Dhuto. 17 - Bhaibheri Rakachena muChindau

¹ Musazopira kuita mubairo kunaMambo Mwari, Mwari wenyu kunyazwi ngeiri n'ombe nokuti hwai yakaremara nokuti inechakashata kunyazwi ngechiri; ngokuti izvo zvinyangadzo kunaMambo Mwari, Mwari wenyu.

² Kudai kwechizooneka pakati penyu, mukati mwemadhorobha enyu emwakapuwa ndiMambo Mwari, Mwari wenyu, munhu wemwamuna nokuti womukadzi, wakaita zvakashata mukuona kwaMambo Mwari, Mwari wenyu, ngokugura chitenderano chake,

³ naye wakaenda kooshandira nokudira zvimwari zvezuva, nokuti mwedzi, nokuti ngeiri yehondo yezvomudenga, zvendisikazi kumupanga;

⁴ kudai kwechizoshumirwa kwomuri, nemwi mwechizvizwa, nokunasa kubvunzisisa ngegwinyiso, neicho chiri chakadaro, kuti kushata ukwo kwakaitwa mukati mweIsuraeri,

⁵ naapo munozobudisa uwo munhu womwamuna, nokuti womukadzi, wakaita icho chakashata, kumuunza kumisiwo yenyu, uwo mwamuna nokuti mukadzi, nemwi munozomuponda ngemapuwe metsa afe.

⁶ Ngouchapupu hwemiromo yevanhu vairi nokuti yevatatu unosisa kuurawa unozourawa; asi ngechapupu chomuromo womunhu umwe asazourawa.

⁷ Nyara dzeavo vaiita zvapupu ndiye dzinozotanga kumuuraya, ngesure nyara dzevanhu veshe nadzo. Ngokudaro munozodusa ukwo kushata kubva kwomuri.

⁸ Kudai kwechizobuda ndaa yakapinda kumukonzera kuti muigure, yepakati pengazi nengazi, nepakati pokupota nokupota, nepakati peyokurova nokurovana, dziri ndaa dzokuitirana hasha madhorobha enyu, naapo munozomiruka kuenda kundau yaakatsanangura Mambo Mwari, Mwari wenyu.

⁹ Munozouya kunevapristi vaRevhi, nokunomutongi unonga aripo ngaawo mazuva, nokubvunza kwavari; navo vanozomuronzera izwi rokugura ndaa.

¹⁰ Nemwi munozoita kudai ngeizwi revanozomuronzera, vari pandau yaanozotsanangura Mambo Mwari; munozongwarira kuita kudai ndizvo zveshe zvevanozomuronzera.

¹¹ Kudai ngokugura ndaa kwezvironzo zvevanozomudzidzisa apo, nokudai ngokugura ndaa kwevanozomuronzera, munozozviita; musazopaukira kubva kuizwi revanozomuronzera, kuenda kumudyo nokuti kumuoshwe.

¹² Nomunhu unoita muzvidzo, asikapurutani mupristi uwo wakaemeswa kuti ashandire apo pamberi paMambo Mwari, Mwari wenyu, nokuti mutongi, uwo munhu unozourawa. Nemwi munozodusa kushata ukwo kubva pakati pevaIsuraeri.

¹³ Navanhu veshe vanozozwa, vatye, vasikazoitizve ngomuzvidzo.

Kupanga ngendaa yaMambo

¹⁴ Apo mwazoguma kunyika yomunozopuwa ndiMambo Mwari, Mwari wenyu, nokuigara nhaka, mwechigaremwo, mwechizoti, “Tinozodziemesera mambo padera pedu, kudaiwo ngenyika dzeshe dzakatitendenedza,”

¹⁵ ngegwinyiso munozoemesa kuita mambo padera penyu uwo waanozotsanangura Mambo Mwari, Mwari wenyu. Umwe kubva pakati pehama dzenyu munozoemesa uwo kuita mambo padera penyu; musazoemesa munhu mupara padera penyu, usiri woukama hwenyu.

¹⁶ Asi asazodziwanzira mahachi, nokuti kuita kuti vanhu vapetuke Egipite kuti iye adziwanzire mahachi, ngokuti Mambo Mwari wakaronza kwomuri kuti, “Amuchazopetukiyo.”

¹⁷ Naye asazodziwanzira vakadzi, kuti mwoyo wake usazopaukiswa; asazodziunganidzira sirivha nomukore zvakawanda kakurutu.

¹⁸ Kunozoitika, apo echizogara padendemaro roumambo hwake, kuti azonyora tsamba yeizvi zvironzo kubva kweiyo iri pamberi pevapristi vaRevhi.

¹⁹ Netsamba iyo inozoapo naye, naye unozoidzidza mazuva eshe okurarama kwake, kuti adzidze kutya Mambo Mwari, Mwari wake, kungwarira eshe mazwi aya ezvironzo, neizvi zviemeso, kuti azviite,

²⁰ kuti mwoyo wake usazodzikudza padera pehama dzake, kuti asazopauka kubva kuneiyi mipango, kuenda kumudyo nokuti kumuoshwe, kuti awanze mazuva ake muumambo hwake, iye nevana vake, mukati mwevaIsuraeri.