Dhuto. 14 - Bhaibheri Rakachena muChindau

Machemero Anorambidzwa

¹ Imwimwi muri vana vaMambo Mwari, Mwari wenyu. Musazodzicheka nokuti kuparwa tsiyo pakati pemadzinza enyu ngepamusoro pevakafa.

² Ngokuti muri vanhu vakachena kunaMambo Mwari, Mwari wenyu, naMambo Mwari wakamutsanangura kuti muite vanhu vakatsanangurwa vari vake, kupinda madzinza eshe ari padera penyika.

Mhuka Dzakacheneswa neDzakasvipiswa

³ Musazodya chiro chinonyangadza.

⁴ Idzi ndidzo mhuka dzomunozodya: n'ombe nehwai, nembudzi,

⁵ shoma, mhara, nephiva, nengururu, nenyati, mbudzi yomushango, nhuka, nehwai yomushango.

⁶ Nemhuka dzeshe dzinemadondova akamweka, kuita masondo mairi, dzechitsenga marukurwa, pakati pemhuka, munozodzidya.

⁷ Kunyazwi zvakanyadaro amuzodyi idzi dzeidzo dzinotsengesa marukurwa, nokuti dzeidzo dzinemadondova akamweka kuita mairi: kudai ngekamera, tsuro, nembira, ngokuti idzi dzinotsengesa marukurwa, asi madondova aazi kumweka kuita mairi; ndizvo dziri dzakasvipiswa kwomuri.

⁸ Nenguruve, ngokuti yakamweka madondova kuita mairi, asi aitsengesi marukurwa, ndizvo iri yakasvipiswa kwomuri. Musazodya nyama yadzo, nokuti kugwama miiri yadzo yakafa.

⁹ Munozodya idzi dzeidzo dzeshe dziri mumvura: dzeshe dzinemabesu, nemagwamba munozodzidya.

¹⁰ Kunyazwi ngedziri dzisina mabesu nemagwamba amuzodzidyi; dzakasvipiswa kwomuri.

¹¹ Dzeshe shiri dzakasukika munozodzidya.

¹² Asi kwedziri amuzodyi idzi: dorambudzi, ngwanga, chapungu;

¹³ gwakuramapande, chiatsi, njerere nembeu yadzo yeshe;

¹⁴ makungu eshe nembeu dzao dzeshe;

¹⁵ kwikwi, chizizimbori, chimwanduku, chiangu ngembeu dzazvo dzeshe;

¹⁶ muswerahope, zizi guru, huku yomumvura;

¹⁷ zinyamundanda, hwizi, riti;

¹⁸ mukwasi, hwazi ngembeu dzayo dzeshe, tsunguru nechinyamuremwaremwa.

¹⁹ Nezviro zveshe zvinotamanda nokumbururuka zviri zvakasvipiswa kwomuri; zvisazodyiwa.

²⁰ Asi shiri dzeshe dzakasukika munozodya.

²¹ Musazodya chiro nachimwe chakafa chega; unozochipa kunomupara uri mukati mwemadhorobha enyu kuti achidye nokuti mungachitengesere kunowedzinza mukanza. Ngokuti imwimwi muri vanhu vakachena kunaMambo Mwari, Mwari wenyu. Usazobika chimbudzana ngomukaka wamai acho.

Mupango weChegumi

²² Ngegwinyiso unozopa chegumi chembeu dzako dzeshe, dzinoberekwa mumunda wako gore ngegore.

²³ Munozodya pamberi paMambo Mwari, Mwari wenyu mundau yaanozotsanangura kuisa zina rake apo, zvechegumi zvezviyo zvenyu zvekoroni, nezvevhini renyu, nezvemafuta enyu, nezvematangwe ezvifuyo zvenyu; kuti mudzidze kutya Mambo Mwari, Mwari wako ngenguva dzeshe.

²⁴ Nokudai muhambo wanyanya kuita kuretu kwomuri, yaanozotsanangura Mambo Mwari, Mwari wenyu kuti aise zina rake apo, apo Mambo Mwari, Mwari wenyu wakamudakadzisa,

²⁵ naapo unozochitsandudzira kuti chiite mare. Unozotora mare munyara yako, uende kundau yaanozotsanangura Mambo Mwari, Mwari wako.

²⁶ Unozotenga ngeiyo mare kunyazwi chiinyi mwoyo wako unedanha racho, n'ombe, nokuti hwai, nokuti vhini, nokuti zvokumwa zvinesimba kunyazwi chiinyi mweya wako unedanha racho. Unozodya apo pamberi paMambo Mwari, Mwari wako, unozodakara, iwewe nemhatso yako yeshe.

²⁷ NevaRevhi vari mukati mwemadhorobha ako, usazovateteredza, ngokuti avana chikoaniswa chenhaka pamwepo newe.

²⁸ Ngokumagumo kwemakore matatu unozounza zveshe zvechegumi zvezvirimwa zvako, unozozviunganidza mukati mwemadhorobha ako.

²⁹ NevaRevhi, (ngokuti avana chikoaniswa chenhaka pamwepo newe), nomupara, nousina baba, neshirikadzi, vari mukati mwemadhorobha ako, vanozouya, vadye, vagutiswe; kuti Mambo Mwari, Mwari wako akufumise mumushando weshe wounoita ngenyara dzako.