Dhuto. 19 - Bhaibheri Rakachena muChindau

Madhorobha oKutizira

¹ Naapo Mambo Mwari, Mwari wenyu unozopedza madzinza eiyo nyika yaanozomupa Mambo Mwari, Mwari wenyu, nemwi mwechizogara nhaka yavo, mwechigara mumadhorobha avo nomumhatso dzavo,

² nemwi munozodziemesera madhorobha matatu pakati penyika yenyu, yomunozopuwa ndiMambo Mwari, Mwari wenyu, kuti mugare nhaka yayo.

³ Nemwi munozodzinasirira pato, nokugura migano yenyika yomunopuwa ndiMambo Mwari, Mwari wenyu kuti muigare nhaka, kuita marupande matatu, kuti vaurayi veshe vatiziremwo.

⁴ Iyi ndiyo ndaa yomuurayi unozotiziramwo, kuti apone, uwo unozouraya muakirwana wake asikadi, waasaizonda ngomukuwo wakapinda.

⁵ Kudai ngomunhu unoenda mugwasha nomuakirwana wake kutema miti, naapo echimirudza nyara dzake kutema muti, nedemo rechitsvedzuka kubva mumupini, nokutema muakirwana wake, naye echifa; unozotizira kurimwe reawo madhorobha, kuti apone.

⁶ Kuti muunzidziri wengazi asazorumbirira muurayi, apo mwoyo wake uchapisha ngoushungu, naye amubate, ngokuti ndau iri kuretu, amuuraye; apo pasaisisa kuti aurawe, ngokuti ngepamberi inga asikamuzondi.

⁷ Ndizvo ndinomupanga ndechiti, munozoemesa madhorobha matatu.

⁸ Nokudai Mambo Mwari, Mwari wenyu echizokurisa nyika yenyu, kudai ngezvaakapika kumadzibaba enyu, nokupa kwomuri nyika yeshe yaakagondisa kupa kumadzibaba enyu,

⁹ kuti mwechizongwarira yeshe mipango kuiita yendinozomupanga nyamashi, kumuda Mambo Mwari, Mwari wenyu, nokuhamba nguva dzeshe ngenjira dzake; naapo munozodzitutsirira madhorobha matatu, ngepabanze paaya matatu,

¹⁰ kuti kusazoparadzwa ngazi isina ndaa munyika yenyu, yomunozopuwa ndiMambo Mwari, Mwari wenyu kuita nhaka, ngokudaro ngazi ingazoa padera penyu.

¹¹ Asi kudai munhu echizonda muakirwana wake, nokumuhwarira, echimumukira, echimuchaya kuti afe, naye echizotizira kunerimwe remadhorobha aya,

¹² naapo vakuru vedhorobha rake vanozotuma nokumuunza kubveyo, nokumupa munyara dzomuunzidziri wengazi, kuti amuuraye

¹³ Musazomuzwira urombo, asi munozodusa ndaa yengazi isina ndaa kubva muIsuraeri, kuti zvinake kwomuri.

Migano yeKare

¹⁴ Usazodusa hoko dzomugano dzomuakirwana wako, dzakaemeswa ngeavo vekare munhaka yenyu, yomunozopuwa ndiMambo Mwari, Mwari wenyu kuti muigare.

Ndaa yeZvapupu

¹⁵ Chapupu chomunhu umwe achizopupuri kuitira ndaa munhu kwokushata nokuti ngokuri, nokuti kushaisha nokuti ngokuri kwaanoita. Asi ngokupupurwa kwemiromo yevanhu vairi, nokuti yevanhu vatatu, ndaa inozogwinyisiswa.

¹⁶ Kudai chapupu chokunyepa chechimiruka kuitira ndaa munhu kuti apupurire zvakashata ndiye,

¹⁷ zvino vamuna vanoitirana hasha, vanozoema pamberi paMambo Mwari, nepevapristi, nevatongi avo vanozoapo ngaawo mazuva,

¹⁸ nevatongi vanozonasa kubvunzisisa. Kudai icho chapupu chiri chokunyepa, chakapupura ngokunyepa ngehama yake,

¹⁹ naapo munozoita kwaari kudai ngeicho chaakapinimidza iye kuitira kunehama yake. Ngokudaro munozodusa kushata kubva pakati penyu.

²⁰ Navo vanozosara vanozozwa, vatye, nokubvira ngenguva iyo avachazoitizve ukwo kushata pakati penyu.

²¹ Musazomuzwire urombo; asi kurarama kunozoparadzwa ngendaa yokurarama, nedziso ngendaa yedziso, nezino ngendaa yezino, nenyara ngendaa yenyara, norutsoka ngendaa yorutsoka.