Dhuto. 11 - Bhaibheri Rakachena muChindau

Ukuru hwaMwari

¹ Ndizvo munozomuda Mambo Mwari, Mwari wenyu, nokungwarira zvaanoronza, nezviemeso zvake, nezvitongero zvake, nemipango yake, nguva dzeshe.

² Muzie nyamashi; ngokuti andiereketi kuvana venyu vasikazii, nevasikazi kuona kuorora kwaMambo Mwari, Mwari wenyu, ukuru hwake, nomuoko wake unesimba, nomuoko wake wakatambanudzwa,

³ neminana yake, nezviito zvake, zvaakaita muEgipite kunaFaro mambo weEgipite, nokunenyika yake yeshe;

⁴ neizvo zvaakaita kunehondo yeEgipite, kumahachi avo nokungoro dzavo; nenjira yaakaita kuti mvura yoRuandhle Rwakatsvuka ivambonye vachamurumbirira ngesure, nenjira yaakavapedza ndiyo Mambo Mwari metsa nanyamashi;

⁵ neizvo zvaakaita kwomuri mushango, metsa mugume kundau iyi;

⁶ neizvo zvaakaita kunaDhathani naAbhiramu, vakororo vaEriabhi mukororo waRubheni, njira yerakabeura ivhu muromo waro, rikavamedza, nemhuri dzavo, nematende avo, nezviro zvavo zveshe zvevaiya nazvo, pakati pevaIsuraeri veshe.

⁷ Ngokuti madziso enyu emene akaona zviito zvikuru zveshe zvaMambo Mwari zvaakaita.

Zvifumiso zveNyika yeChigondiso

⁸ Ndizvo munozongwarira mipango yeshe yendinomupanga ngeiri zuva, kuti muite vanesimba, nokupotera umwo mugare nhaka yenyika apo pomunoedza kooigara,

⁹ kuti muwanzirwe mazuva enyu munyika, yaakapika ndiyo Mambo Mwari kumadzibaba enyu kupa kwavari nokumibarirwana yavo, nyika inoerera mukaka nouchi.

¹⁰ Ngokuti nyika yomunoenda koogara aizi kudai ngenyika yeEgipite, yemwakabuda kubva kweiri, apo pomwakakusha mbeu dzenyu, nokudiridzira ngokupikura kwetsoka dzenyu, kudai ngomunda womuriwo.

¹¹ Asi nyika yomunoenda koogara, inyika yemitunhu nemabani, inomwa mvura inobva mudenga,

¹² nyika yaanopinimidza ndiyo Mambo Mwari, Mwari wenyu; ngokuti madziso aMambo Mwari, Mwari wenyu anondogara akairingira, kubvira kwokuamba kwegore metsa kumagumo aro.

¹³ Kunozoitika kudai mwechizonasa kupurutana mipango yangu yendinomupanga nyamashi, kumuda Mambo Mwari, Mwari wenyu, nokumushandira ngomwoyo wenyu weshe, nomweya wenyu weshe.

¹⁴ Zvino ndinozomupa mvura kuti inaye munyika mwenyu ngenguva kwayo, mvura yokutanga neyokugumisira, kuti mukukure koroni yenyu, nevhini renyu, nemafuta enyu.

¹⁵ Ndinozoita kuti mwenje ukure mumbusho dzenyu kuti zvifuyo zvenyu zvidye, kuti mudye mwechiguta.

¹⁶ Dzingwarirenyi, kuti mwoyo yenyu isazochengedzwa, nemwi mupauke mushandire zvimwari nokuzvidira.

¹⁷ Naapo ushungu hwaMambo Mwari hunozobaka kwomuri, naye echizokonya denga kuti mvura isazonaya, nenyika isazobereka michero yayo; neimwimwi munozofa ngokukasira kubva munyika yakanaka yemwakapuwa ndiMambo Mwari.

¹⁸ Ndizvo munozongwarira aya mazwi angu mumwoyo mwenyu, nomumweya yenyu, muasungire mumioko yenyu kuita chioniso, kuti aite kudai ngemundanyara unechibhokisi pamberi pemadziso enyu.

¹⁹ Nemwi munozoadzidzisa vana venyu, mwechiereketa ndiwo apo mwakagara mumhatso dzenyu, naapo mwechihamba munjira, naapo mwoata pashi, naapo mwopirimuka.

²⁰ Nemwi munozoanyora pasika dzemisiwo yemhatso dzenyu, nepazvimana zvenyu,

²¹ kuti mazuva enyu nemazuva evana venyu awande, munyika yaakapika Mambo Mwari ndiyo kumadzibaba enyu kuti aipe kwavari, kudai ngemazuva omudenga panyika.

²² Kudai mwechizonasa kungwarira iyi mipango yeshe yendinomupanga, kuita kuda kwaMambo Mwari, Mwari wenyu, nokuhamba ngenjira dzake dzeshe, nokunamatira kwaari,

²³ naapo Mambo Mwari unozodzinga eshe madzinza kubva pamberi penyu, nemwi munozogara nhaka yemadzinza akakura naanesimba kupinda imwimwi.

²⁴ Dzeshe ndau dzinotsikwa ngetsoka dzenyu dzinozoita dzenyu, kubvira mushango, metsa kuguma Rebhanoni, nokurwizi Yufratesi, metsa kuguma kuruandhle rwemberi, ngokunozogumira migano yenyu.

²⁵ Akuzoapo munhu unozokona kuema pamberi penyu, ngokuti Mambo Mwari, Mwari wenyu unozoisa nheruso yenyu nokutyisa kwenyu padera penyika dzeshe dzomunozotsika, kudai ngezvaakaronza kwomuri.

²⁶ Ringirai, ndaisa pamberi penyu ngeiri zuva chidakadziso nechituko.

²⁷ Chidakadziso chinozoa kwomuri kudai mwechipurutana mipango yaMambo Mwari, Mwari wenyu, yendinomupanga nyamashi;

²⁸ nechituko chinozoa kwomuri kudai musikazopurutani mipango yaMambo Mwari, Mwari wenyu, mwechipauka kubva kunjira yendinomupanga nyamashi, kuti muteere zvimwari zvomusaizia.

²⁹ Naapo Mambo Mwari, Mwari wenyu amupotedza munyika yomunoenda kweiri koogara nhaka, munozoisa chidakadziso icho padera poMutunhu Gerizimu, nechituko padera poMutunhu Ebhari.

³⁰ Kudai ngezvomunozia iri ngoruseri rweJorodhani ngokumabirirazuva, munyika yevaKhenani, avo vanogara muArabha akaringirana neGirigari, pasinde nemiokhi yeMore.

³¹ Naapo munozoambuka Jorodhani kupotera umwo kuti mugare nhaka yenyika yemwakapuwa ndiMambo Mwari, Mwari wenyu, munozogara nhaka yayo, mwechigara kweiri,

³² nemwi munozongwarira kuita zveshe izvi zviemeso nezvitongero zvendaisa pamberi penyu nyamashi.