Dhuto. 25 - Bhaibheri Rakachena muChindau

¹ Kudai iripo ndaa pakati pevanhu, navo vechiuya mukutongwa kuti vatongwe ngevatongi; naapo munozopembedza wakarurama nokuitira ndaa wakashata.

² Kunozoitika kuti kudai munhu wakashata echisisira kurohwa, mutongi unozomuita kuti aate pashi, arohwe mukuona kwake, kudai ngouwandu hwendonga dzakasisira ndaa yake.

³ Ungachaiwa kakaita makumi marongomuna, haiwa kupinda apapo; echimuchaya mizvimbo yakawanda inopinda iyi iri makumi marongomuna, naapo muakirwana wako ungaoneka kuti unoshoorwa ndiwe.

⁴ Usazoisa chokuvhara pamuromo wekabi yechipura koroni.

Zvinoitwa kuMunhu Unofa Asina Mwana

⁵ Kudai vakoma vechigara pamwepo, umwe wavo echizofa, asina vana, mukadzi wouwo wakafa aazoroorwi ngomupara ngokubanze kwevemhuri iyo. Munun'una womwamuna wake ndiye unozopotera kwaari, amutore kuita mukadzi wake, echiita mushando womukoma kwaari.

⁶ Kunozoitika kuti dangwe raanozobereka ndiye rinozogara nhaka yezina romukoma wake wakafa, kuti zina rake risazorova muIsuraeri.

⁷ Nokudai munhu asikadi kutora mukadzi womukoma wake, naapo mukadzi womukoma wake ngaaende kuvakuru pamusiwo wedhorobha, echiti kwavari, “Munun'una wemwamuna wangu unoramba kumuitira zina mukoma wake muIsuraeri; aatendi kuita mushando womukoma wake waiya mwamuna wangu.”

⁸ Naapo vakuru vedhorobha rake vanozomudaidza, nokuereketa kwaari. Kudai iye echizoema nokuronza kuti, “Andidi kumutora kuita mukadzi,”

⁹ naapo mukadzi womukoma wake unozouya kwaari pamberi pevakuru, unozomusunhura gwada rake kubva kutsoka yake, nokumupfira mata muhope mwake; unozoereketa echiti, “Ndizvo zvinoitwa kunomunhu unoramba kumusira dzinza romukoma wake.”

¹⁰ Nezina rake rinozodudzwa muIsuraeri rechizwi, “Mhatso youwo wakakhumurwa gwada rake.”

Mipango Imweni

¹¹ Naapo vanhu vairi vechiambana, nomukadzi woumwe wavo echikwedzera kununurira mwamuna wake kubva kunyara youwo unomuchaya, naye echizotambanudza nyara yake, amubate uhwamuna hwake,

¹² naapo munozotema nyara yake. Mwoyo yenyu isazomuzwira urombo.

¹³ Usazoa nezvipimo zvemapuwe okuchengedza mumukwama wako, makuru nemadoko.

¹⁴ Usazoa nezvipimo zvakapaukana zvikuru nezvidoko mumhatso yako.

¹⁵ Asi unozoa nezvipimo zvako zvisikachengedzi zvakaperera, kuti mazuva ako awande munyika yewakapuwa ndiMambo Mwari, Mwari wako.

¹⁶ Ngokuti avo veshe vanoita izvi, navo veshe vanoita zvisikazi kururama, vari chinyangadzo kunaMambo Mwari, Mwari wavo.

Mupango woKuuraya vaAmareki

¹⁷ Cherechedzai izvo zvaakaita Amareki kwomuri muri munjira, apo mwaiya mwabuda kubva Egipite,

¹⁸ ngenjira yaakashongana nemwi munjira, nokubaya kwaakaita kuneavo vaiya ngesure, vaiya vapera simba, apo mwaiya mwakaremba nokudemera; naye aazi kumutya Mwari.

¹⁹ Ndizvo kunozoitika kuti apo Mambo Mwari, Mwari wenyu unozomupa kuzorora kubva kumagaa enyu eshe, muri munyika yomunozopuwa ndiMambo Mwari, Mwari wenyu kuita nhaka yenyu yokugara, kuti nemwi munozodzima zina raAmareki kubva pashi pomudenga; musazoriyarwa kuchiita.