Dhuto. 21 - Bhaibheri Rakachena muChindau

Ndaa Dzisikazi Kutongwa dzeVaurayi

¹ Kudai munhu echizooneka afa munyika yaanomupa Mambo Mwari, Mwari wenyu kuti muigare nhaka, akati umburu murubaya, kusikaziikani kuti ndiani wamuuraya,

² zvino vanozobuda vakuru venyu nevatongi venyu, vanozopima kuguma kumadhorobha anotendenedza uwo wakaurawa.

³ Vakuru vedhorobha iro riri pasinde pouwo waurawa, vanozotora tsiru, isikazi kushandwa ndiyo, isikazi kumbosungwa pajoka.

⁴ Vakuru vedhorobha vanozounza kudzasa tsiru mubani rinemvura inoerera, risikazi kurimwa nokuti kukushwa mbeu, vanozogura mutsipa wetsiru mubani iro.

⁵ Nevapristi vakororo vaRevhi vanozokwedzera pasinde, ngokuti ndivo vaakatsanangura Mambo Mwari kuti vamushandire, nokufumisa ngezina raMambo Mwari; ngokutonga kwavo ndaa nokurwisana kweshe zvinozogurwa.

⁶ Vakuru veshe veiro dhorobha riri pasinde nomunhu wakaurawa, vanozoshamba nyara dzavo padera petsiru rakagurwa mutsipa mubani iro,

⁷ navo vanozoereketa vechiti, “Nyara dzedu adzizi kuparadza ngazi iyi, zve madziso edu aazi kuona izvi.

⁸ Itira nyasha, A Mambo Mwari, kunevanhu vako Isuraeri, avo vowakaripira; usaunzidzira ngazi isina ndaa padera pevanhu vako Isuraeri.” Nengazi iyo inozorekererwa kwavari.

⁹ Ndizvo munozodusa ndaa yengazi isina ndaa kubva pakati penyu, apo mwechizoita icho chakarurama mukuona kwaMambo Mwari.

Ndaa yeVakadzi Vakabatwa muHondo

¹⁰ Naapo munozobuda kuenda koorwa nemagaa enyu, naMambo Mwari, Mwari wenyu echivapa munyara dzenyu, nemwi mwechivatora kuita hloko,

¹¹ kudai wechiona pakati pehloko mukadzi unoringirika, newe wechimuda, kuti aite mukadzi wako,

¹² naapo unozomuunza kumatso yako. Iye unozopara soro rake, nokugurira ndwara dzake.

¹³ Unozokumura zvokupfeka zvake zvouhloko kubva kwaari, naye unozogara mumhatso yako, acheme baba ake namai ake mwedzi weshe; nangesure kweizvo unozopotera kwaari, kuchiita mwamuna wake, naye echiita mukadzi wako.

¹⁴ Asi kuti usikamudakariri, naapo unozomurekera kuti aende apo paanoda; asi usazomutengesa ngemare, usazomubata kudai ngehloko, ngokuti wakamutsverudza.

Ndaa yeNhaka yeMatangwe

¹⁵ Kudai munhu anevakadzi vairi, noumwe unomuda, noumweni asikamudi, navo veshe vari vakamuberekera vana, veshe, uwo unodikanwa nousikadikanwi; nokudai mwana wedangwe ari wouwo usikadikanwi,

¹⁶ zvino kunozoitika, apo okoanisira nhaka yake kuvakororo vake, kuti asazoisa mukororo wouwo waanoda ngepadera pouwo mukororo waasikadi, uwo uri dangwe rake ngegwinyiso.

¹⁷ Asi unozotenda mukororo wouwo waasikadi kuti idangwe, ngokumupa chikoaniswa chakahwirinzirwa cheizvo zveshe zvaanazvo; ngokuti iye uri kutanga kwesimba rake, nhaka youtangwe ngeyake.

Ndaa yoMukororo Usikapurutani

¹⁸ Kudai munhu anozoa nomukororo unomusikazwa nounomukira, uwo usikapurutani izwi rababa ake, nokuti izwi ramai ake, usikapurutani kwavari apo vakamuorora,

¹⁹ naapo baba ake namai ake vanozomubata, nokumubudisa kuvakuru vedhorobha rake, kundau inotongerwa ndaa.

²⁰ Navo vanozoti kuvakuru vedhorobha rake, “Uyu mukororo wedu unomusikazwa nokumukira, aapurutani izwi redu. Uri mukari nechiradza.”

²¹ Nevanhu veshe vedhorobha rake vanozomuponda ngemapuwe kuti afe. Ndizvo munozodusa kushata kubva kwomuri; nevaIsuraeri veshe vanozozwa, vatye.

Mipango Yakasiyana-siyana

²² Naapo munhu echizoita chishaishi chinosisira kufa, naye echizourawa, nemwi munozomusungira pamuti,

²³ Muiri wake usazosara uri pamuti usiku hweshe, asi ngegwinyiso munozoutsira ngeiro zuva; ngokuti uwo unoturikwa uri chakatukwa ndiMwari. Nyika yenyu isazosvipiswa, yemwakapuwa ndiMambo Mwari, Mwari wenyu kuita nhaka.