Dhuto. 22 - Bhaibheri Rakachena muChindau

¹ Usazorekera n'ombe nokuti hwai yomuakirwana wako wechiiona yechirashika, nokudzifisha kubva kwedziri: asi zvakanyadini unozodzipetudza kunomuakirwana wako.

² Nokudai muakirwana wako asiri pasinde pako, nokuti kudai usikamuzii, naapo unozoiunza kumhatso yako, inozogara apo newe metsa muakirwana wako aitsvake, unozoihwirinza kwaari.

³ Unozoita kudaro nembongoro yake, zvokufuka zvake, nezveshe zvakarashika zvomuakirwana wako zvaakarasha, newe wakazviona, unozoita kudaro ndizvo. Usazozvifisha.

⁴ Usazoringira mbongoro nokuti kabi yomuakirwana wako yechiwa munjira nokudzifisha kubva kweiri; ngegwinyiso unozomudetsera kuiunza.

⁵ Munhu womukadzi asazopfeka izvo zvinopfekwa ngomunhu wemwamuna, zve, munhu wemwamuna asazopfeka izvo zvinopfekwa ngomunhu womukadzi; ngokuti avo veshe vanoita zvakadaro vari chinyangadzo kunaMambo Mwari, Mwari wenyu.

⁶ Kudai kwechiitika kuti chisaki cheshiri chiapo mumuti kunyazwi ngouri, nokuti chiri pashi pamavhu, kudai aripo mabwipwi, nokuti mazanda, neshiri yechivhamira padera pao, mabwipwi nokuti mazanda, usatora shiri iyi pamwepo nemabwipwi ayo.

⁷ Unozorekera shiri kuti iende, utore mabwipwi ayo kuti zvinake kwouri, kuti uwanze mazuva ako.

⁸ Apo unozodziakira mhatso itsva, unozodziisira rukasha padera perukumbati rwako, kuti usazounza ngazi padera pemhatso yako, kudai pechizowa munhu kubva apo.

⁹ Usazokusha munda wako ngembeu dzakaparadzana, kuti mbeu dzako dzewakakusha, nemichero yomunda wako wemivhini zvishaishirane.

¹⁰ Auzorimi ngekabi nembongoro zvakasungirwa pamwepo.

¹¹ Auzopfeki zvokusimira zvakarukwa ngezviro zvakaparadzana, kudai ngemviri norukanganza pamwepo.

¹² Unozodziitira mahlanguyo kumipendero yezvokusimira zvenyu zvomunosimira.

Mipango ngendaa yoKusukika kweMwamuna

¹³ Kudai munhu kunyazwi ngouri echizoroora mukadzi, ngesure kwokupotera kwaari aachamudi,

¹⁴ echimuitira ndaa yezvakashata, nokumuita kuti zina rake rishoorwe echiti, “Ndakatora uyu mukadzi, naapo ndapotera kwaari, ndakaona kuti inga asichiri mhandara yakazara.”

¹⁵ Zvino baba omusikana uwo namai ake vanozotora nokubudisa kuvakuru vedhorobha panotongerwa ndaa zvioniso zvoumhandara hwake.

¹⁶ Nababa omusikana unozoti kuvakuru, “Ndakapa mwanasikana wangu kunouyu munhu kuti aite mukadzi wake, naye aachamudi.

¹⁷ Zvino waakumuitira ndaa kuti zvakashata zviereketwe kwaari, echiti, ‘Ndakaona mwanasikana wako asichiri mhandara yakazara.’ Asi izvi ndizvo zvioniso zvoumhandara hwomwanasikana wangu.” Navo vanozochinga jira iro pamberi pevakuru vedhorobha.

¹⁸ Nevakuru vedhorobha iro vanozotora munhu uwo nokumuorora.

¹⁹ Navo vanozomuripisa zvigurwa zvesirivha zana, nokuzvipa kunababa omusikana, ngokuti mhandara yaIsuraeri wakaiitira zina rakashata. Naye unozoita mukadzi wake; aazoparadzani naye mazuva eshe okupona kwake.

²⁰ Asi kudai ndaa iyi iri gwinyiso nezvioniso zvoumhandara zvouyu musikana zvisikazi kuoneka,

²¹ zvino munozounza uyu musikana kumusiwo wemhatso yababa ake, nevanhu vedhorobha rake vanozomuponda ngemapuwe kuti afe, ngokuti wakaita zvinotsverudza muIsuraeri, ngokuita zvoumhombo mumhatso yababa ake. Ngokudaro munozodusa kushata kubva pakati penyu.

²² Kudai munhu echizooneka echiatana nomukadzi womunhu umweni, naapo veshe vairi vanozourawa, veshe mwamuna uwo wakaatana nomukadziwo. Ngokudaro munozodusa kushata kubva kuvaIsuraeri.

²³ Kudai musikana uri mhandara akaemeserwa mwamuna, nomunhu echizomuona ari mudhorobha, nokuatana naye,

²⁴ zvino munozovabudisa veshe vairi kumusiwo wedhorobha iro, munozovaponda ngemapuwe kuti vafe; musikana, ngokuti aazikuridza mhere ari mudhorobha, nomwamuna, ngokuti wakatsverudzisa mukadzi womuakirwana wake. Ngokudaro munozodusa kushata kubva pakati penyu.

²⁵ Asi kudai munhu echizoona musikana wakaemeserwa mwamuna ari mushango, nokumubata ngokumuangiridza, kuatana naye, naapo munhuwo wakaatana naye ndiye unozourawa ega.

²⁶ Asi kunomusikana uwo amuzoiti chiro; ngokuti kumusikana akuna chishaishi chinosisira kuti aurawe, ngokuti iyi ndaa yakadai ngomunhu unomukira muakirwana wake nokumuuraya.

²⁷ Ngokuti wakamuona ari mushango, nomusikana wakaemeserwa pamweni wakachema pasina wokumununurira.

²⁸ Kudai munhu echiona musikana uri mhandara, isikazi kuemeserwa munhu, oroomubata, nokuatana naye, navo vechioneka,

²⁹ naapo munhu uwo wakaatana naye unozopa kunababa omusikana makumi mashanu ezvigurwa zvesirivha, naye unozoita mukadzi wake. Ngokuti wakamutsverudzisa, aazomurashi eshe mazuva okupona kwake.

³⁰ Munhu asazotora mukadzi wababa ake, nokuti kufukura upunu hwababa ake.