Dhuto. 15 - Bhaibheri Rakachena muChindau

Gore reChinomwe

¹ Kumagumo kwemakore manomwe kunozoapo kurekererwa kwezvikwereti.

² Iyi ndiyo njira yomunozorekerera: munhu weshe wakakwereta chiro kunomuakirwana wake unozomurekerera; aazochibvunzi kunomuakirwana wake, nokuti mukoma wake, ngokuti kunodaidzwa kuti kurekererwa kwaMambo Mwari.

³ Kunomupara munozochibvunzazve, asi icho chiri chako chinonga chiri kumukoma wako, nyara yako inozochirekerera.

⁴ Kwega kuti kusazoapo varombo pakati penyu; ngokuti Mambo Mwari unozomufumisa kakurutu muri munyika yaanomupa Mambo Mwari, Mwari wenyu kuti muigare kuita nhaka yenyu.

⁵ Kwega kuti munase kupurutana izwi raMambo Mwari, Mwari wenyu, kungwarira kuita yeshe mipango yendinomupanga nyamashi.

⁶ Ngokuti Mambo Mwari, Mwari wenyu unomufumisa kudai ngezvaakamugondisa. Munozokweretesa madzinza akawanda, asi imwimwi amuzokwereti kwavari; munozotonga padera pemadzinza akawanda, asi ivo avazotongi padera penyu.

⁷ Kudai unozoapo murombo pakati penyu mukati mwerimwe remadhorobha enyu munyika yenyu yomunopuwa ndiMambo Mwari, Mwari wenyu, usazokonzisa mwoyo wako, nokuti kutswatira madziso ako kubva kunomuakirwana wako uri murombo.

⁸ Asi unozonasa kubeura nyara yako kupa kwaari, ngegwinyiso unozomukweretesa izvo zvinokwana kutama kwake, zveizvo zvaanoda.

⁹ Ngwaridzira kuti kusazoapo mukarakadzo wakashata mumwoyo mwako wokuti, “Gore rechinomwe, riri gore rokurekerera raapasinde;” nemadziso ako asaa nougaa kumuakirwana wako uri murombo, newe auna chounomupa; naye akachema kunaMambo Mwari ngendaa yako, nacho chinozoita chishaishi kwouri.

¹⁰ Ngegwinyiso unozomupa, nomwoyo wako usazogunun'una apo wamupa, ngokuti ngeiyi ndaa Mambo Mwari, Mwari wako unozokufumisa kumishando yako yeshe, neizvo zveshe zvounozoita ngenyara yako.

¹¹ Ngokuti varombo avazoperi kuapo munyika, ndizvo ndinokupanga ndechiti, “Newe unozonasa kubeura nyara yako kupa kumuakirwana wako, nokuvarombo vako, nokwavari vanotama, munyika yako.”

Kubatwa kweHloko

¹² Nokudai umwe wako, muHebheru, munhu wemwamuna, nokuti muHebheru, munhu womukadzi echitengeswa kwouri, echizokushandira makore matanhatu, naapo ngegore rechinomwe unozomutendera kuti aende kubva kwouri akasunhurika.

¹³ Naapo unozomuendesa asunhurika, usamuendesa asina chiro.

¹⁴ Unozomupa zvakawanda kubva kuzvifuyo zvako, nokubva kwezvembuwa yako yokupurira, nokubva kunezvokukamura vhini rako, nokuneizvo zvaakakufumisa ndizvo Mambo Mwari, Mwari wako unozomupa.

¹⁵ Newe unozokarakadza kuti iwewe wakaita muranda munyika yeEgipite, naMambo Mwari, Mwari wako wakakusunhura; ndizvo ndinokupanga ngeichi chiro nyamashi.

¹⁶ Kunozoitika kuti kudai echizoti kwouri, “Andizoendi kubva kwouri,” ngokuti unokuda, nevemhatso yako, ngokuti unogara newe zvakanaka,

¹⁷ naapo unozotora runhumbura, udure nzee yake ndirwo yakagwamanidzwa nomusiwo, naye unozoita hloko yako mhera nariini. Zve kunehloko yomukadzi yako unozoita kudaro kwaari.

¹⁸ Chisazoita chinokonza kwouri apo unomuendesa akasunhurika, ngokuti iye wakaita kwouri unoedzana nevaranda vairi avo vaishandira kubhadharwa, ngokukushandira makore matanhatu; naMambo Mwari, Mwari wako unzokufumisa kuneizvo zveshe zvounoita.

Matangwe eN'ombe neMakwai

¹⁹ Eshe matangwe emikono yen'ombe neyemakwai unozoaparadzanisa kunaMambo Mwari, Mwari wako; auzoiti mushando ngedzematangwe emikono yen'ombe dzako, nokuti kugunda dzematangwe emakwai ako.

²⁰ Unozodzidyira pamberi paMambo Mwari, Mwari wako gore ngegore mundau yaanozotsanangura Mambo Mwari, iwewe nemhuri yako.

²¹ Nokudai yakaremara kukumhina, nokuti ubofu, nokuti gotsa rakashata, usaipa kuita mubairo kunaMambo Mwari, Mwari wako.

²² Unozodyira mukati mwemadhorobha ako; vanhu vakasvipiswa nevasikazi kusvipiswa vanozoidya veshe, kudai ngezvevanodya mhara nokuti shoma.

²³ Kwega musazodya ngazi yayo; unozoidurura pashi pamavhu kudai ngemvura.