Dhuto. 16 - Bhaibheri Rakachena muChindau

Phasika

¹ Ngwarirai mwedzi Abhibhi, mungwarire Phasika raMambo Mwari, Mwari wenyu, ngokuti ngomwedzi Abhibhi Mambo Mwari, Mwari wenyu wakamubudisa kubva munyika yeEgipite usiku.

² Ndizvo munozopira mubairo wePhasika kunaMambo Mwari, Mwari wenyu, kubva kuzvifuyo zvenyu zvemakwai nezven'ombe, mundau yaanozotsanangura Mambo Mwari kuisa zina rake apo.

³ Musazodya chingwa chinomumera nawo. Mazuva manomwe munozodya chingwa chisina mumera, chingwa chokutambudzika, ngokuti mwakabuda kubva munyika yeEgipite ngokukasira, kuti mucherechedze zuva remwakabuda ndiro kubva munyika yeEgipite, eshe mazuva okupona kwenyu.

⁴ Kusazooneka chingwa chinemumera mukati mwenyika yenyu metsa mazuva manomwe; zve, akuzosari nyama yomunoita mubairo ndiyo madeekoni ngezuva rokutanga, usiku hweshe metsa kuedze.

⁵ Amutenderwi kupira mudiro wePhasika mukati mwemadhorobha enyu kunyazwi awo omunopuwa ndiMambo Mwari, Mwari wenyu.

⁶ Asi kundau yaanozotsanangura Mambo Mwari, Mwari wenyu kuti aise apo zina rake, apo ndipo pomunozopira mubairo wePhasika madeekoni, ngomukuwo wokubira kwezuva, ngenguva yemwakabuda ndiyo kubva Egipite.

⁷ Nemwi munozoubika muudyire pandau yaanozotsanangura Mambo Mwari, Mwari wenyu; ngechimangwani munozohwirira kumatende enyu.

⁸ Mazuva matanhatu munozodya chingwa chisina mumera; ngezuva rechinomwe kunozoita mushongano wakachena kunaMambo Mwari, Mwari wenyu; ngeiro zuva amuzoiti mushando.

Dhiri roKukukura

⁹ Erengai kwomuri mavhiki manomwe; munozotanga kuerenga kubvira ngomukuwo womunotanga kucheka koroni ngesikiri.

¹⁰ Unozongwarira dhiri remavhiki kunaMambo Mwari, Mwari wako ngechipo chinopuwa ngomwoyo unoda ngenyara yako, unozochipa kunaMambo Mwari, Mwari wako, kudai ngokufumisa kwaakaita Mambo Mwari, Mwari wako kwouri.

¹¹ Unozodakara pamberi paMambo Mwari, Mwari wako, newe nevakororo nevanasikana vako, nehloko yako yomwamuna neyomukadzi, vaRevhi vari mukati mwemadhorobha ako, nomupara, nousina baba, neshirikadzi, vari pakati penyu, mundau yaanozotsanangura Mambo Mwari, Mwari wako kuti aise zina rake apo.

¹² Cherechedza kuti waiya hloko munyika yeEgipite; unozongwarira nokuita izvi zviemeso zveshe.

Dhiri reMatumba

¹³ Unozongwarira madhiri ematumba mazuva manomwe, ngesure wapedza kukukura koroni yako nevhini rako.

¹⁴ Unozodakara mumadhiri, iwewe nevakororo vako, nevanasikana vako, nehloko yako yomwamuna neyomukadzi, nomuRevhi, nomupara, nevasina baba, neshirikadzi vari mukati mwemadhorobha ako.

¹⁵ Mazuva manomwe unozongwarira madhiri kunaMambo Mwari, Mwari wako pandau yaanozotsanangura Mambo Mwari; ngokuti Mambo Mwari, Mwari wako unozokudakadzisa kwezviri zveshe zvinowanziswa zvako, nokumishando yeshe yenyara dzako, ndizvo ngegwinyiso unozodakara.

¹⁶ Katatu ngegore vanhu vako veshe vevamuna vanozouya pamberi paMambo Mwari, Mwari wako kundau yaanozotsanangura; ngomukuwo wedhiri rechingwa chisina mumera, ngomukuwo wedhiri remavhiki, nomukuwo wedhiri rematumba. Navo vasazouya pamberi paMambo Mwari vasina chiro.

¹⁷ Munhu weshe unozopa kudai ngezvaanokona, kudai ngechifumiso chaMambo Mwari, Mwari wako chaakakufumisa ndicho.

Kutonga Kwakarurama

¹⁸ Munozodzitsanangurira nevakuru mumadhorobha enyu eshe aanomupa Mambo Mwari, Mwari wenyu, mukati mwemadzinza enyu eshe, navo vanozotongera vanhu ndaa dzavo ngokutonga kwakarurama.

¹⁹ Musazoshaisha kutonga mukutonga kwenyu; musazoita mutsananguro kumunhu, nokuti kuashira chitengero, ngokuti chitengero chinopofomadza munhu wakangwara, chinotsandudzira mazwi avakarurama.

²⁰ Izvo zviri zvakarurama yaamho ndizvo zvomunozoteera, kuti mupone, nokugara nhaka yenyika yaanomupa Mambo Mwari, Mwari wenyu.

²¹ Musazosima muti kunyazwi ngouri kuita sika rokudira pasinde pearita raMambo Mwari, Mwari wenyu, romunozodziitira;

²² nokuti kudziemesera sika yebuwe, yaanozonda Mambo Mwari, Mwari wenyu.