Dhuto. 20 - Bhaibheri Rakachena muChindau

Ndaa yeHondo

¹ Naapo munozobuda kuenda koorwa namagaa enyu, mwechizoona mahachi nengoro, nevanhu vakawanda kupinda imwimwi, musazovatya; ngokuti Mambo Mwari, Mwari wenyu unemwi, uwo wakamubudisa kubva kunyika yeEgipite.

² Musati mwatanga kurwa, mupristi unozokwedzera kuti aerekete nevarwi,

³ naye unozoti kwavari, “Izwanyi, A Isuraeri! Mwakwedzera pasinde nyamashi kurwa nemagaa enyu. Mwoyo yenyu isapera simba, musatya, nokuti kuhuta, zve, musatyiswa ndivo.

⁴ Ngokuti Mambo Mwari, Mwari wenyu ndiye unohamba nemwi, kuti amurwire magaa enyu, amuite kuti munyise.”

⁵ Nevatungamiriri vanozoereketa kuvanhu vechiti, “Uripo here munhu pakati penyu wakadziakira mhatso itsva, asati aipira? Ngaapetuke kumhatso yake, kuti pamweni ungazofa kuhondo, nomunhu umweni echizoipira.

⁶ Uripo here munhu wakasima munda wemivhini, aasati audya? Iyezve ngaapetuke kumhatso yake, kuti pamweni ungazofa kuhondo, nomunhu umweni echizoudya.

⁷ Uripo here munhu wakaripira chuma mukadzi, asati amutora? Iye ngaapetuke ahwirire kumhatso yake, kuti pamweni ungazofa kuhondo, noumweni munhu amuroore.”

⁸ Vatungamiriri vanozoereketa kuvanhu vechiti, “Uripo here munhu unotya nomwoyo wake unemaharura? Ngaapetukezve ahwirire kumhatso yake, kuti mwoyo wehama dzake dzisazopera simba kudai ngomwoyo wake.”

⁹ Kunozoitika apo vatungamiriri vapedza kuereketa kunavanhu, kuti vanozoemesa nduna padera pevanhu vehondo kuti dzivatungamire.

¹⁰ Naapo munozoguma pasinde pedhorobha romunoda kurwa naro, tangai mwatsvaka kuiyana naro.

¹¹ Kudai vechizoashira izwi rokuiyana, nokudzipira kwomuri, zvino vanhu veshe vari mukati mwaro vanozoita varanda kwomuri, vanozomushandira.

¹² Nokudai vasikazotendi kuiyana nemwi, asi vechirwa nemwi, naapo munozorikomba.

¹³ Naapo Mambo Mwari, Mwari wenyu echizopa dhorobha munyara dzenyu munozouraya veshe vamuna ngokupinza kweshoti.

¹⁴ Asi vakadzi, nevana nen'ombe, nazvo zveshe zviri mudhorobha, zvakachakatwa zveshe, munozodzitorera kuita zvenyu. Munozodya zvakachakatwa zvemagaa enyu, zvemwakapuwa ndiMambo Mwari, Mwari wenyu.

¹⁵ Munozoita izvi kumadhorobha eshe ari kuretu kubva kwomuri, asiri madhorobha eaya madzinza.

¹⁶ Asi madhorobha eava vanhu, emwakapuwa ndiMambo Mwari, Mwari wenyu kuti aite nhaka kwomuri, amuzoponesi nachimwe chinosara chechizwa.

¹⁷ Asi munozovapedza yaamho, vaHiti nevaAmori, nevaKhenani, nevaPherizi, nevaHivhi, nevaJebhusi, kudai ngezvaakamupanga Mambo Mwari wenyu,

¹⁸ kuti vasazomudzidzisa kuita kudai ndizvo zveshe zvinyangadzo zvavo, zvevakaita nezvimwari zvavo; ngokudaro munozoshaisha kunaMambo Mwari, Mwari wenyu.

¹⁹ Naapo munozokomba dhorobha mukuwo wakareba, ngokurwa naro kuritora, musazotema miti yaro ngematemo. Kunyazwi mwechizoidya, musazoitemera pashi. Miti yomuminda vanhu here vanosisira kuti vakombwe, varwiswe ndimwi?

²⁰ Kwega miti iyo yomunozoita kuti aibereki michero yokudya, ndiyo yomunozotemera pashi ipere; ngeiyo munozoaka rushosha kudhorobha iro romunorwa naro, metsa rinyiswe.