Dhuto. 26 - Bhaibheri Rakachena muChindau

Zvipo zvoKukukura

¹ Naapo mwazopotera munyika yomunopuwa ndiMambo Mwari, Mwari wenyu, mwechizogara nhaka,

² munozotora michero yomutanguro yenyika yeshe, munozounza michero yenyika yomunozopuwa ndiMambo Mwari, nemwi munozoiisa muchitundu, munozoenda nayo kundau yaanozotsanangura Mambo Mwari, Mwari wenyu, kuti aise zina rake apo.

³ Nemwi munozoenda kumupristi uwo unozoapo ngaawo mazuva, mwechiti kwaari, “Ndinodzishumira nyamashi kunaMambo Mwari, Mwari wako, kuti ndaguma munyika yaakapika ndiyo kunemadzibaba edu Mambo Mwari kuti unozopa kwetiri.”

⁴ Nomupristi unozotora chitundu kubva munyara yako, unozochigadzika pashi pamberi pearita raMambo Mwari, Mwari wako.

⁵ Newe unozoereketa pamberi paMambo Mwari, Mwari wako, wechiti, “Baba angu aiya muhambi weAramu, naye wakadzaka Egipite, wakaita chigarandimo apo anevanhu vashomani, wakaita dzinza guru, rinesimba, nokuwanda.

⁶ NevaEgipite vakatibata ngenjira yakashata nokutitambudza, navo vakaisa padera pedu uhloko hwakakonza.

⁷ Takachema kunaMambo Mwari, Mwari wemadzibaba edu; Mambo Mwari wakazwa izwi redu, naye wakaringira kutambudzika kwedu, nomushando wedu, nokudzimbirwa kwedu.

⁸ Mambo Mwari wakatibudisa kubva muEgipite ngenyara inesimba, nomuoko wakatambanudzwa, nokutyisa kukuru, nezvioniso nemishamiso.

⁹ Naye wakatiunza kundau iyi, wakatipa iyi nyika, nyika inoerera mukaka nouchi.

¹⁰ Ndizvo zvino, ndaunza michero yomutanguro wenyika yewakandipa iwewe Mambo Mwari.” Newe unozoiisa pamberi paMambo Mwari, Mwari wako nokudira pamberi paMambo Mwari, Mwari wako.

¹¹ Unozodakara mukati mwezviro zveshe zvakanaka zvaakapa Mambo Mwari, Mwari wako, kwouri nokunemhuri yako, iwewe, nomuRevhi, nomupara uri pakati penyu.

¹² Naapo mwapedza kupa zvegumi zvegore rechitatu, riri gore rokupa zvechegumi nokuzvipa kuvaRevhi, nokumupara, nokunevasina baba, nokuneshirikadzi, kuti navo vadye mukati mwemadhorobha enyu vagute,

¹³ naapo unozoti pamberi paMambo Mwari, Mwari wako, “Ndaunza izvo zvakachena kubva mumhatso mwangu, zve, ndazvipa kumuRevhi, nokumupara, nokunousina baba, nokuneshirikadzi, kudai ngemipango yako yeshe yewakandipanga ndiyo; andizi kugura mipango yako, zve, andizi kuiriyarwa.

¹⁴ Andizi kudya kwezviri mukuchema kwangu, zve, andizi kutora kwezviri kuti ndishandise ngenjira yakasvipiswa, nokuti kuzvipira ngendaa yevakafa. Asi ndakapurutana kuneizwi raMambo Mwari, Mwari wangu, neni ndakaita kudai ndizvo zveshe zvewakandipanga.

¹⁵ Ringira pasi kubva uri mudenga ugaro hwako hwakachena, ufumise vanhu vako vaIsuraeri, nenyika yewakatipa, kudai ngezvewakapika kunemadzibaba edu, nyika inoerera mukaka nouchi.”

Vanhu vake Mambo Mwari

¹⁶ Ngeiri zuva Mambo Mwari, Mwari wenyu wamupanga kuti muite izvi zviemeso nezvitongero. Ndizvo munozozvingwarira nokuzviita ngomwoyo yenyu yeshe, nomweya yenyu yeshe.

¹⁷ Imwimwi mwakatenda pamberi paMambo Mwari nyamashi kuti aite Mwari wenyu, nokuhamba ngenjira dzake, nemipango yake, nezvitongero zvake, nokupurutana izwi rake.

¹⁸ Mambo Mwari wakatendera nyamashi kuti muite vanhu vepamwoyo wake, kudai ngezvaakamugondisa, kuti muingwarire mipango yake yeshe;

¹⁹ nokumukudza padera kupinda madzinza eshe aakasika, mukuirikidza, nangezina, nomukuremeredzwa; zve, kuti muite vanhu vakacheneswa vaMambo Mwari, Mwari wenyu, kudai ngezvaakaereketa.