Dhuto. 23 - Bhaibheri Rakachena muChindau

Vanobviswa pakati peVanhu vaMambo Mwari

¹ Uwo wakaremara machende ake, nokuti wakagurwa mboro yake, asazopotera mumushongano waMambo Mwari.

² Mubvandirimwo aazopoteri mumushongano waMambo Mwari; metsa kumubarirwana wawo wechigumi vasazopotera mumushongano waMambo Mwari.

³ MuAmoni nokuti muMoabhi aazopoteri mumushongano waMambo Mwari; metsa kuguma kumubarirwana wavo wechigumi, avazopoteri mumushongano waMambo Mwari kunoti mhera nariini,

⁴ ngokuti avazi kumuchingamidza ngechingwa nemvura munjira, apo mwakabuda kubva Egipite; zve, ngokuti vakabhadhara Bharamu mukororo waBheo wePhetori yeMesopotamia, kuti amutuke.

⁵ Kunyazwi zvakanyadaro Mambo Mwari, Mwari wenyu aazi kupurutana Bharamu; asi Mambo Mwari, Mwari wenyu wakakunukudza chituko icho kuita chifumiso kwomuri, ngokuti Mambo Mwari, Mwari wenyu unomuda.

⁶ Musazotsvaka kuti vaanokunyarara nokuti kupfumiswa eshe mazuva enyu kunoti nariini.

⁷ Musazomuzonda muEdhomu, ngokuti hama yenyu. Musazonda muEgipite, ngokuti imwimwi mwaiya vapara munyika yavo.

⁸ Vana vomubarirwana wechitatu vanobarwa ndivo vanozopotera mumushongano waMambo Mwari.

Kungwarira Kamba reVarwi Rakachena

⁹ Apo varwi venyu voenda koorwa nemagaa enyu, naapo dzingwarirenyi kubva kunezviro zveshe zvakashata.

¹⁰ Kudai aripo munhu kunyazwi ngouri pakati penyu, usikazi kusukika usiku, ngaabude kubanze kwekamba, asazopotera mukamba.

¹¹ Naapo amadeekoni, unozodzishamba ngemvura; naapo zuva rapota unozouyazve mukamba.

¹² Munozoa nendauzve ngokubanze kwekamba, yokuitira tsvina.

¹³ Nemwi munozoisa kachipadza pazvidziyo zvenyu; nakwo kunozoitika kuti woenda kushango unozotsa ndicho, unozokunukuka kufushira izvo zvounonga wabudisa kubva kwouri.

¹⁴ Ngokuti Mambo Mwari, Mwari wenyu unohamba pakati pekamba renyu, kumusunhura nokuparadza magaa enyu kubva pamberi penyu; ndizvo kamba renyu rinozoita rakachena, kuti iye asazoona chiro nachimwe chakasvipiswa pakati penyu, amufuratire.

Mipango Yakaparadzana

¹⁵ Musazohwirinza hloko dzinonga dzatiza kubva kumadzitenzi adzo kuuya kwomuri.

¹⁶ Idzo dzinozogara nemwi, kundau yaanozotsanangura mukati mwerimwe remadhorobha enyu, apo paanoda; nemwi musazomutambudza.

¹⁷ Kusazoapo mhombo yomumhatso yokudira pakati pevanasikana vaIsuraeri nokuti vakororo vaIsuraeri.

¹⁸ Usazounza musharo unoashirwa ngoumhombo, nokuti mutengo wemhombo yemwamuna, mukati mwemhatso yaMambo Mwari, Mwari wako, kuti uripire ngeiri mhiko; ngokuti izvi zviiri zviri chinyangadzo kunaMambo Mwari, Mwari wako.

¹⁹ Usazokweretesa muIsuraeri umweni kuti uashire kubarirwa; kubarirwa kwemare nokuti kwezvokudya, nokuti kubarirwa kwezviro zveshe zvinokwereteswa kubarirwa.

²⁰ Kunomupara ungakweretesa kuti ubarirwe, asi kunomuIsuraeri umweni usazomukweretesa kuti ubarirwe, kuti Mambo Mwari, Mwari wako akufumise ngezviro zveshe zvinoshandwa ngenyara dzako munyika yomunozogara nhaka yayo.

²¹ Kudai wechizopika mhiko kunaMambo Mwari, Mwari wako, usazorekeredza kuripira; ngokuti Mambo Mwari, Mwari wako unozoibvunza kwouri ngegwinyiso, nacho chinozoita chishaishi kwouri.

²² Asi kudai usikazopiki chiro, achizoiti chishaishi kwouri.

²³ Izvo zvounozoereketa ngomuromo wako, unozongwarira kuzviita; kupika kwokupa chipo ngokuda, kudai ngezvewakapika kunaMambo Mwari, Mwari wako, izvo zvewakagondisa ngomuromo wako.

²⁴ Kudai wechizopotera mumunda wemivhini womuakirwana wako, naapo ungadya mavhini ugute kudai ngezvounoda; asi usazoisa amweni muchidziyo chako.

²⁵ Kudai wechizopotera mumunda wekoroni isati yachekwa yomuakirwana wako, naapo ungapurura mitsonzoti yayo ngenyara yako; asi usazoicheka ngesikiri koroni isati yachekwa yomuakirwana wako.