Dhuto. 24 - Bhaibheri Rakachena muChindau

Kurambana noKurooranazve

¹ Kudai munhu echitora mukadzi, echimuroora, kukaitika kuti aachaiti unodikana mukuona kwake, ngendaa yokuti waona chiro chasvipiswa kwaari; naapo ngaamunyorere tsamba yokuparadzana, aipe munyara yake, amudzinge kubva kumhatso yake.

² Naapo abuda kubva kumhatso yake, ungaenda kuti aroorwe ngomunhu umweni.

³ Nokudai uwo mwamuna naye asikamudi, nokumunyorera tsamba yokuparadzana, nokuipa munyara yake, nokumudzinga kubva kumhatso yake; nokuti kudai mwamuna wechipiri afa, uwo wakamutora kuti aite mukadzi wake,

⁴ mwamuna wake wokutanga, uwo wakamudzinga kubva kwaari, asachazomutorazve kuita mukadzi wake, ngesure asvipiswa; ngokuti chiri chiro chinonyangadza pamberi paMambo Mwari; nemwi musazoita kuti nyika ishaishe, yomunopuwa ndiMambo Mwari, Mwari wenyu kuita nhaka yenyu.

Mipango Yakasiyana-siyana

⁵ Naapo munhu atora mukadzi mutsva, asazoenda koorwa, zve asazopuwa mushando nokuti ngouri. Asi unozodzigarira pakanyi gore rimwe, adakadzise mukadzi waakaroora.

⁶ Akuna munhu unozotora guyo nokuti tsiyo kuita chibatiso, ngokuti ngokudaro unotora kurarama kwomunhu kuita chibatiso.

⁷ Kudai munhu echizobatwa echiba muIsuraeri umweni, echizomuita hloko nokuti kumutengesa; naapo iyo mbavha inozourawa. Nemwi munozodusa kushata kubva pakati penyu.

⁸ Ngwarai ngenhenda yemapere, kuti munase kungwarira nokuita zveshe zvemwakadzidziswa ngevapristi vaRevhi; kudai ngezvendakamupanga, ndizvo zvomunozoita.

⁹ Cherechedzai chaakaita Mambo Mwari, Mwari wenyu kunaMiriamu munjira, ngesure mwaiya mwabuda kubva Egipite.

¹⁰ Apo unozokweretwa chiro ngomuakirwana wako, usazopotera mumhatso yake kuti utore chibatiso chake.

¹¹ Unozoema ngepabanze, nouwo munhu wewakakweretesa unozounza chibatiso chake kubanze kwouri.

¹² Nokudai munhu uwo uri murombo, usazoata unechibatiso chake.

¹³ Unozohwirinza kwaari chibatiso chake apo zuva rapota, kuti iye aate anechokufuka chake, akufumise; nacho chinozoita kururama kwouri pamberi paMambo Mwari, Mwari wako.

¹⁴ Usazotambudza muranda uri murombo nounotama, kunyazwi ari muIsuraeri umweni, nokuti wevapara venyu, avo vanogara munyika yenyu, mukati mwemadhorobha enyu.

¹⁵ Ngeiro zuva unozomupa mubhadharo wemare yake, zve, zuva risazopota unawo; ngokuti iye murombo, naye unoudisisa mumwoyo mwake, kuti asazochema ndiwe kunaMambo Mwari kukuitira ndaa, nacho chiite chishaishi kwouri.

¹⁶ Vabereki avazourawi ngepamusoro pendaa yevana, zve, nevana, avazourawi ngepamusoro pendaa yevabereki; asi munhu umwe ngaumwe unozourawa ngepamusoro pechishaishi chake chega.

¹⁷ Zve, musazoshaishira ngokutsandudza kutongwa kwomupara, nokuti kwousina baba; nokuti kutora zvokufuka zveshirikadzi kuita chibatiso.

¹⁸ Asi munozokarakadza kuti mwaiya hloko munyika yeEgipite, naMambo Mwari, Mwari wenyu wakamusunhura kubva apo. Ndizvo ndinomupanga ichi chiro.

¹⁹ Apo wozokukura munda wako, newe wechiriyarwa mwanda wekoroni mumunda, usazohwirira kooutora; uwo unozoita womupara, nowevasina baba, noweshirikadzi, kuti Mambo Mwari, Mwari wako akudakadzise kumishando yenyara dzako.

²⁰ Apo unozozungunyisa muti wako womuorivhi, usazozungunyisa maorivhi anosara; anozoita evapara, neevasina baba, neshirikadzi.

²¹ Naapo wozounganidza michero yomunda wemivhini wako, usazounongeredza mavhini anosara; anozoita evapara, neevasina baba, neeshirikadzi.

²² Nemwi munozokarakadza kuti mwaiya hloko munyika yeEgipite. Ndizvo ndinomupanga kuti muite izvi zviro.