Dhuto. 27 - Bhaibheri Rakachena muChindau

Mipango yaMwari Yakanyorwa paMapuwe

¹ Mosi pamwepo nevakuru vaIsuraeri vakapanga vanhu vechiti, “Ngwarirai mipango yeshe iyi yendamupanga nyamashi.

² Kunozoitika ngezuva romunozoambuka Jorodhani kupotera munyika yomunopuwa ndiMambo Mwari, Mwari wenyu, kuti munozodziemesera mapuwe makuru, nokuaseta ngesuko.

³ Nemwi munozonangura padera pao eshe mazwi ezvironzo izvi, mwaambuka kupotera munyika yomunopuwa ndiMambo Mwari, Mwari wenyu, nyika inoerera mukaka nouchi, kudai ngezvaakamugondisa Mambo Mwari, Mwari wemadzibaba enyu.

⁴ Ndizvo apo mwaambuka Jorodhani, munozoemesa aya mapuwe, endinomupanga ndiwo nyamashi, muMutunhu Ebhari, nemwi munozoaseta ngesuko.

⁵ Naapo munozoakira Mambo Mwari, Mwari wenyu arita remapuwe; musazoshandisa chokuseta ndicho chesimbi kwaari.

⁶ Munozoaka arita iro kunaMambo Mwari, Mwari wenyu ngemimhu yemapuwe. Munozopira midiro yokupisha apo kunaMambo Mwari, Mwari wenyu.

⁷ Munozopira midiro yokunyarara, munozoidya apo, mudakare pamberi paMambo Mwari, Mwari wenyu.

⁸ Munozonangura eshe mazwi ezvironzo izvi padera pemapuwe anase kuoneka pamhene.”

⁹ Mosi nevapristi vaRevhi vakaereketa kunavaIsuraeri veshe vechiti, “Ngwarai, mupurutane imwimwi vaIsuraeri! Nyamashi maavanhu vaMambo Mwari, Mwari wenyu.

¹⁰ Ndizvo munozopurutana izwi raMambo Mwari, Mwari wenyu, muite mipango yake nezvitongero zvake zvendinomupanga nyamashi.”

Zvituko zvoKusapurutana

¹¹ Mosi wakapanga vanhu zuva ririro echiti:

¹² “Ava vanhu ndivo vanozoema padera poMutunhu weGerizimu kuti vadakadzise vanhu, apo mwazoambuka Jorodhani: vaSimeoni, nevaRevhi, nevaJudha, nevaIsakha, nevaJosefa, nevaBhenjamini.

¹³ Naava ndivo vanozoema padera poMutunhu Ebhari kuti vatuke: vaRubheni, nevaGadhi, nevaAsha, nevaZebhuruni, nevaDhani, nevaNafitari.

¹⁴ Zvino vaRevhi vanozodaidzira ngeizwi guru, vechiti kuvamuna veshe veIsuraeri.

¹⁵ “Wakatukwa uwo munhu unozoita muedzaniso wakatsetswa, nokuti wakaumbwa, uri chinyangadzo kunaMambo Mwari, mushando womunhu unobheja, echiuisa mundau yakafishika.” Navanhu veshe vanozopingura vechiti, “Ameni!”

¹⁶ “Wakatukwa uwo munhu unozoita chishekedzo ndibaba ake namai.” Navanhu veshe vanozoti, “Ameni!”

¹⁷ “Wakatukwa uwo unodusa hoko yomugano wenyika yomuakirwana wake.” Navanhu veshe vanozoti, “Ameni!”

¹⁸ “Wakatukwa uwo unopaukisa bofu kubva munjira.” Navanhu veshe vanozoti, “Ameni!”

¹⁹ “Wakatukwa uwo unokunukudza kutongwa kwomupara, nokwousina baba, nokweshirikadzi.” Navanhu veshe vanozoti, “Ameni!”

²⁰ “Wakatukwa uwo unoatana nomukadzi wababa ake, ngokuti wafukura upunu hwababa, ake.” Navanhu veshe vanozoti, “Ameni!”

²¹ “Wakatukwa uwo unoatana nokuti ngeiri mhuka.” Navanhu veshe vanozoti, “Ameni.”

²² “Wakatukwa uwo unoatana nehanzvadzi yake, mwanasikana wababa ake, nokuti mwanasikana wamai ake.” Navanhu veshe vanozoti, “Ameni!”

²³ “Wakatukwa uwo unoatana navambuya vake.” Navanhu veshe vanozoti, “Ameni!”

²⁴ “Wakatukwa uwo unouraya muakirwana wake ngokufishika.” Navanhu veshe vanozoti, “Ameni!”

²⁵ “Wakatukwa uwo unoashira chitengero chokuuraya munhu usina ndaa.” Navanhu veshe vanozoti, “Ameni!”

²⁶ “Wakatukwa uwo usikapurutani mazwi aya eshe kuaita.” Navanhu veshe vanozoti, “Ameni!”