Dhuto. 13 - Bhaibheri Rakachena muChindau

¹ Kudai kwechizobuda pakati penyu muprofeti, nokuti muroti wehope, echipa kwomuri chioniso nokuti munana,

² nechioniso nokuti munana chechiitika kudai ngokuronza kwake, ukwo kwaanozoereketa echiti, “Ngatiteere zvimwari zvimweni,” (zvomusikazi kuzia), “Ngatizvishandire.”

³ Musazopurutana uwo muprofeti, nokuti muroti wehope; ngokuti Mambo Mwari, Mwari wenyu unomuedza, kuti azie kuti munomuda here Mambo Mwari, Mwari wenyu ngomwoyo wenyu weshe nomweya wenyu weshe.

⁴ Munozoteera Mambo Mwari, Mwari wenyu, mumutye, nokungwarira zvironzo zvake, mupurutane izwi rake, munozomushandira munamatire kwaari.

⁵ Nouwo muprofeti, nokuti muroti wehope, unozourawa; ngokuti wakaereketa kuti amupaukise kubva kunaMambo Mwari, Mwari wenyu, uwo wakamubudisa kubva kunyika yeEgipite, nokumuripira kubva kumhatso youhloko, kumupaukisa kubva munjira yaakamupanga Mambo Mwari, Mwari wenyu kuti muhambe ndiyo. Ngokudaro muzomudusa kushata kubva pakati penyu.

⁶ Kudai mukoma wako, mukororo wamai ako, nokuti mukororo wako, nokuti mwanasikana wako, nokuti mukadzi wepaditi rako, nokuti shamwari yako echimuonga ngokufishika, echiti, “Ngatiende, tidire zvimwari zvimweni,” zvomusikazi kuzia, imwimwi nokuti madzibaba enyu,

⁷ ngokudaro zvimwari zvevanhu vanomutendenedza, vari pasinde kwomuri, nokuti vari kuretu kwomuri, kubvira kurupande rumwe rwenyika metsa kuguma kurupande rumweni rwenyika,

⁸ auzomutenderi nokuti kumupurutana. Madziso ako asazomuzwira urombo, zve, usazomuponesa, nokuti kumufisha.

⁹ Asi ngegwinyiso unozomuuraya; nyara yako inozoita yokutanga kumuuraya, nesure nyara dzevanhu veshe.

¹⁰ Unozomuponda ngemapuwe, kuti afe; ngokuti iye wakapinimidza kukupaukisa kubva kunaMambo Mwari, Mwari wako, uwo wakakubudisa kubva kunyika yeEgipite, kubva kumhatso youhloko.

¹¹ NevaIsuraeri veshe vanozozwa vatye, avachazoitizve kushata kwakadai ngouku pakati penyu.

¹² Kudai wechizozwa kurimwe remadhorobha ako, rewakapuwa ndiMambo Mwari, Mwari wako kuti ugaremwo, kwechizwi,

¹³ vamuna vakatikuti vakashata vakabuda kubva pakati penyu, vabudisa vanhu vomudhorobha ravo, vechiti, “Ngatiende tidire zvimwari zvimweni,” zvomusikazi kuzia,

¹⁴ zvino unozobvunza nokutsvakisisa. Kudai zvinegwinyiso, nendaa yakandodaro, kuti kushata kwakadaro kunoitwa pakati penyu,

¹⁵ naapo ngegwinyiso munozouraya vagari veiro dhorobha ngokupinza kweshoti, kuripedza yaamho, nazvo zveshe zvirimwo, nezvifuyo zvavo, ngokupinza kweshoti.

¹⁶ Munozounganidza zveshe zvakachakatwa zvaro pakati pemapato aro, munozopisha dhorobha iro ngomuriro, nazvo zveshe zvakachakatwa zvaro, kusasara nachimwe, ngepamusoro paMambo Mwari, Mwari wenyu, kuita mudiro wokupisha zveshe kunaMambo Mwari, Mwari wenyu. Rinozoita matongo mhera nariini; arichazoakwizve.

¹⁷ Kusazonamira kunyara yako nechiro nachimwe cheizvo zvakatukwa, kuti Mambo Mwari akunukuke kubva kunoushungu hwake hunotyisa, amupangidzire nyasha, amuzwire kusvipa mwoyo, nokumuwandisa, kudai ngezvaakapika kumadzibaba enyu,

¹⁸ kudai mwechizopurutana izwi raMambo Mwari, Mwari wenyu, ngokungwarira mipango yake yeshe yendinomupanga nyamashi, kuti muite zviri zvakanaka mukuona kwaMambo Mwari, Mwari wenyu.