Dhuto. 18 - Bhaibheri Rakachena muChindau

Chikoaniswa cheVaRevhi

¹ Vapristi vaRevhi, nedzinza reshe raRevhi, avazoa nechikoaniswa chenhaka nevaIsuraeri; asi vanozodya midiro yaMambo Mwari, inoitwa ngomuriro, nenhaka yake.

² Asi avazoa nenhaka pakati pehama dzavo; nhaka yavo ndiMambo Mwari, kudai ngezvaakagondisa kwavari.

³ Neizvo zvinozoita zvikoaniswa zvevapristi kubva kuvanhu, kubva kuneavo vanopira mudiro, kunyazwi uri wekabi nokuti hwai; navo vanozopira mupristi bandauko, netsaya mbiri nemaguru.

⁴ Mitanguro yekoroni yenyu, neyevhini renyu, neyemafuta enyu, nemviri yokutanga yemakwai enyu, munozomupa.

⁵ Ngokuti Mambo Mwari, Mwari wenyu wakatsanangura Revhi kubva mukati mwemadzinza enyu eshe, kuti aeme nokushandira muzina raMambo Mwari, iye nevakororo vake mhera nariini.

⁶ Nokudai muRevhi echizouya kubva kumadhorobha enyu kunyazwi ngeriri muIsuraeri mweshe, apo paaiya chigarandimo, echiuya ngechidisiso cheshe chomwoyo wake, kundau yaanozotsanangura Mambo Mwari,

⁷ zvino unozoshanda muzina raMambo Mwari, Mwari wake, kudai ngezvinoitwa ngehama dzake dzevaRevhi, avo vanoema apo pamberi paMambo Mwari.

⁸ Vanozodya zvikoaniswa zvakaedzana, ngepabanze peizvo zvaanoona ngokutengeswa kwezviro zvake.

Kungwadzwa ngendaa yeMiitiro yeVemadzinza

⁹ Apo mwaguma munyika yomunopuwa ndiMambo Mwari, Mwari wenyu, musazodzidza kuita zvinonyangadza zvaavo madzinza.

¹⁰ Kusazooneka pakati penyu noumwe unoita kuti mukororo wake nokuti mwanasikana wake apotye mumuriro, nokuti unoshandira kuuka, nokuti uwo unoita zvisi, nokuti muringidzi, nokuti nyamusoro,

¹¹ nokuti musaramusi, nokuti unoereketa nenyama inomukirwa, nokuti muthakathi, nokuti murombi.

¹² Ngokuti avo veshe vanoita izvi vari vanyangadzi pamberi paMambo Mwari; ngendaa yeizvi zvinyangadzo Mambo Mwari, Mwari wenyu unovadzinga kubva pamberi penyu.

¹³ Ndizvo munozoita vakarurama kunaMambo Mwari, Mwari wenyu.

¹⁴ Kunyazwi aya madzinza omunogara nhaka yavo, vakapurutana vezvisi nokuvafemberi; asi imwimwi Mambo Mwari, Mwari wenyu aazi kutendera kuti muite zvakadaro.

Chigondiso choKutumira Muprofeti

¹⁵ Mambo Mwari, Mwari wenyu unozomirudza muprofeti kubva pakati penyu, wehama dzenyu, wakadai ndini; kwaari munozopurutana.

¹⁶ Izvi ndizvo zveshe zvemwakakumbira kunaMambo Mwari, Mwari wenyu muHorebhi ngezuva romushongano mwechiti, “Ndisachazozwazve izwi raMambo Mwari, Mwari wangu, ndisazoonazve uyu muriro mukuru kuti ndisafa.”

¹⁷ Zvino Mambo Mwari wakati kwendiri, “Vanasa kuereketa izvo zvevakaereketa.

¹⁸ Ndinovamirudzira muprofeti kubva pakati pehama dzavo, wakadai ndiwe, ndinozoisa mazwi angu mumuromo wake; unozoereketa kwavari veshe zvendinozomupanga.

¹⁹ Kunyazwi ndiani usikazopurutani mazwi angu aanozoereketa ngezina rangu, ndinozoa nendaa kwaari ndio.

²⁰ Asi muprofeti uwo unoereketa mazwi ngezina rezvimwari zvimweni nokuti echiereketa ngezina rangu izwi rendisikazi kupanga kuti aerekete, uwo muprofeti unozofa.”

²¹ Nokudai mwechizoti mumwoyo mwenyu, “Tingaita maziirenyi izwi iro raasikazi kuereketa Mambo Mwari,”

²² Apo muprofeti echizoereketa ngezina raMambo Mwari, kudai icho chiro chisikazoteeri, nokuti kuitika, ndicho chiro chisikazi kuereketwa ndiMambo Mwari. Asi muprofeti uwo wakachiereketa ngomunzinini; musazotya.