amuchazoionizve; naapo munozodzitengesa pachenyu kunemagaa enyu kuita hloko dzevamuna nedzevakadzi, asi akuna nomunhu unozomutenga.